Eeshoke Chulachula oye enyakwa lyuudhano woSecond Division mOhangwena

0
39
Oliha ndjika oyo yi li osheelo shokupitila oosipana dhomoshitopolwa shaHangwena okuya koliha ontiyali moshilongo, ano oFirst Division.

Shipi Elago

ONGWEDIVA – Nonando oliha yoshitopolwa shaHangwena oyi na ko uudhano wumwe yi pwe, Eeshoke Chulachula odhi li nale dhi na iikaha ayihe kekopi lyoliha ndjika.

Eeshoke Chulachula FC nando yi na ko uudhano wumwe oyi li nale ya tulila po oosipana oonkwawo elala, noyi li ya kulumana kombanda yoshitaafula sholiha nehwata lyiitsa 55, omanga Ohangwena Nampol ndjoka ye ya landula yi na iitsa 39 na itayi vulu we okukwata Eeshoke ndhoka dhi li haandiyaka yomulonga nodha tegelela ashike okupewa ekopi lyawo.

Ohangwena Nampol oyo ya landula mo mEeshoke pehala etiyali moka nayo tayi monika ya tula nale okagulu kokakwawo oshoka oosipana ndhoka dhi li monima ye nando dhi ka ninge iinyengandunge itadhi ka wapa oku adha mo.

Muudhano mboka wa li wa dhanwa ehuliloshiwike lya za ko Hamutumbangela okwa li a dhenge mo Omafo FC 1-0, omanga Mwandinhomo United FC a li a hanagula po Mukwamalanga FC 5-2.

Namundjembo FC okwa li a dhenge mo Young Tops FC 1-0,omanga Further Fighters a li i ithigi othika yimwe muyimwe , ye kalolo mwene gwetsali Eeshoke ta dhi dhenge XI Bullet 3-2, omanga uudhano wahugunina mOlyomakaya owa li pokati koNampol FC naHope Academy moka hope a li a dhengwa 2-1.

Mesiku lyEsapati Omafo United FC oga li ga dhenge mo Young Tops 3-0, omanga Hamutumbangela a li a dhenge mo XI Bullet 4-0, ye Mwadinhomo United FC ti ithigi othika 2-2 naMajor Power.

Mukwamalanga FC okwa li a pewa okangola kuHope Academy nookoola 2-1, Eeshoke Chulachula FC odha li dha ulukile oosisande komutse gwondjamba sho ya dhenge osipana yOhangwena Nampol 2-1 yo Namundjembo FC tayi ithigi othika 0-0 naFurther Fighters Fc.
Oliha ndjika otayi tsikile ehuliloshiwike ndika nolugwodhi olu li pekota lyoshitaafula mpoka pe na Omafo FC ndjoka yi li tayi lu ya tula ombunda moshihwa opo yi tale ngele otayi zi mo mokakololo koosipana ndhoka tadhi ka pewa olukaku sho oliha ndjika tayi ke ya pehulilo.

Mukwamalanga FC oku li nale i igandja kolukaku nokakuya koliha nokwi idhngela nale okatenda kutya moliha muka ita ka tokwa mo omvula tayi ya oshoka nando e na ko uudhano uyali ota wu ke mu pa ashike iitsa yi li 17 mbyoka itayi ke mu kwatha sha oshoka oosipana ndhoka dhi li pombanda ye odhi na iitsa yi vule po pwaambyoka.

Oliha ndjika otayi ka fumbika onkolo ehuliloshiwike ndika, sho mOlyomakaya Major Power FC ta ka ya mondambo naNamundjembo FC, dho Eeshoke Chulachula otadhi ka kondjitha Omafo United FC, Further Fighters ota ka tala ngele ota piti po puNampol.
Young Tops FC ota ka kondjitha Mukwamalanga FC, omanga Hope Academy ta ka ya mondambo naHamutumbangela FC, omanga uudhano wahugunina mOlyomakaya tawu ka kala pokati kaXI Bullet naMwadinomo United FC.

mOsoondaha oku na ashike uudhano wopaali moka Hamutumbangela ta ka tya pwaka naYoung Tops FC, go Omafo United FC otaga ka tula ko ekumba koliha ndjika sho taya kakondjitha Further Fighters.

LEAVE A REPLY

Please enter your comment!
Please enter your name here