The Dogg a tseyitha Tate Buti oye omuhikingalo gwotango ta ka imba poshituthi she

0
1034
Tate Buti ngoka oye omuhikingalo gwotango a tseyithwa ta ka imba poshiindingili shaThe Dogg sha hugunina.  

Pinehas Nakaziko

WINDHOEK – Omuhikingalo omunene moshilongo gwedhina The Dogg, ngoka a li a tseyitha kutya ota ka ninga oshituhti she shahugunina moongalo muSepetemba 29 omvula ndjika okwa tseyitha Tate Buti oye gumwe gwomaahikingalo yotango mboka taya ka mwenyeka poshituthi she.

The Dogg okwa li a tseyitha uusiku wEtiyali lyoshiwike shaziko ta ti Tate Buti, ngoka e li ha imbi oongalo dhoKwasa, oye omuhikingalo ngoka ha nyanyudha nawa, noye omuhikingalo gwotango ta tseyitha poshiindingili shika. “Itandi vulu okutegelela okumona
Tate Buti te shi iningile mondambo,” The Dogg ta ti ngaaka.

Tate Buti okwa tegelelwa a ka imbe omaimbilo ge okuza moalbuma ye ompe yedhina Opena, moka mwa kwatelwa Eeno Mboli, Beer naInlove, ngoka haga inyenge nawa.

Oshituthi sha The Dogg shoka tashi ka ningilwa pokapale ketanga kaUnam, osha tengenekwa shi ka nane engathithi lyaatali ya adha 12 000, naThe Dogg okwa ti shika oshiindingili tashi ka eta po ombili pokati kaahikingalo aape naambaoka aakulu mehangano lyoongalo.
Oshiindingili she sha hugunina shoka sha li sha tseyithwa moshilongo omasiku hamale ga piti, osha landula sho The Dogg a li a tseyitha omvula ya zi ko kutya ye ita imbi we, nota ka tala ishewe moongeshefa dha yoolokathana. “Nando oongawo, okuninga oongalo otaku kala oshinima sha simana monkalamwenyo yandje ayihe, “ The Dogg ta ti ngaaka.

Okwa gwedha po ishewe ta ti, nuumvo ehangano lye lyoongalo, Mshasho Records olwa gwanitha oomvula 16, noshituthi shika otashi ka dhanenwa mumwe esiku ndyoka. 

The Dogg okwa li ishewe a pandula omahangano omakwawo moongalo sho ga kala nokukambadhala opo ga hedhidhe ehangano lyoongalo moshilongo pamuthika gwopombanda. “Natu tsikileni okutula uukuni kumwe, sigo ehangano lyoongalo lya thiki pondondo ndjoka yopombandanda,” The Dogg ta ti ngaaka.

Kakele kwaashoka, The Dogg okwa tseyitha ishewe tapu ka kala okatanga kokoompadhi, mpoka pe na ekopi tali ka kondjelwa.  Uutekete otau ka landithwa kombiliha okuza pooN$ 50.00 sigo 500. Omiyelo otadhi ka patuluka okuza po 11h00 sigo onakemufaalele. Oshiindingili oshi li ko 18 August 2018.

LEAVE A REPLY

Please enter your comment!
Please enter your name here