Tatu dhimbulukwa hailwa Guririab….Olweendo lwaHailwa Theo-Ben Gurirab

0
170
Nakusa Theo-Ben Gurirab nomukulukadhi gwe Joan methano ndika lya li lya thanekwa muMaalitsa nuumvo pegumbo lyawo moWindhoek. (Efano: Enzo Janties/Vaultz)

Komutoolinkundana

WINDHOEK – Theophelus Benjamin Gurirab, ngoka a tseyika nawa onga Theo-Ben, a hulitha oondjenda dhe momasiku 14 Juli, okwa li a valwa momasiku 23 Januali 1939 moUsakos. Nakusa Gurirab okwa li ha popi ta ti oUsakos “okandoolopa oskashona kondjila yeshina lyokolutenda ke li ookilometa 142 muuzilo waSwakopmund.” Pethimbo lyeputuko lye, Usakos oya li oyo ondoolopa ndjoka ya kwatakanitha oondjila dhomashina gokolutenda moshilongo ashihe. Sho a li ta koko, okwa li e uvite kutya oha zi megulu, oshoka okwa li oshikando shimwe a lombwele omupulaapuli gumwe ngeyi: “kanda li nda tseya nani kutya ohe zi moshilandopangelo shokatongotongo kopalwaala.”
Aakalimo oya li ya topolwa shi ikolelela komalwaalwa giipa yawo, kasha li ashike pokati kaatiligane naaluudhe ashike osha li wo pokati kaaluudhe naaluudhe. Ashike Usakos pethimbo ndiyaka okwa li ehala ewanawa okuputukila. Omo nda tameka osikola yandje. Inaa fa aamwayina naamwayinagona oyendji, Gurirab okwa li gumwe gwomaanelago ngoka inaa litha naanaa oongombe nokulonga iilonga yomegumbo mbyoka ya li ya pumbwa okulongwa komikunda osho wo momalukalwa galwe ge li momudhingoloko gwaUsakos. “Onda li omunelago oshoka onda li nda mono elongo lyopetameko kosikola yaatumwa,” osho a tile momapulo gamwe a ningile naJean Krasno, ngoka a li a ningile Iigwanahano moNew York, 1999.

Gurirab okwa li a hiti osekundesikola ye mOkahandja nokwa li a tsikile ko a ki ilongele uulongi koAugustineum College mOkahandja. Omo muka Gurirab a ningi ekwatathano nombepo yopapolitika yopethimbo ndyoka. Petameko lyoomvula dho1950, unene tuu mo 1957 mpoka, aanapolitika oya li haye ya poAugustineum ya gandje ootundi dhopapolitika kaagundjuka. Omusamane a lala nale, Hendrick Witbooi, ngoka a li omupevipresidente gwoSWAPO pokati ko1984 no1997osho wo omupeviprimaminista gwotango pokati ko 1995 no 2004, ka li ashike omunasikola omukulu gwaAugustineum ashike okwa li wo omulongi moka nokwa li a a longo aanasikola opolitika.

Sho a piti onga omulongi okuza moAugustineum, Gurirab okwa li a yi koWalvis Bay moka a li a ka longela moofaambulika dhoohi moomvula dho1960, ta ti omolwa oofambulika dhoohi dha li anuwa hadhi futu iimaliwa oyindji shi vulithe shoka sha li hashi kwatwa kaalongisikola pethimbo ndiyaka. Okwa li a hala oshimaliwa opo a ki igwedhele ko kelongo lye koSouth Africa. Ashike opolitika oya li ye mu hiti nokwa ki iyadha ta yi muupongekwa mo1962. Okwa li a thigi po Namibia noombaapila dhaa shi dhoshili ndhoka a li a pewa kukuume ke ha longo mombelewa yamangestalata moWalvis Bay. Pombaapila okwa li po onga e ya kokaholo a za koNyasaland (shoka tashi ithanwa Malawi ngashingeyi) ngoka ta ka shuna kegumbo uuna ondhalate ya teka. Oya li ya thigi po oWalvis Bay neshina lyokolutenda noya hingi oshilongo ashihe, ya pitila moSouth Africa, okupitila moBotswanaland- Botswana ka li a manguluka pethimbo ndyoka, taya pitile moSouthern Rhodesia(Zimbabwe), taya piti moNorthern Rhodesia (Zambia), sigo okoTanganyika shoka tashi ithanwa Tanzania ngashingeyi.

MoDar Es Salaam, okwa li a mono ompito yeyambidhidho yoku ki ilonga koUS, nokwa li a a tsikile ondjila ye e ta yi koTemple Univesiti moPhiladelphia muJuni 1963. Ota dhimbulukwa kutya Oshiingilisa shawo osha li sha nkundipala onkene ya li ya pulwa yi ilonge elaka lyOshiingilisa osho wo omwaalu manga inaaya tameka nootundi dhothaathaa.

Okwa li a piti ookoosa ndhoka dhOshiingilisa nomwaalu e ta ka pita wo nonzapo yUunongononi Wopolitika nOmakwatathano Gwopaigwana.
Osha li pethimbo e li moUS sho oSWAPO ya li ye mu indile a ninge omukalelipo gwoSWAPO kiigwanahangana. Muule woomvula dhi vulithe 14 Gurirab okwa longo onga omunambelewa omukuluntu gwoSWAPO kIigwanahangana, okuza mo1972 sigo omo1986. Okupitila moonkondo dhe, Gurirab okwa li a ningi ekondjelomanguluko lyaantu yaNamibia lyi kale lyi na oonkondo momeho giigwana yilwe muuyuni. Oonkundathana ndhoka dha li dha vala okatokolitho kiigwanahangana, okatokolitho 435 (1978), hoka ka li ke na ondjilathaneko yokufala Namibia kemanguluko ooshinima shimwe shoka sha li she mu yelaayelitha mondjila ye yuunadipolomate.

Gurirab okwa li gumwe gwomaaleli yotango yoSwapo mboka ya li ya galukile kegumbo mo1989, ye ya okukwathela okulongekidha omahogololo.

Okwa li wo gumwe gwomaaleli yoSwapo mboka ya li ya kwatela kumwe oonkundathana dhokuhulitha po iita, neuvathanotsokumwe ndyoka olya li lya shainwa muMaalitsa 1989 pokati kepangelo lyaSouth Africa lyokatongo noSwapo, ndjoka ya li ya pala ondjila yomahogololo, eunganeko lyoUNTAG moNamibia osho wo okuya kemanguluko. Okwa thiga ko omuselekadhi Joan, ngoka a valelwa koAmerica, oyana osho wo aatekulu.

LEAVE A REPLY

Please enter your comment!
Please enter your name here