D-Naff omuhikingalo,omutungagumbo nomunambelewagwokoongamba

0
307
D-Naff, ngoka a shashwa Naftalie, nedhina lye lyu udha oNaftalie Shigwedha Amukwelele oku na uukwatya wa pumba oshoka oshi li sha pumba oku adha omuhikingalo ngoka wo e li omuuvithi. (Efano: MusicinAfrica)

Shipi Elago

ONGWEDIVA – Kapu na shidhigu ha nyenge mwene, okuninga shila we shi humbatekwa, D-Naff, ngoka edhina lye okuudha Naftalie Shigwedha Amukwelele okwa li a mangulula omutenge gwe gwesiku noku ya moonkundana naKundana kombinga yonkalamwenyo ye yokuhika oongalo, okukala omusamane a hokana e na oshinakugwanithwa shegumbo naanona, nosho wo omuniilonga gwepangelo.

“Okuhika oongalo oku li eyithano, omanga ondjokana oyi li oshinakugwanithwa shonkalamwenyo yo iilonga oyi li oshitopolwa shokuhola oshilongo shoye nokutula omboloto poshitaafula onkene oshi li sha simana okutopola ethimbo nawa opo ndaa ki iyadhe tandi li shimwe shomiinakugwanithwa mbika oshipungo,” D-Naff ta ti.

Okwa holola kutya kuye nando ayihe mbika itatu oya simana shoka hashi ya tango egumbo lye oshoka oha kambadhala okukaleka ombili nenyanyu megumbo lye esiku kehe, naashika ohashi mu pe ombepo yokutsakaneka omashongo gesiku kehe, ongele omiilonga nenge omokwiimba iihikomwa ye.

“Ngele otandi popi egumbo lyandje otandi popi omukulukadhi gwandje nuunona wandje, iilyo yegumbo lyandje mbika oya simana oshoka oyo hayi tsu ndje epepe mokulonga iilonga yandje noha muno neyitulemo oshoka oye li oonyothi dhongula kungame,” osho a popi neyitulomo.

Otwa li twa pula kutya ano D-Naff olye lela? “D-Naff omuhikingalo e na uungalo hawu landwa dhingi, omunandjungu meyithano lyiilonga yokoongamba, omuuvithi uuna e li mongeleka, omupopi nomutsimukumo gwaantu unene tu aanyasha.”

“Ondi na oonkalamwenyo mbali yimwe ohayi ithanwa D-Naff omanga onkwawo handi yi ithana Naftalie, Naftalie omuuvithi, omupopi nomugandjimayele, omanga D-Naff oye ngoka hamu mono ta hiki oongalo momapandaanda,” D Naff ta ti.

Okwa ti oku na uunona utano moka osheeli shi na oomvula 22 omanga onkelo yi na oomvula mbali. Okwa ti osheeli she oshi li sha mana nale neyilongo lyasho koUnivesiti yaCape Town.

Kepulo kutya uunona we ohawu dhana onkandangala yini monkalamwenyo ye yesiku kehe D-Naff okwa li a yamukula netumbulo limwe ta ti: “Oohiinina mbaka ohaya kwathele ndje opo ndi kale aluhe tandi ihumbata nawa meni nopondje yegumbo oshoka onda hala oku ya ulukila oshiholelwa oshiwanawa.”

“Onkalamwenyo yuuhikingalo nondjokana iinima iipuupuka oshoka ngele owa hokana nuumboloto nomashongo gawo ohawu kala kokule naashika ohashi kwathele okutunga po onakuyiwa yi li nawa paliko oshoka eliko ihali hanagulwa po miinima yaafele, oshoka yakwetu mboka inaya hokana oye na eshongo unene tuu lyoomeme oshoka kehe esiku otaya mono aantu aape ya hala oku ya moonkalamwenyo dhawo nota ya pula wo moondjato dhawo,” D-Naff ta tsikile.

Kombinga yiilonga mombelwa yomeni lyoshilongo nopoongamba, D-Naff okwa ti ngele oku li mombelewa nena oha shitukile molupe lwuunambelewa nongele okwe ku adha to yono oveta yi na sha nomataaguluko goongamba nena ote ku tula mongwedha pwaa na malimbililo oshoka iilonga mbyoka ohe yi longo mepathimo lyeho.

“Ito ti nokuli ongame ngu nda li tandi hiki oongalo ohela nenge ongame ngu nda li tandi uvitha mongeleka Osoondaha ya za ko.
Okwa ti oku li i ipyakidhgila noalbuma ye ompe ndjoka yi na iihikomwa yi li 16, aalanduli yoongalo oombwa dha kwata odheni oshoka kwa kalelelwa kuna sha ko kwaa ziwa ku na omulombo.

Okwa ti otaya ka ya mela lyondjila oku ya koBotswana hoka taya ka kutha ombinga methigathano lyoongalo moshilongo shoka omanga inaya galukila megumbo moka ye li taya kutha ombinga methigathano lyoGoma Awards.
“Onkene indeni kepandja lyandje lyoFacebook, Instagram nosho wo twitter opo mu hogolole iihikomwa yandje mbyoka yi li momathigathano ngaka,”D Naff ta tsikile.

D-Naff okwa valwa momasiku 1 Januali 1974 nokwa tamekele ookuhika oongalo muuyuni woomvula 1990-nasha sho a li kosikola yoJan Jonker moWindhoek, nongundu hayi ithanwa Glamour Boys. Momumvo 1998 ongundu ndjika yaamati oya li ya imbi moFrance, pethimbo lyuudhano wetanga lyokoompadhi wekopi lyuuyuni, ya li yi ithanwa noya futilwa kepangelo lyaFrance. D-Naff okwa sindana omapapa ogendji, ngashingeyi ga thika pugahetatu, mwa kwatelwa noNAMAs.

LEAVE A REPLY

Please enter your comment!
Please enter your name here