E ya kengelele, ee ta fadhuka po niimaliwa yotonamende

0
627
Okapale okape mOmuthiya oko ka ningi oshihakanwa shomufuthi sho a li a longitha edhina lyokapale okapeepeka okunana oosipana dhi kuthe ombinga.

Shipi Elago

OMUTHIYA – Okatanga kokoompadhi mOshikoto oke li ka kumithwa koshiningwanima moka omulumentu gwontumba a li a unganeke otonamende kayi shi yoshili mOmuthiya e ta fadhuka po niimaliwa yoosipana mbyoka yiishangitha nayo ye ina gandja we oshimaliwa shoka a li u uvanekela oosipana.

Omulumentu ngoka a tseyika owala nedhina Adolf, edhina ndyoka a longitha moombapila dhomahiyo okwa li a longitha uulingilingi wu li pondondo yopombanda nokwa li a dhenge oosipana dha thika po 22 iihwa pomeho ndhoka dha li dha kutha ombinga muudhano waafele ehuliloshiwike lya za ko mOmuthiya.

Uuyelele mboka wa li wa gandjwa komukwatakanithi gwuudhano wokatanga kokoompadhi mOshikoto Adreas Johanes pethimbo a li moonkundathana naKundana otawu holola kutya omulumentu nguka omukengeleledhi okwa li a longitha edhina lyehangano M and Z ndyoka hali landitha iiyenditho yomashete mOndangwa ta ti olyo tali kwashilipaleke uudhano mbuka noshimaliwa anuwa shi thike pooN$25 000.
Oosipana dha za koombinga noombinga odha li nduno dha mbombolokele kOmuthiya opo dhi ninge oshitopolwa shuudhano mbuka wa li wa talika koyendji onge uudhano uunene wokomumvo mOshikoto.

Otaku hokololwa kutya omulumentu nguka omukengeleledhi okwa li a pula osipana kehe yi fute oshimaliwa shomayishangitho shi thike pooN$900, noosipana dhi li 22 ndhoka dha li dhi ishangitha odha li dha eta po oshimaliwa shi thike poN$19800.
Oshimaliwa shika sho N$19800 osho nduno sha li sha fadhukwa po nasho kelume ndika efudhime noosipana odha li dha thigwa metelele opamwe nelelelo lya-NFA mOshikoto.

“Udhano mbuka owa li wa dhanwa Olyomakaya ashike mOsoodaha oosipana odha li dha kwatwa komalimbililo oshoka mboka taya unganeke uudhano mbuka nkene tuu ya tsuwilwe omeho pomayishangitho mOlyomakaya inaya monika po we pokapale, sho oosipana dha kwatwa komalimbililo otwa li twa ningi oonkambadhala okudhenga ongodhi ye, ashike kaya li mo mombepo , naasho twa li twe yi kambadhala iikando ya gwedhwa po otwa li twa mono kutya omulumentu nguka oshikengelela showala notwa li twa kutha etokolo opo uudhano mbuka wu ye pehulilo,”Adreas Johannes, omukwatakanithi gwokatanga kokoompadhi mOshikoto ta ti.

Okwa ti uukwatya womulumentu nguka kawu shiwike oshoka ke shi gwomoshitopolwa nokwa kala ashike ha ningi ekwatathano nayo mongodhi onkene oshidhigu okukonga omulumentu nguka ashike oonkambadhala odhi li metifa oku mu konga nando okwa ti okuniwe uumbanda kutya omulumentu nguka pamwe okwa longitha omadhina giihelele.

Kundana sho a li a konaakona ombaapila ndjoka ya li ya hiya oosipana kuudhano okwa li adhimbulula kutya ombapila oyi na edhina lyo-MZ ashike kalishi MZ Motors, omulumentu okwa longitha edhina lya-MZ inali ihwa po oshoka ndyoka a longitha itali ulike uukwatya waMZ Motors, ashike MZ cc Investment.

Oshinima oshitiyali ombapila kayi na oshihako nuukwatya tawu holola kutya oya za ko MZ Motors na ka yi na eshainokaha osho wo esiku kutya oya shangwa uunake, naashika oshi li tashi limbilike kutya omolwashike oosipana dhi na okuyamukula kehiyo lyombaapila ya tya ngaaka, ashike gwonale okwa tile she ku langela oshi na uunongo woku ku lya, ngoye dhengwa wu lungame.
Andreas okwa ti otaya longele kumwe nopolisi opo ya tule omufuthi nguka mongwedha ye a ka hokololithwe nawa koveta.

LEAVE A REPLY

Please enter your comment!
Please enter your name here