Wa yi mooyina momutumba gwopashigwana …Inaye shi pondola okupititha oveta yi na sha noombuto

0
85
Netumbo Nandi-Ndaitwah

Komutoolinkundana

WINDHOEK – Egumbo lyomutumba gwopashigwana olya li lya topoka pamadhilaadhilo mEtitatu lyoshiwike sha za ko sho kwa li taku tompathanwa ngele oveta ndjoka tayi ka pula aalandithi yoombuto nomiti dhokutsikwa ya kale yi ishangitha tanga manga inaaya pewa epitikilo lyokulanditha moshigwana nayi pite nenge nayi egekwe manga. Aatokoliveta oyendji, okuza kongundu yoSWAPO osho woo koongundu dhompilameno otaya ti kutya omusindalandu nguka otagu endelelekwa unene inaaku talika nawa kutya otagu ka guma ngiini aantu.

Minista yopevi yiiputudhilo yoshigwana Veikko Nekundi naminista gwopevi gwemona Natangwe Iithete, oya li ompinge noveta ndjika noya li ya ti kutya ovetathaneko ndjika otayi ka ya moshipala aanafaalama aashona naapindiki aashona ya landithe oombuto dhawo. Shika osha li sha kolekelwa kuminista gwuunamapya Alpheus !Naruseb ngoka a li a fatulula kutya aanafaalama otaya vulu okutsikila nokukuna oombuto dhawo dhoshito osho wo okumona oombuto okupitila mokutaambathana. “Ashike oombuto ndhoka kadhi li pamuthika gokukolekwa onkene itadhi vulu okushingithwa momangeshefelo onga oombuto,” !Naruseb ta ti ngaaka. Shika osha li sha eta Nekundi, aapitithiveta yalwe yoSWAPO nayalwe yoompilameno ya tse kumwe kutya ethaneko ndika inali pita lyi ninge oveta oshoka itali tala konkalo yaanafaalama aashona mboka ye li komikunda.

“Natu gandjeni uuwanawa kaantu oyendji, mboka yaa shi aanafaalama ye na elalakano lyokulanditha, ya ethwe ya shingithe oombuto dhawo,” Nguka ogwo omupopyo gwa kala tagu dhana onkandangala momutumba gwopashigwana.

Sho omutumba gwEtitatu gwa li gwa hulu komatango, aapitithiveta oya li ya tindi okupititha ethaneko ndika lyi ninge oveta. Aapitithiveta oya li taya popi yi itula mo kombinga yoshikalimo shethanekoveta ndika. Aatotiveta okuza koombinga adhihe mbali dhegumbo oya li ye li ompinge nuutopolwa wumwepo, taya ti otawu ka nayipaleka onkalo yaanafaalama aashona.

Ashike omundilo ogwa li gwa hwama sho minista guuyuuki Sakeus Shanghala nomupeviminista gwelongo, uunkulungu nomithigululwakalo Anna Nghipondoka ya li ya itaala kutya ethanekoveta ndika inali kwatela mo aathigona moshilongo. Oya li ya pula ethanekoveta lyi pitithwe ashike ko ku ka ningwe omalunduluko konima yethimbo. Ashike yakwawo oya li ya nukile pomutenya nokupula shi undulilwe komeho oshoka otashi ka nayipaleka onkalo yaathigona naanafaalama aashona yopomatala.

Oshilyo shegumbo ndika Bezuidenhout osha ti kutya ethanekoveta ndika otali kondjithilwa aantu na oli na okupitila momikanka dhi li mondjila manga inaali tompathanwa. Kavekotora ta ti oveta ndjika tayi thanekwa nayi ka pite manga megumbo lyopevi lyomutumba gwopashigwana. Kavekotora, ngoka e li ko-RDP okwa li wo a ponokele nomalaka omunashipundi kutya ota wilike pamukalo inaagu opala omatompathano ngaka.Ngaashi haku ti omukuluntu etungwa lya siikilila, omupevikuluntuminista Netumbo Nandi-Ndaitwah oye a li a kutha omasipa pokati koombwa noku eta ombepo yengungumano sho a ti molwaatotiveta mboka taya tsu kumwe kutya ope na iinima inaayi yela, iinima mbyoka nayi yelekwe tango manga oveta ndjika inaayi pitithwa. Opo ihe egumbo lya tokola okukaleka manga uutendo wumwepo nokupa minista Shanghala pamwe nookapyoko okuza kuuministeli wuunamapya ya ninge omalunduluko taga opalele.

Omupeviminista gwomayambulopo giinima yomuushayi nuumoondoolopa Sylvia Makgone okwa popi kutya ye ota yambidhidha noonkondo epopyo ndyoka oshoka aniwa shoka otashi gandja nokunkondopaleka ongushushu yuunamapya.

Magkone okwa popi kutya omusindalandu nguka ogwa taambwa ko noonkondo oshoka oombuto odho tadhi tula uuhupilo wuunamapya pondondo yopombanda yo aantu ya kale ye na iikulya ya gwana nawa.

Ota ti kutya shoka otashi holoka ashike nawa ngele oku kala pe na oombuto okwa talwa nawa oshoka ngashingeyi oombuto dhimwe otadhi landithwa ashike ihe itadhi ulike kutya odhi li mongundu yi thike peni na odho opalela evi linipo.

Shi ikwatelelwa koveta ompe ndjoka ya thanekwa, oongeshefa ndhoka tadhi ka landitha oombuto naandhoka tadhi ka longa niikunino tayi landitha oombuto koshigwana, otadhi ki ishangitha nokupewa tango nUuministeli wUunamapya. Oveta ndjika otayi ka pula wo aanamapya naanafaalama mboka haya longo oombuto tadhi landitha koshigwana nayo ya kale ya shangithwa. !Naruseb, okwa ti oveta ndjika yoombuto oyi li natango tayi longwa mo, notayi ka kalela po okugamena aanafaalama Aanamibia, osho wo oshikondo shuunafaalama koombuto dhi na ongushu yi li pevi.Otashi ka kwashilipaleka wo kutya oongeshefa itadhi ka landa omaludhi goombuto kadhi shiwike, osho wo omiti ndhoka tashi vulika dhi kale dha tulwa iilongitho yilwe yaashi yopaushitwe.

Edhilaadhilo olyo ndika kutya omuntu ngoka ta ka adhika ta teya oveta ndjika ompe ota vulu okupewa egeelo lyokufuta ooN$10 000 nenge ondholongo yuule woomwedhi inadhi konda 12, nenge a pewe egeelo lyofuto nondholongo.

Oveta natango inayi pita noyi li ashike ethaneko manga, oya pumbwa oku enda koshidhinditho shegumbo lyomutumba gwopashigwana.
!Naruseb ta fatulula kutya oveta otayi ka eta miilonga euliko lyoRegistrar of Seeds and Seed Variety, osho wo yeinyolitho lyaalandithi mosho wo aatulingushu yoombuto moshilongo.

Ngashingeyi kape na omaiyutho gokwiishangitha opo wu vule okulanditha oombuto moNamibia. !Naruseb ta ti shika osha eta uupyakadhi moka oombuto dhi na ongushu yi li pevi hadhi landithwa kaanafaalama, shoka hashi eta omangeshefelo ga nkundipala kumboka haya landitha oombuto dhi na ongushu shili moNamibia.

Ta fatulula kutya uuna oveta ndjika ya tulwa miilonga, otashi ka pula aalongi yoombuto naatulingushu yadho ya kale yi ishangitha opo ku kwashilipalekwe ongushu nokugamena aalandi ngele tashi ya koombuto dha yogoka, shoka tashi kakwathele okukeelela omikithi.Mboka ye na iikunino, taya landitha omiti, oye na okukala yi ishangitha ku kwashilipalekwe kutya iikunino yawo oya adha tuu omuthika gwontumba ngele tashi ya kiikwa niipangitho, omutungilo, uunongo wopautekenika nowaantu mboka taya tonatele oshikuninino. Mongashingeyi kehe ngoka a hala ota vulu okukala noshikunino she, nomu na uukunino owundji moshilongo.

LEAVE A REPLY

Please enter your comment!
Please enter your name here