MTC ta unganeke oshiindingili sha dhenga mbanda

0
36
Tim Ekandjo gwoMTC

Komutoolinkundana

Ehangano lyo MTC okwa tegelelwa lyi ka unganeke oshiindingili oshinene kaaku na we shoongalo tashi ithanwa 081Every1Fest moka taku ka tyapulwa sho ya andjagakaneke omakwatathano gawo ga adha oopelesenda ethele moshilongo ashihe.

Oshiindingili shika tashi ka kala ko momasiku 11 Aguste otashi ka wayiminwa kaahikingalo ngaashi Davido naRuntown yaNigeria, HeavyK na Busisiwa yaSouth Africa, naJah Prayzah gwaZimbabwe. Aahikingalo mbaka ya tseyika nawa muAfrica alihe otaya wayiminwa kaahikingalo Aanamibia ngaashi Gazza, omuhikingalo ndhingi mo2018 Kalux, Oteya, Adora, PDK, Afroberries osho wo 4×4 Too Much Power.
Tim Ekandjo gwoMTC okwa ti shika osho oshiindingili shotango sholudhi nduka moNamibia nokwa tegelela shi ka teye oombunda dhaamboka taya ka ya kusho.

“Nguka omusholondondo itaagu itaalwa, okokutya oshi li oshidhigu ashike otatu ke shi pondola. Inatu ninga mo oshiindingili oshinene muka okuza mo2015 sho twa li tu na Trey Songz, notu shi shi kutya Aanamiba oya kala ya tegelela shoka tashi landula ko.
Onda nyanyukwa sho tatu fala oshiindingili shika koKatutura noku shi ninga shi kale tashi vulu okuyiwa kukehe gumwe, sho tatu ka pula ashike N$25, ndjoka tayi eta yi kale osho oshiindingili shi na ombiliha mondjokonona yaAfrica. Inatu hala nando shi thige ko nando oye gumwe,” Ekandjo ta ti ngaaka.

“081EVERY1Fest oshituthi sha nuninwa okugandja omakwatho, nuutekete awuhe otawu ka gandjwa omagano komahangano ngoka taga gandja omakwatho, unene tuu kehangano lyoShack Dwellers Federation of Namibia lyi vule okukondjitha ompumbwe yomagumbo ndjoka ya palamena aantu yetu.

Otatu ipupula kombunda, onkene natu dhimbulukwe wo okugandja, onkene otandi kumike Aanamibia ayehe ye ye mengungo opo okapale ku udhe, oshoka N$25 dhoye otadhi yi dhu ukilila komakwatho taga ningilwa oshigwana.
Okwa popi kutya mokulanda uutekete uukwakugumwa, aantu otaya vulu wo natango okulanda okatekete ka gwedhwa po taka ithanwa “donation ticket” okuza koWebtickets moositola dhaPick n Pay, ngele oya hala okugandja omakwatho. Uutekete mbuka otawu kotha pokati kooN$20 nooN$ 10 000.

Shi ikwatelela kuMTC, uutekete otawu ka adhika koWeb Tickets moositola adhihe dhoPick n Pay nenge komalungula kepandja www.webtickets.com.na nomuntu gumwe ota ka landa ashike uutekete wu li 10 poshikando. Kape na uutekete tawu ka landithwa pokapale.
MTC ta kwashilipaleke wo aakwashigwana kutya egameno otali ka kala lya kola opo aaholoki koshituthi shika ya kale nombili yokomwenyo.

Kakele kaMTC, oshiindingili shika sho081EVERY1Fest osha yambidhidhwa wo kuAir Namibia, Standard Bank, BPI Technologies, NDTC, CSS Tactical Security Namibia, Mpepo Time Link, Otesa Civil Engineering, Worldmaster, Sure Ritz Travel naMy Namibia My Pride.

LEAVE A REPLY

Please enter your comment!
Please enter your name here