Ethiopia osho a ningi ombili naEritrea

0
28
Aakwashigwana moEthiopia naEritrea taya tya ulike enyanyu lyawo sho Ethiopia naEritrea ya shaina evathano lyombili konomina yoomvula 50 ya li ihaaya endathana

Fergal Keane

Iilongo iyali mbyoka ya li aatondi nakupwe uule woomvula dhi vulithe omilongo ntano, mbyoka ya lwa iita ya thiga aantu omayovi ya sa noyendji ya thiga po omalukalwa gawo, oya ti naku ye oshigongoti muule ashike womasiku omashona. Ndjika onkundana onene muuyuni awuhe koonono, kashi shi ashike muAfrika. Edhiminathanopo ndika pokati kaEthiopia noshishishiindalongo she shoka Eritrea otali gandja oshiholelwa oshiwanawa kuuyuni kutya oshike tashi vulu okuholokapo uuna pe na elelo lya nkondopala.
Omulumentu ngoka ta pupulwa komugongo mokweeta po elunduluko ndika oye gumwe gwomaaleli mboka ya za muAfrica ye na uukwatya tawu nana noku na oonkondo okuninga omatokolo.

A li nale omunambelewa gwetanga lyegameno, ngoka e na onzapo yoPhD mokukandula po omayipumomumwe, Abiy Ahmed okwa li a hogololwa omuprimaminista gwaEthiopia muApilili. Sho Abiy a tsakanene nambushe miilonga, ngoka a kala nokulela Eritrea ethimbo nuule, Isaias Afawerki, osha li oshilonga shomupondo okuza komuprima nosha kumitha aantu ye oyendji nokugandja oonkondo kaahwahwameki yuudemokoli menenevi alihe.

Oshilongo shoka sha li sha talika ko kiilongo ya putuka onga endhindhiliko lyaayihe mbyoka ya puka muAfrika, sha talika ko oshilongo shondjala, otashi koko onga oshilongo shoka tashi eta omalunduluko.

Omunamimvo 42 nguka a li nale omunambelewa gwetanga lyegameno okwa mangulula aanandholongo mboka ya li ya taalela omapangulo gaanandholongo yopapolitika, aanambelewa mboka ya tidhwa miilonga taya tamanekelwa omahepeko, okukandula po oondjindikila dha tulilwa po iikundaneki, okupatulula oompito dheliko, nangashingeyi nekwathelo lyapresidente Isaias, okwa hulitha po iita naEritrea. Uuna sha yaga kegonga, uutondwe pokati kiishiindalongo mbika olya lilitha uunona ngaashi Adonay Michael.

Tse naAdonay Michael otwi itseyele moondundu dhaEritrea konima sho Ethiopia a mboma po ehala lyomalandithilo gawo. Okwa li a adhika mehalandjandja nomumwayinakadhona sho omandoloma giilwitho yonapalm ga li gu umbilwa mengungo lyaantu, shoka sha li she etitha omundilo gwomeya ngoka gwa li gwa fike oshipa she nayi.

Adonay okwa li e na oomvula omulongo lwaampoka nokwa li ha lili uuna ombepo ya tameke okupepa tayi pitile motenda moka a lala. Shika osha li oomvula konyala omi-30 sho oondume dhomomithitu dhaEritrea dha li tadhi kondjele emanguluko lyoshilongo shawo kuEthiopia.

Sho oombinga adhihe dha li dhi itaala moMarxist, shika kasha li olugodhi kombinga yontaleleo yawo yuuyuni, ashike osha li Aaritrea taya kondjitha epangelo moka ya tulwa komushiinda omunene.

Momukokomoko gwondjila yandje onda tsakanenka oonakuhepekwa, aakwashigwana naakwiita yiita mbika.
Nosho sha tsikile ngaaka. Kakekle kuule woomvula dhi li omulongo konima sho Eritrea sho a manguluka mo1993, opwa kala uutondwe wamememe pokati kiilongo mbika iyali.

Iita yopoongamba pokati ko1998 no2000 oya fala aantu 70,000 konakupila. Ashike ngashingeyi omayipumomumwe ngaka oga hulithwa po pambelewa. Iilongo mbika iyali otayi ka ninga omakwatathano gopaunadiplomate. Oondhila otadhi ka tameka okutuka pokati kiilandopangelo mbika iyali.

Sho omapandaanda goshilandopangelo shaEritrea ga li gu udha aantu taya hambelele omuleli gwaEthiopia, epulo lyontumba olya li lya holoka: Emangululo lye otali ka guma ngiini ombili ya mbushe miilonga, Isaias, ngoka ta lele shimwe shomiilongo muuyuni shoka shi na epangelo lyuukayamukulwa?

Onda tsakanena naIsaias nale moomvula dho1980 mekololo lyi li muule moondundu dhaEritrea sho a li omulelei gwongundu yaatongoli ko yaEritrea kuEthiopia. Ethimbo ndyoka okwa li tu ulikwa onga omuleli ependafule e li ompinge nepangelo lyaDerg moAddis Ababa ndyoka lya li lyi na eyambidhidho lyaSoviet Union. Isaias, ngoka e na oomvula 72, oku li ngashingeyi tu ulike ta lkele nokakulumbwati noku ihole mwene.

Ongomuleli gwaEritrea a manguluka, okwa lela mpoka aantu oyendji yoshilongo she ya thiga po oshilongo ompadhi ketako omolwa omahepeko gontumba nonkalo yeliko yaa na ontalelo ombwaanawa. Kwaamboka ya li ya gandja oolopota dhi na sha netembu mo2015, osha li tashi kumitha okumona nkene Aaeritrea oyendji ya li mokati kaamboka ya thiki kominkulofuta dhiilongo yaEurope nenge mboka ya li ya thiki ko kookamba dhomomuthitu moCalais.

Ayehe mboka nda li nda yi nayo moonkundathana oya li ya fatula nkene onkalo yawo yuumbanda moshilongo shoka hashi ithanwa omathimbo gamwe taku ti North Korea gwaAfrica ye ya hingi mo. – BBC Africa

LEAVE A REPLY

Please enter your comment!
Please enter your name here