Uundjugo tawu ka gandjwa mOshikoto noshowo moTobias Hainyeko

0
44
Omunambelewa omukuluntu melelo lyopashitopolwa shaOshikoto, Frans Enkali.

Obrien Simasiku naLoide Jason

OMUTHIYA/WINDHOEK – Epangelo ota li ka tunga no ku gandja uudjugo uupe mOshikoto, moka iikandjohololo ayihe omulongo nayime ta yi kamona uundjugo 110. Kehe oshikandjohogololwa ota shi kamona uundjugo omulongo. MoWindhoek, aakalimo yomoshikandjohogololo shaTobias Hainyeko, nuumvo oyo aanelago sho taya ka mona uundjugo wu vulithe pomilongo ne mboka wu li metifa okutungwa ngashingeyi notawu topolwa manga omumvo nguka inagu pwa ko. Omatungopo guundjugo ngaka ota ga ningwa opo Namibia avule oku dhengapo omikithi ndhoka hadhizilile mokwaana uuyogoki, ngaashi oHepatitis E, oCholera, noshotuu.

Omunambelewa omukuluntu melelo lyopashitopolwa shaOshikoto, Frans Enkali, okwalombwele Kundana kutya etungo lyuundjugo oli li oshinima shimwe sasimana noshemeendelelo moshitopolwa shaOshikoto. Okwa ti wo etungepo lyuundjugo olili pamulandu gwatulwa po kuPresidente Hage Geingob, kohi yoHarambee, opo pu tungwe uundjugo 50,000 momikunda adhihe moNamibia momumvo 2019.
Uundjugo womOshikoto ota wu katungwa noondola oomillijona N$2.

Kansela gwoshikandjohogololo shaTobias Hainyeko Christopher Likuwa okwa koleke onkundana ndjoka ta ti kutya elelo lyondoolopa yaWindhoek olya tokola opo lyi tunge uundjugo mboka wu li omilongo mbali moshikandjohogololo omo tuu moka nuumvo.
Ihe kansela okwa ti kutya epangelo lyaChina oku pitila mombelewa yomukalalipo gwawo moshilongo otali tungu woo uundjugo wu vulithe pomilongo mbali nawo tawu ka gandjwa omanga omumvo gwonuumvo inaagu ya pehulillo.

Ndhika Likuwa okwe dhi popi sho a li a yi moonkundathana naKundana momapulaapulo gwoshifo shoka oshiwike sha zi ko moshilandopangelo.

Likuwa okwa ti nonande oshikandjohogololo she oshi na aakalimo oyendji mboka ye li momahala ngoka kaage li pambelewa, oyendji yomaakwashigwana mbaka Likuwa okwa ti oye li popepi nuundjugo shoka tashi kwathele okukeelela woo okukala pomahala kaage na uundjolowele.

Omusimanekwa okwa hokolola kutya uundjugo mbuka itawu ka kala womuntu gumwe awike, ihe otawu ka longithithwa kaantu yopomukunda mpoka ye vulithe pugumwe.

“Ashike mboka ye na oonkalo dhi ilile ngaashi aanuulema otaya ka pewa ngaa uundjugo wawo yene ngaashi shi li omukalondjigilile moshitopolwa,” osho omusimanekwa a hokolola.

Ashike nguka okwa li a holola omadhilaadhilo ge kutya opu na euvitho lyonayi unene kaakwashigwana mboka ngashingeyi taya yonagula po omakwathao ngoka taga longelwa aakwashigwana.

Okwa ti kutya omwa li mwa tungwa uundjugo owundji moshitopolwa she shili ihe ngashingeyi uushona ashike wu li po tawu longo.
“Uundjugo owundji owa longelwa omuyonena kaakwashigwana, ngashingeyi itawu longo nonande owa li wa tulilwa po okulongithwa kwaamboka ye wu longela omuyonena,” osho omupiya gwoshigwana a hokolola ngaaka.

Likuwa okwa indile aakalimo mboka ya hulithe po okuyonagula uuwananwa mboka tawu etwa kuyo kepangelo, ta ti kutya itashi ka vulika epangelo lyi ete uuwanawa wa faathana pehala limwe kehe omumvo molwamboka taya yonagula noshi na ondilo ok pangelitha ooprojerka ndhoka ngaashi uundjugo.

Mushimwe sha yooloka kushoka ooshoka kutya oshikandjohogololo shika ngashingeyi oshi na, omeya noshinano oshileka shoka mboka kaye na omeya taya ende oometa oma-200.

“Ashike shoka nda hala okukundathana naKundana ooshoka kutya aantu yetu ngashingeyi itaya ende we iinano iileka oku ka teka omeya ihe naamboka taya ende oometa dha adha pomathele gaali oku ka teka omeya onkene ngaa taya ke shi hulitha po muule wethimbo efupi, sho ehum komemeho tali ende lya uka komeho,” osho Likuwa a fatulula ngaaka.

LEAVE A REPLY

Please enter your comment!
Please enter your name here