Ethigathano lyokugandja omapapa kaahikingalo yopambepo moshilongo lya galuka

0
24
Lady Dyna ogumwe gwomaahikingalo  mboka ya hiwa oku ka kutha ombinga methigathano ndika lyokugandja omapapa kaahikingalo yoondjimbo dhopambepo moshilongo, tali ka ningwa muSepetemba.

Pinehas Nakaziko

WINDHOEK – Ethigathano lyoongalo dhopambepo lyomoshilongo lya tseyika nawa nedhina NGOMA Awards, ndyoka kwa li lyi na okukala hali ningwa kehe omvula ashike kakwa li lya dhanwa omvula ya za ko molwompumbwe yoshimaliwa osho lya tseyitha egaluko lyalyo, nonuumvo okwa tengenekwa lyi ka kale lya dhanenwa poNamPower Convention Centre muSepetemba 29.

NGOMA Awards ethigathano ndyoka hali gandja ompito ombwaanawa kaaimbi yoondjimbo dhopambepo, kwali lya totwa po mo2016, nokwali lyadhanenwa tango pokapale koIndependence Arena moKatutura.

Gumwe po gwomaalongekidhi yethigathano ndika, Silas Nghishihange okwa nothele ko Kundana ta ti ehangano ndika olya etwa po kehangano lyokukalela po  oongalo dhopambepo moshilongo lyoNamibia Gospel Music Association (NGMA), ndyoka kwa li lya mono ohokwe moongalo dhoGospel moshilongo, noya li ye wete sha pumbiwa opo ya gandje omapapa kaahikingalo mbaka, nelalakano oku ya tsa omukumo opo ya pule komeho, yo ya tsikile noku imba oongalo ndhoka tadhi tungu.

Kakele kwaashoka, ethigathano ndika okwa tengenekwa tali ka kala lya dhenga mbanda, naakuthimbinga oya hogololwa nale.  
Nuumvo ethigathano olyi na oongundu 11, moka kehe mongundu mu na aakuthimbinga yahamano, kakele kokangundu hoka kaaningimikwelengendjo dhingi yoongalo dhopambepo ye li mo yatatu.

Aakuthimbinga ayehe kumwe oye li 63, naasindani otaa ka sindana oshimaliwa shili pokati ko N$10 000 no N$15 000.
“Konima sho twa mono kutya oongalo dhoGospel odhi li tadhi dhana onkambadhala moshilongo, okwa li twa tokola opo tu ninge oshiindingili shika shokomuvo, kehe omvula, opo aaimbi yoGospel ya mone ompito ombwaanawa opo ya hume komeho, tashi pitile methigathano ndika,” Nghishihange ta ti ngaaka.

Nghishihange okwa gwedha po ishewe ta ti yo oya tsa uukuni kumwe nehangano lyo-NBC, ndyoka tali ka thaneka esiku lyegandjo mapapa ndika alihe. Nonando mbaka oya ti ekwatho lyoshimaliwa otali nyengathana, ayihe otayi ka enda nawa.
Poshiindingili shika otapu ka kala aahikingalo yaNamibia taya ke shi iningila, notaya ka nyanyudha aatali mboka taya ka holoka.
Kakele kwaashoka, oya ithana ishewe Tandie Banda okuziilila koZambia, ngoka oye ta ka wilika oshituthi shika. Ehangano lyokukalela po oongalo dhoGospel moBotswana  nalyo olya ithanwa.

LEAVE A REPLY

Please enter your comment!
Please enter your name here