Omakuluhala gongeleka naga pendulwepo nokundhindhilikwa – Mushelenga

0
64
Minista yomayambulepo goondoolopa nokomikunda Peya Mushelenga ta tula ongala keyendo ndyoka lyaaSoomi pOlukonda.

Maria Namupala

OSHIGAMBO – Minista yomayambulepo goondoolopa nokomikunda Peya Mushelenga okwa li a popitha iilyo yongerki ya-ELCIN, mbyoka yali ya gongala ehuliloshiwike lya piti pOshigambo noku dhana oshituthitumo, shoka hashi dhanwa omumvo kehe.
Mushelenga okwati ongeleka ya ELCIN, oya yambekwa molwaashoka oyina omakuluhala gopandjokonona, kakele ogendji gomuyo oga dhimbiwa no inaga ndhindhilikwa nande.

Okwa tothamo gamwe ngaashi ehala lyaNakambale tali adhika mOlukonda, omayendo mpoka pwa fumvikwa aasoomi oyendji, ehala lyOmandongo tali adhika mOnayena mpoka pwa thikila aasoomi sho yeya moNamibia, Oshipangelo shaNandjokwe shoka osho shotango shongeleka, po opo pwa kala hapu dheulwa aasita naapangi, oshowo kEngela na galwe ogendji ga tseyika nawa.

“Otashi yemateke unene okutala gamwe gomomahala ngoka geekelwahi, noga dhiniwa nonande ga longa onkandangala onene pethimbo lyonale, oga pumbwa okuyambulwapo opo woo nomapipi ngoka tage keya ga tseye kutya opwali omahala gontumba nogongandi, ngoka woo taga gwedhele kondjokonona yetu,” Mushelenga tati ngaaka.

Tati enenedhiladhilo lye okuyambulapo omahala ngoka, yo taya kwashilipaleke kutya ogoopalekwa, noku tseyithilwa aanona mboka opo taya putuka. Ta gwedhapo kutya uuna omahala ngoka goopalekwa noku yambulapo otaga kala taga nana aatalelipo yaza pondje yoshilongo, yo taya eta iiyemo moshilongo noku yambulapo eliko lyoshilongo.

Mushelenga okwa tothamo kutya oongeleka dhonale odhali dha tungwa nomavi nenge nomaloya, oshowo dha longwa miihenguti, nuuna omahala ngoka goopalekwa otaga eta woo niiyemo momagongalo ngoka gena omahala ngoka omakulu nogopandjokonona.

Ta popi kutya pethimbo taya putuka oya kala haya uvu omahala ngoka, kakele sho ya koko iha yega uvuwe molwaashoka gamwe gomuyo oga dhimbiwa nonande ga longa oshilonga sha simana pethimbo lyonale, okwa kala okagumbo kaakulukadhi/osemina yaakulukadhi ya kala kOkahao, moka mwa kala hamu nongekwa aakulukadhi momimvo dhoo 1962.

“Uuna omahala ngoka ga yambulwapo, ogebdji otaga ningwa oongulu dhiikulunima moka tamu kala tamu pungulwa ngaashi omaguyo gaambiisofi yonale, omaguyo gaasita, iitenga mbyoka ya kala hayi longithwa nale, niilongitho ayihe mbyoka tayi vulu okutalika, noku nana aatalelipo yo tayi longwa epipi lya nakanena,” ta popi ndhoka.

Minista tati natango okuli uuvithwa nayi okutala gamwe gomomayendo mpoka pwa fumvikwa aasoomi geli monkalo ya nyayika, ta indile aambiisofi,aasita naayakuli yalwe yongeleka ya kwashilipaleke kutya omahala ngoka oga ndhindhilikwa noku silwa oshimpiyu, go ga tonatelwe woo, molwaashoka uuna ga opalekwa otaga kala taga eta aatalelipo oyendji mboka taya etelele niiyemo moshilongo.
“Egongalo kehe linasha shopandjokonona nashi ndhindhilikwe sho shi longithwe mokweeta iiyemo megongalo, omayendo naga silwe oshimpwiyu, opo ga kale tagiimonikila, naku ningwe omapekapeko pomahala ga yooloka, noku gwedhela kondjokonona ya ELCIN,” ta tsikileko ngaaka.

Mushelenga esiku ndyoka okwali a tula ongala ku gamwe gomomayendo mpoka pwa pakwa aasomi taga adhika pOshigambo, nokwali a thindikilwa komuwilikimbisofi Nambala oshowo yamwe yomaasita, tati naya kutheko oshiholelwa oku talelapo omakuluhala ngoka.

LEAVE A REPLY

Please enter your comment!
Please enter your name here