Omolwashike oosipana dhAfrica dha li inaadhi shi enditha nawa kekopi lyuuyuni?

0
25
Oosipana dhAfrica odha li inaadhi shi enditha nawa kekopi lyuuyuni. Mefano Senegal okwa li a tameke nawa sho a dhenge Poland 2-1, moka kwa li a yambula po etimaumbwile lyoyendji kutya ote ke shi enditha nawa.

Wycliffe W. Njororai Simiyu

Kehe kethigathano lyekopi lyuuyuni okuza mo1986, osipana yimwe yaAfrica oya li ya thiki kedhingoloko etiyali mekopi lyuuyuni. Omuthika nguka ogwa li gwe ya pehulilo moRussia 2018, konima sho iilongo ayihe itano yaAfrica- Egypt, Tunisia, Morocco, Nigeria naSenegal ya li yu umbwa mo medhingoloko lyotango.

Opwa li pe na etimaumbwile lya kola sho ethigathano ndika hali holoka lumwe moomvula ne lya tameke, kutya Africa otashi vulika a ka tungile kuudhano we mo 2014 mboka wa li moBrazil, sho Nigeria naAlgeria ya li ya adha edhingoloko etiyali oshikando shotango.
Ashike, enenevi Africa, naayambidhidhi ye yokatanga kokoompadhi oya limbililwa kutya otashi vulika ngiini oosipana ndhika dhi na aadhani haya dhana pomuthika gwopombanda moEurope ya dhengwa iikando omu-10, tadhi dhana shi thike pamwe lwaali nokusindana shike iikando itatu konima yuudhano omu-15 moRussia.

Omushangi gumwe okwa li i ipula ngele eumbomo lyawo lyombala omupya ashike, nenge otaya kambadhala nokatanga kokoompadh? Ashike omikalo ndhoka oosipana ndhika dha Africa dha li dhu umbwa mo nago methigathano ndika odha li dhi ikalekelwa.

Egypt
Egypt okwa li a galukile mekopi lyuuyuni konima yoomvula 28. Oyendji oya li ye na einekelo muye, unene sho tuu a sindana po ekopi lyiigwana yaAfrica oshikando 7.

Ekopi lyuuyuni olya li tali opalele oku ulika oonkondo dhe, shotango osho shoka kutya oya li mongundu kayi shi naana ondhigu, noshitiyali, oya li ye na gumwe gwomaadhani dhingi Mohamed Salah.

Edhomoko lyaSalah ndyoka lya li lye mu kwata mpanga uudano mbuka wu na ko ashike omasiku omashona olya li lya dhana mo oshitopolwa, naadhani yalwe oya ndopa okuyelula ondondo yuudhano wawo ya thitike ombululu sho ya dhengwa kuUruguay muudhano wawo wotango.
Dhimbulukwa kutya Salah okwa li a dhana onkandangala muudhano waEgypt, moka a li a tula mo ookoola heyali, nokukwathela mbali mookoola omulongo ndhoka ya li ya tula mo pethimbo lyuudano womalolelo goku ya kekopi lyuuyuni, osho wo nomoRussia.
Oya galukile kegumbo ya za koRussia ya dhengwa uudhano wawo awuhe utatu.

Morocco
Morocco okwa li a tameke oshikonga shuudhano mbuka nokoola ndjoka a tulwa ku na owala ominute oonshona uudhano wu ze pondje.
Osha li epuko lye ya etele noonkondo nosipana ndjoka ya li taya vulu okudhenga, yo ye shi nale kutya Portugal naSpain oyo ya li ya landula ko.

Morocco okwa kondja lela tashi etitha omukumo muudhano wawo awuhe. Sho ya dhana nomanyakwa gaEurope Portugal, osipana oya li ya fuula nuudhano wawo wokuponoka, okupaathana etanga, osho wo okuendelela sho ya li taya kongo okoola eyalulo lyi thike pamwe. Ashike okutulwa ookoola mbala nenge kohugunina otashi vulu oku ku kanithitha uudhano, naMorrocco okwe shi ningwa aluhe lwaali.
Uudhano mboka wa li wa eta Morocco a dhane okatanga taka gwitha oyendji kiipundi uudhano wawo wa hugunina naSpain. Atlas Lions, ngaashi Morocco e shiwike nawa, okonyala ya dhenge Spain, ashike oya li natango ya tulwa okoola kominute dhahugunina ndhoka hadhi gwedhwa ko nosha eta eyalulo lyi hule 2-2.

Uudhano waMorocco, nawo owa eta naanaa omapulo ngaashi naanaa wiilongo iikwawo yaAfrica, moka hashi eta omapulo ge na sha nomikalo dhokudhana uuna ye li komeho nookoola nenge ye li konima nenge petameko lyuudhano nenge pehulilo.

Nigeria
Nigeria okwa li a ulike uunyakwa sho a li oshilongo shoka shi na uumatyona owundji kuudhano wekopi lyuuyuni, moka ya li ye na mo aadhani 18 inaaya dhana nando onale ekopi lyuuyuni.
Omupya gwawo, osipana ndjika yaamati aagundjuka oyi ilongo oshilongwa sho ashike ya li ye na ko ominute 4 ya ye kedhingoloko lya landula sho Argentina a tula mo okoola ndjoka ye ya umbu mo mekopi.
O-BBC oya li ya popi shoka sha popiwa komudheuli gwawo Gernot Rohr:
“Ondi wete kutya onakuyiwa oyaNigeria oshoka ope na uukwawowanankali, owa mona pomathimbo omadhigu kutya ombepo yaadhani oya li ngiini mokati kawo. Ashike Nigeria okwa futa ongunga yokutameka kashona muudhano mbuka, unene tuu muudhano wotango naCroatia.”

Senegal
Komeho guudhano mbuka onda li nda hogolola Nigeria naSenegal oyo ya kale ya longa nawa. Senegal okwa li a tameke nawa sho a dhenge Poland 2-1, moka kwa li a yambula po etimaumbwile lyoyendji kutya ote ke shi enditha nawa.
Ashike ekanitho lyiitsa sho ya dhana shi thike pamwe naJapan osha li she ya etele. Senegal okwa zi mo mekopi ndika pamukalo tagu yemateke, sho ya li ye na iitsa nookoola dhi thike pamwe naJapan, oya li ya zi mo oshoka oya li ye na uukalata owundji uushunga.

Tunisia
Tunisia okwe shi pondola okudhenga Panama. Ashike kaya li ya ulika taya vulu okuza mongundu ndjoka yi na England naBelgium.
Kapitiya gwosipana Wahbi Khazri okwa li i itaala kutya osipana yawo oya mono oonkatu sho ya dhana niilongo mbika iyali yaEurope.
Ngaashi Egypt, Morocco naNigeria, Cathage Eagles, ngaashi Tunisia a tseyika nawa, oya li ya kanitha uudhano wawo naEngland kominute dhahugunina ndhoka hadhi gwedhwa ko. Mumboka wa landula ko, Tunisia okwa li a dhengwa pwaa na ondjaalela kuBelgium 5-2.
Ehekeleko lyi li po olyo ashike ndika kutya Tunisia okwa thiga po uudhano wekopi ndika onga oye oshilongo shAfrica shi na ookoola odhindji, sho a tula mo ookoola 5 osho wo kutya okwa dhenga Panama.
• Wycliffe W. Njororai Simiyu omupolofesa gwuundjolowele nomadhewo koUnivesiti yaTexas.

LEAVE A REPLY

Please enter your comment!
Please enter your name here