I ipatana okanaku kombinga yoN$800 000 ya kana moFNB

0
163

Komutoolinkundana

OSHAKATI – Oshipotha shomuniilonga gwomombaanga ngoka ta tamanekelwa uufuthi woshimaliwa shi thike poN$800 000, osha undulilwa kuSeptemba hoka ta ka pangulwa.

George Shivute, 29, okwa li a lombwelwa ndhoka pethimboo a li a pewa a ifutile mo mondholongo noshimaliwa shi thike pooN$60 000. Shika osha landula sho a li a kwatwa po, kopolisi sho ta fekelwa kutya okwa yaka po ooN$800 000, iimaliwa mbyoka a li e na okukala a pakela meshina lyokunana iimaliwa (ATM).

Pethimbo a pewa ombooloha, Shivute okwa li a lombwelwa kaamonike mo mombaanga yoFNB mOshakati moka a li ha longele nenge pomudhingoloko gwehala ndyoka. Okwa li wo a pewa elombwelo opo a kale te ki ilopota kopolisi oshiwike kehe.
Omutamanekwa nguka a li ha longo onga oye omupakeli gwiimaliwa moka-ATM, mombaanga onene yaShakati ya-FNB okwa li i ikutha miilonga ye, konima sho a li a tseyithilwa kutya ope na omwaalu gu thike mpoka gwa kana, omanga ina lalekwa mo miilonga.

Shivute okwa li a holoka mompangulilo yaMangestalata mOshakati, komeho gwomupanguli Liwena Walter Mikiti nokwa li a hokololele ompangu kutya shoka tashi popiwa kutya okwa kutha iimaliwa yi thike mpoka ke shi shi nando, noita dhimbulukwa a li a pewa iimaliwa yondando yi thike mpoka esiku ndyoka lyo24 Apilili nuumvo oshoka oha longo niimaliwa kehe esiku.

Omweeti gwiihokolola gwepangelo Mpule Siyomunji okwa li a lombwele ompangu kutya omutamanekwa ita vulu okupewa a ifutile mo, oshoka oshipotha shaShivute oshinene, oshowo ota vulu a fadhuke po na ishewe oshigwana otashi shi tala ko oshinima shika sha puka. Nonande Siyomunji okwa li a leshele Shavuka ombapila ndjoka tayi kwashipaleka kutya Shivute oye a pakela mo iimaliwa mbyoka moka-ATM, omutamanekwa okwa li a lombwele ompangu kutya ke na shoka e shi kombinga yombapila ndjoka noshikaha shono sha shayina po kasha shi she nonando edhina olye.

Siyomunji okwa li a pula omutamanekwa kutya omolwashike i ikutha miilonga ngele haye a kutha po iimaliwa mbyoka, Shivute okwa ti shoka ita vulu oku shi yamukula ethimbo ndyoka.

Omupolisi ngoka ta ungwawunga noshipotha shaShivute, Penomwenyo Haitange Hamunyela okwa li ompinge negandjo lyeifutilemo ta ti uuyelele opo wu li owundji kutya Shivute oye a kutha po iimaliwa mbyoka, ye ishewe oku na ompito yokufadhuka po, oshoka sigo ongashiingeyi iimaliwa inayi monika.

Hamunyela ta ti otashi vulika Shivute a pungula iimaliwa mbyoka kiilongo yokondje opo ka monike kutya oye e yi na, na okuna elalakano opo ye e ke yi adhe nale.
Mikiti okwa li a undulile oshipotha, momasiku ga10 Sepetemba nuuvo opo a ka pangulwe.

LEAVE A REPLY

Please enter your comment!
Please enter your name here