Gurirab okwa kwatela komeho esindano mondjokonona yaSwapo

0
27
Theo-Ben Gurirab, Omukokolipresidente Sam Nujoma nomupanguli omukuluntukuluntu gwaNamibia Peter Shivute taya ningathana omashendjo pethimbo ya li taya inika komilungu kombinga yiinima ya nika uunadipolomate pegumbo lyepangelo mo2014. (Omafano: Nampa)

Oshipopiwa shika shomukokolipresidente Sam Nujoma shoka a li a gandja poshitithivalo oshi-80 shaTheo-Ben Gurirab
momasiku 23 Januali 2018. Gurirab okwa hulitha mesiku 14 Juli moshipangelo moWindhoek.

Omukokolipresidente Sam Nujoma

Okupopya oshili, itatu vulu okupopya ondjokonona yesindano lyoSWAPO inaatu popya edhina Theo-Ben Gurirab, ongele shapo to kambadhala okulundulula ondjokononona. Okwa kala e na eitulemo yokufoloma po uunadiplomate nomakwatathano omawanawawa gopaigwana. Shoka ito vulu oku shi mu kutha. Omushangi omwaanawa, omupotokononi nomupopi a za onta ngoka e hole okulesha omambo.

Omolwa naana uukwatyya mbuka oSWAPO oya li ye mu kutha aninge omukalelipo gwayo kIigwanahangana nokonima onga omukalelipo ta kalelele okuza mo1972 sigo 1986 osho wo amushanga gwiikwapondje okuza mo 1986 sigo 1989. Okwa kala hailwa noku li sigo ongashiingeyi hailwa omwiinekelwa, omuntu ngoka nda li tandi vulu okwiinekelela iinakugwanitha noha eta iizemo mbyoka ya pumbiwa aluhe. Nomolwaashika onda li nde mu ulike onga ominista yetu yotango yiikwapondje konima yemanguluko osho wo konima onga omuprimaminista gwetu omutiyali.

Hailwa Gurirab okwa li i iyoolola onga omupopotokononi kamana nomunadipolomate dhingi mokukondjitha aakolonyeki mboka ya li ya kalelwa po kuChester Crooker nooyakwawo omanga aakondjelimanguluko yamwe ya kala nokuunganeka aantu yetu meni lyoshilongo noku lwitha omutondi nokakulumbwati.

Shafaathana, natu dhimbulukweni SWAPO sho a li a yelwaayelwa onga oye awike omukalelipo gwAanamibia. Shika oshe ya onga oshizemo shoonkondo dhongundu yetu ya kwatelwa komehokomupotokononi hailwa Gurirab.

Osha li wo komapepe gongundu yetu ya kwatelwa komeho kuHailwa Gurirab ndjoka ya kokitha omuthika gwoSWAPO papolotika nopaunadiplomate okuza onga omupulaapuli e li kondje yokapale sigo oponkatu ndjoka yokukala onga omukuthimbinga mokapale kopaigwana.
Omolwa uunongo we naamboka waakwaSwapo yalwe otwa li twa sindana okuunganeka uuyuni okupitila mIigwanahangana, Ongongahangano yiigwana yaAfrica, Frontline States, Nigeria osho wo iilongo mbyoka yaa na olwaamambinga nomahangano galwe ge li ompinge nokatongotongo.

Okupitila moonkondo ndhika, oSWAPO oya panga uukuume muuyuni awuhe mboka ye tu kwathela papoliika, paunadiplomate osho wo noonzo. Sha simana unene, Hailwa Gurirab okwa li a dhana onkandangala moonkundathana ndhoka dha vala etulomiilonga lyokatokolitho 435 kIigwanahangano mo1978.

Otashi ka pula ndje omasiku ndi mane okupopya kombinga yeyambidhidho lyaHailwa Gurirab kongundu yoSWAPO pethimbo lyekondjelomanguluko edhigu osho wo konima Namibia sho lya manguluka. Omolwa ethimbo, onda gandja owala yimwe yomiinenenima molweendo lwe lwopapolitika nolwopaudiplomate, mwa kwatelwa sho a kala wo omupopiliko gwEgumbo lyetu Lyomutumba Gwopashigwana.
Inatu dhimbwa kutya okwa li gumwe gwomaashangi yekotampango lyoshilongo nokwa li a kwatele komeho ongundu, pethimbo a li minista gwiikwapondje, ndjoka ya li ya inika kundathana nokupotokononona uule woomvula ndatu opo Walvis Bay osho woo uuntuntu wulwe wu li komunkulofuta wu galikile nowu ninge oshitopolwa shaNamibia.

Otandi ti we shike kombinga yolweendo lwe talu adhima; itaand ti owala hailwa owa longela oshilongo shoye nawa. Onkene owa li wa pewa oshishani sho shonzapo yoDoctor of Law koUnivesiti yaNamibia osho woo omapole galwe okuza kiilongo yopondje onga orecognition yuuleli woye tawu shambula moshikondo shiinima yopondje yoshilongo nuunadiplomate.
Aanambia, osho wo ongundu yoSWAPO oya pandula okukala ya likola mo uunongo mungoye, omayele osho wo ontseyo yoye yopolitika nuunadiplomate.

Ondi uvite uuntsa netumba molwa omalalakano goye nonkene tandi halele Aanamibia ayehe mopaife nomonakuyiwa yoye ya landule oshiholelwa shoye oshiwanawa.

Otandi ndopa moshinakugwanithwa shandje ngele inandi pandula ezimo lyaDr. Gurirab molwomayambidhidho gawo kekondjelomanguluko nokukala ofule, ndhoka ya ningi sho oshilongo sha li she mu pumbwa noonkondo.

Dr. Gurirab, onda hala okugandja omapandulo gandje komukwathi gwoye, hailwa Joan Guriras, ngoka a kala nangoye muupu nomuudhigu mwa kwatelwa ethimbo ndyoka twa li tatu ithanwa iikulo kepangelo lyokatongotongo. Onda lombwelwa pwaa na omalimbililo kutya meme Joan Guriras okwa tsakanene naTheo-Ben koshigongi shaanasikola shoSWAPO koHarlem osho woo kiigongi yilwe ya li ya unganekwa komahangano taga kondjele uuthemba waaluudhe moUnited States of America.

Pethimbo ndyoka, omupya omunene, oSWAPO kaya li naanaa ya tseyika nawa ngaashi o-ANC yaSouth Africa ndjoka ya li ya totwa mo1912.
Ashike inashi pula ethimbo ele unene opo ohapu yongundu yemangululo yoSWAPO yi tseyike okupitila ngaashi momupresidente gwoshilongo shika, Dr. Hage Geingob, Dr. Theo-Ben Gurirab osho wo Hidipo Hamutenya.

Onkene esindano lya hailwa Theo-Ben Gurirab olyo wo esindano lyahailwa Joan Guriras oshoka konima yomulumentu omunankondo kehe, oku na omukiintu omunankondo. Natango ishewe, tangi hailwa Joan Guriras.

LEAVE A REPLY

Please enter your comment!
Please enter your name here