Ekondobolo la pita pomhalungushu …efyo laGurirab otali eta omahodi neimemesho

0
18

Ongano hai tewa kovakuluvonale vati: “shikondobolo a pita pomhalungushu a fiya po olweenya laye; omunenenhu a fya koilongo a fiya ko edina laye, otai talikila naanaa mefano longhalamwenyo nokudja po kwaTheo-Ben Gurirab.

Gurirab oye umwe womOvanamibia vanini ovo tava fiye ko eendjokonona davo tadi leshwa notadi ka leshwa komapupi nomapupi. Ondjokonona yaye ite i fiile ashike Ovanamibia, ashike ote i fiile ounyuni aushe.

Nonande a ya, Ovanamibia, unene ovanyasha ova pumbwa oku li longela ko sha konakudiwa yaGurirab nokonghalamwenyo yaye aishe. Molwoukwatya waye womuleli wombili, Gurirab ina kala ashike omuleli moshilongo, ashike okwa kala eli omukalelipo waNamibia nokoiwanahangano oko tashi ulike kutya oukalelipo waye oo, okwa kala e li ta ulike Namibia mefano nomoukwatya wombili ashike womunaendunge.

Pefimbo lekondjalomanguluko okwa kala a kalela po ongudu yoSwapo pondodo yopaiwana, nokwa li a longa ile a talika ko peemhito nheemhito onga oye ‘ewi laNamibia’.

Ovo ve mu shi nawa ohava popi kutya ngeenge osha nyika eenghundana domananafano, ino hala nande u ame kombinga oku hako ku na Gurirab. Okwa li eshi kupopya; ha popi oitwa, hei popi nengungumano ta udifa ko shili ovapwilikini.

Shimwe shomwaavo tashi dimbulukiwa nawa, osheshi a fiile ooPik Botha nosheendo shaye nomesho noipa ya tilyaana keenghundafana di na sha naNamibia da li koiwanahangano. Ohaku hololwa nghee a fiya Botha nomukalelipo waSouth Africa itava dulu nokupashika kohoni, shaashi okwa li eshi okupopya, ha popi oitwa neendjovo da fatuka shili.

Nokonima yemanguluko ina ninga ashike umwe womovatotipo vekotamhango ashike okwa ninga yoo umwe womovanhu ovo ve li ufa kekotamhango nokwa kala yoo oshiholelwa shaasho hashi popiwa kovatakumi kutya kala omuleli omunashiholelwa.
Ngeenge a pumbwa a ye mo olunyala a ete po ombili pokati kovanhu ile eengudu tadi li pumu mumwe, Gurirab okwa kala a talika ko onga ewi li talala lokuhanganifa noku eta ombili opo pe na ombili ya kana.

Vali, oye umwe womovanapolitika moshilongo ina popilwa onghalo yokulunga litapula, ile pamwe va longifa eenghono dooHashike shaLye.
Onghalamwenyo yomuleli ou oya pumbwa okutapwa ko nokuninga oshihopaenewa mokati kovanyasha Ovanamibia.

LEAVE A REPLY

Please enter your comment!
Please enter your name here