Nkene yuuvite kombinga yelundululo lyoofani uuna ya hokanwa

0
920
Oomeme oyendji mboka ya popi naKundana oye li ompinge nelundululo lyoofani, taya popi kutya ngele owa yi kofani yomusamane uuna wa hokanwa ohashi vulika wu kanithe aakwanezimo lyoye. Efano oku ulikitha ashike.

Victoria Kaapanda naMaria Namupala

ONDANGWA – Poompito odhindji uuna aakiintu yamwe ya hokanwa, oshigwana oshe shi tala ko shoopala okulundulula oofani dhaakintu mboka okuya kwaandhoka dhaasamane mboka ye ya hokana. Nonande aakiintu yamwe oye shi hokwa naakwashigwana yamwe, unene tuu aasamane, oonakuvala aakiintu mboka itaye shi popile, nakehe gumwe okomatompelo ge.

Oomeme oyendji mboka ya popi naKundana oye li ompinge nelundululo lyoofani, taya popi kutya ngele owa yi kofani yomusamane uuna wa hokanwa ohashi vulika wu kanithe aakwanezimo lyoye, unene mboka wa adhika inoo tseya nawa, taya popi kutya ohashi kala oshipu uuna to longitha ofani yaho.

Selma Angombe oku li omusita keithano ye ishewe omukiintu a hokanwa ngashingeyi uule woomvula mbali, nokwa tala ko elundululo ndika hali holoka kedhina lyomukiintu a hokanwa kaali li mondjila nomolwaashoka oshinima shika ite shi popile nande.
Angombe ta ti okulundulula ofani uuna omukiintu a hokanwa nashi kale ehogololo lyomukiintu ye mwene, nongele ina hala okulundulula ofani ite shi thiminikilwa, molwaashoka ye okuuvite kutya a lundulula inaa lundulula onkene owala e li omukulukadhi gwomusamane ngoka e mu hokana kapu na shoka tashi lunduluka.

Angombe ta ti momuthigululwakalo kamu na elunduluko lyoofani uuna aantu ya hokanwa, “ ngele oto tala onkalo nonziililo yookuku yetu, ito uvu nenge wu mone gumwe a lundulula ofani ye, kakele mbino iinima owala twe yi kutha kondje yiilongo notwa hala okweelekela aaEuropa nayalwe, onkene komatompelo ngoka itandi shi popile nande,” Angombe ta ti.

Pandjokonona yuuyuni, oshinima shokulundulula omadhina kwaakiintu osha tameke lwopomivo 1960 no 1961 lwaampoka sho kwa li kwa talika kutya omulumentu ta hokana, ota ka tungila omukiintu egumbo moka ta ka kala ta sile iipumbiwa ye ayihe ishimpwiyu. Okwa li kwa talika ko kutya molwaashoka omulumentu oye ta ka kala omusilishimpwiyu gwomukiintu nguka, oshi li owala mondjila ngele kehe shimwe shi li megumbo moka –mwa kwatelwa nomukiintu shi kale tashi ithanwa nedhina lyomulumentu.

Ashike shika inashi kalelela moEurope sho aakiintu ya thikama nokukondjitha opo ya kale nomadhina gaavali nogoohe. Yamwe pokati mpoka oya ke ya po noshinima shokutula okasinda pokati komadhina gawo nogaasaane yawo.

Julia Shihepo ngoka naye wo a lundululile edhina lye kofani yomusamane, naye oku na naanaa omadhilaadhilo ngangoka gomusita Angombe.
“Kandi wete okushendja edhina ku kale oshinima tashi dhengele. Aantu yamwe otwa za koofani hoka aakuluntu yetu ya li ye shiwike nawa, e tatu falwa komadhina ngoka kaage shiwike,” Shihepo ta popi ye ta yolo.

Ashike paushili, ngame onda lundulula edhina lyandje ndi na eyeme. Naasamane shino oya pumbwa oku shi uva ko. Itashi ti sho nda hokanwa nandi ekelehi edhina lyandje. Ngame ondi hole omusamane gwandje ihe itashi ti naakuluntu ye ondi ya hole opo ndi kuthe po nomadhina gawo.

Tse yamwe otwa valwa owala aakintu, paife omadhina gootate otaga ka yambulwa po koolye? Paife tate okwa fa owala inaa vala. Kashi li mondjila. Ngame ondi na shili edhina pokamutse kandje, ashike omwenyo gwandje inagu nyanyukwa.
Nghipondoka Kaula 58, ngoka okwa kala mondjokana uule woomvula 32, okwa popi kutya osha simana opo omukiintu a lundululile ofani ye ndjoka a kala ha longitha omanga ina hokanwa e yi lundulile kofani yomusamane gwe, nomatompelo kutya ngele omukiintu okwa hokonwa nena oya ninga omuntu gumwe naashihe oshi na okulundululwa shi ningwe shimwe okutameka kofani.

“Osha li sha nyanyudha ndje konima sho twa hokana nomuholike gwandje nofani yandje sho ya li ya lundulikile kofani yomusamane gwandje, oshoka ondu uvite lela kutya otwa ninga omuntu gumwe, nokezimo lyandje onda za ko onda ya kezimo lyomusamane gwandje”. Omuhokanwa ta gwedha po ngaaka.

Ta ti ngele okwa tsikile nofani yahe ngoka e mu vala ngele a hokanwa kuye okuwete a fa inaa taambwa ko nawa kezimo lyomusamane gwe, nokwa hala ngaa a kale ti imonikila kutya okwa hokanwa.
“Oshi li etumba kungame okulundulula ofani yandje okuya kuyomusamane gwandje konima sho twa hokana, ohandi kala aluhe ndu uvite nawa nosha pendje ombili yokomwenyo nomusamane gwandje, molwaashoka ngashingeyi otashi imonikila kutya onda hokanwa,” gulwe ta gwedha po ngaaka.

“Omanga inaatu hokana, onda kala nomusamane gwandje onga owala kuume kopaihole ethimbo ele noonkondo. Onda li nda vulwa nonda kala nda tegelela sigo itaandi vulu we, nda hala opo ndi ninge meme Titus,” osho Maria Titus a ti. Titus ta ti okuuvite okuhokanwa oko elago no ina hala nande okukala itaa ulike elago lye ndyoka.

Kundana okwa li woo a popi naamboka inaaya hokwana, mboka ya yelitha kutya inashi simana okulundulula ofani yoye uuna wa hokanwa, molwaashoka ye wete kutya oohe yuunona mboka ohaya kala ye wete ya dhinika, nopomathimbo ogendji ohashi eta omatumpakano momazimo gopaali.

Amushanga gongeleki ya-ELCIN Alpo Enkono okwa ti ekuthombinga lyongeleka mokulundulula oofani uuna aantu ya hokana, ehupi noonkondo molwaashoka oyi itaala kutya ohashi zi kehalo lyomuntu ye mwene, nongeleka itayi vulu okuthiminika aakiintu ya lundulule oofani dhawo.

“Okutala methimbo ndika oohe yaakiintu mboka haya lundulula oofani ohaya kala ye wete ya dhinika, nolundji yamwe ihaya popile oshinima shokulundulula oofani, nonande yamwe ye wete sha pumbiwa, oshinima oshi na okuza komuntu yemwene,” Enkono ta ti ngaaka.
Kashona KaMalulu naye okwa yi mo olunyala ta popi kutya okulundulula ofani oshinima kaashi na eputuko nande molwaashoka oku wete kutya osha za kaatiligane, ano Aawambo ya hala okweelekela omithigululwakalo dhaatiligane, shoka ta ti itashi shiwa nande.
“Okutala onakuziwa aantu oya kala haya ithanwa nomadhina goohe mboka ye ya vala oshiholelwa ngaashi GwaSimon, Gwaahango nosho tuu, ta ti elundululo lyofani halyo unene lya simana molwaashoka itashi vulika omuntu a hokane mumwayina, nongele mwa hokana kehe gumwe okuwete kutya owa hokanwa kuntumba nenge ino lundulula ofani yoye, onkene oshinima shoka ngame ondi li ompinge nasho,” KaMalulu ta popi ndhoka.

Ta gwedhapo kutya unene ngaashi muuyuni muka womahengathano ga lundalala, nogiindjipala, ngele omukiintu okwa lundulula ofani ye yi ye komusamane ee tapu ka holoka sha, ohashi kala oshidhigu nohashi pula ondjila onde okushuna kofani yahe ngo e mu vala, molwaashoka anuwa oku na okulundulula omadhina ngoka ge li muuthemba notashi kala ohoni onene moshigwana.

“Ngame mwene monkalamwenyo yandje itandi hala omumwandje ta lundulula ofani ye uuna a hokanwa, molwaashoka otandi talika ko ndafa omukatalume, ashike omumwandje okwa pumbwa okudhimbululwa kutya ogwandje uuna a tumbula edhina lyandje,onkene otashi yemateke okutala aahokanathani oyendji ya lundulula omadhina gawo, yo inaya landula omithigululwakalo dhawo shoka tashi ulike kutya oya taambako omalongo gaatiligane,” KaMalulu ta tsikile ko ngaaka.

Yamwe yomaasamane oya holola taya popile elundululo lyoofani dhaakulukadhi yawo uuna ya hokanwa kuyo, taya popi kutya ohashi kala oshinyanyudhi uuna omukulukadhi ti ithanwa nofani yomusamane, notashi ulike kutya oku na mwene.
Oyendji oya shendje omaukwatya nomauthemba gawo uuna ya hokanwa noku ya komadhina gaasamane, ashike yamwe ohaya ithanwa nomadhina gaasamane yawo nonande momauthemba gawo mu na omadhina goohe mboka ye ya vala.

LEAVE A REPLY

Please enter your comment!
Please enter your name here