Sophee a pititha oalbuma ye ontiyali

0
23

Maria Namupala

ONDANGWA– Omuhikingalo nomwiimbi gwoongalo Esther Sophee, Olyomakaya ga zi ko okwa pititha oalbuma ye ontiyali tayi ithanwa Guide Me Lord (Wilikandje Omuwa), oalbuma ndjika oya li ya tulwa miilonga Etitano sha ningilwa mOndangwa moka aantu oyendji ya li ya gongala nokuninga oombangi nooyihoyontali.

Sophee okwa yambukile momudhingoloko gwaNayena, nokwa kala e na ohokwe yokwiimba oongalo dhopambepo, omumvo gwa zi ko okwa li a pititha oalbuma ye yotango ndjono tayi ithanwa Rise Again.

Pauyemwene okwa yeliha kutya okwa kala e hole oondjimbo dhopambepo nopethimbo a li okanona okwa kala ha yi kosikola yOsoondaha ndjoka ye mu tsu omukumo opo a tameke okwiimba oondjimbo ndhoka e hole monkalamwenyo ye.
“Meputuko lyandje onda kala ndi hole oondjimbo dhopambepo, nonda kala nda hala ondjodhi yandje yi ninge yoshili, onda kala ndi hole okupulakena iihikomwa yomuhikingalo omuSouth Afrika Rebbeka Malope,” Sophee ta ti.

Okwa holola kutya nonande a kala e hole oongalo dhopambepo osha kala she mu nyenga oshoka ina kala e shi ondjila ndjoka e na okweenda , ye a wayimine ehangano lyaahikingalo Aanamibia.

Okwa ti etameko aluhe edhigu, noku yi okwa li a nana nuudhigu opo a pitithe oalbuma ye yotango.
Moalbuma ye omu na uungalo 12 awuhe wopambepo, nokwa ti owundji okwe wu hikila aakiintu mboka a ti oyo aanankondo moshigwana, molwaashoka ohaya tsakaneke omaudhigu ogendji mokukalamwenyo kwawo ashike ihaya sholola.

Wumwe womuungalo mboka tawu adhika moalbuma ndjoka ongaashi Omuwa tate, Twa teelela, The God I serve, na wulwe owundji.Sophee ta tsikileko kutya oongalo dhe otadhi hokitha nodhi na etumwalaka lyetsomukumo kwaayehe mboka ye na omitima dha gwa pevi.
“ Oongalo ohadhi pulakenwa nawa nomuntu oha kutha mo etumwalaka, pethimbo ndika oongalo odho oshinima sha simana muuyuni okupititha etumwalaka lyi ye nuuyuni awuhe, nonando opo nda tameke otandi kambadhala ndi kaleke po oshipewa noshitalenti shandje oshowo ohokwe yandje yoongalo noondjimbo dhopambepo,” ta ti ngaaka.

Oha imbi piituthi ya yooloka ngaashi yoongeleka, nopiituthi yomavalo pethimbo oalbuma ye ya piti Etitano okwa li woo a dhana oshituthivalo she.

Okwa pula kehe omuholi gwoongalo iimonene oka-CD moka tamu adhika oongalo dhe yo yi ipulakenene ko yoyene nokuuva etumwalaka ndyoka lyi li mo kaaye li uve we palwe.

Sophee ta pula aahikingalo mboka opo ta ye ya mowela kaya se uunye ihe ya pule komeho, ta ti kapu na oshilonga hashi longwa nuupu ashike eidhidhimiko olyo owala lya pumbiwa, nesindano aluhe okomeho to ke li adha.

Sophee ta ti sigo oompaka ina tsakaneka omashongo ngoka tage mu imbi okuya komeho noongalo dhe, okwa ti okwa tokola okupula komeho mewiliko lyOmushiti. Okwa pandula ookuume ke, omusamane gwe oshowo aakwanezimo mboka ya kala noku mu tsa omukumo,ta ti eitulemo lyomusamane gwe nalyo olye mu sitha oonkondo a tsikile nokwiimba oongalo ngaashi shi li oshilalakanenwa she.

LEAVE A REPLY

Please enter your comment!
Please enter your name here