Aakadhona ye li 2000 ya ya mendiki lyoDREAM

0
35
Aakadhona ye li momutumba gwendiki lyedhina DREAMS oshiwike sha zi ko. Endiki ndika olya li lya tulwa miitopolwa yaNamibia yi li itatu moka tali gandja nduno okakiti kiikelelitho yombuto yoHIV, noshowo omakwatho gamwe ge na sha nombuto ndjoka.

Loide Jason

WINDHOEK – Ombelewa yomukalelipo gwaAmerica moshilongo noshowo yakwawo yamwe oya tyapula ekuthombinga lyaakadhona ye li 2000 mendiki lyedhina DREAMS oshiwike sha zi ko. Endiki ndika olya li lya tulwa miitopolwa yaNamibia yi li itatu moka tali gandja nduno okakiti kiikelelitho yombuto yoHIV, noshowo omakwatho gamwe ge na sha nombuto ndjoka.

Iitopolwa mbika oyo nee Khomas moka mwa kwatelwa Ovenduka, noOshikoto, moka sha li tashi nyanyngidhilwa okuza mOmuthiya, Onandjokwe noshowo Tsumeb, noshitopolwa oshikwawo osha li Zambezi moka sha li tashi nyanyangidhilwa okuzilila moKatima mulilo.

Oprograma ndjoka ya popiwa pombanda oya li ya yambidhidhwa pashimaliwa kehangano ndyoka hali yambidhidha mboka haya lumbu nombuto PEPFAR noshowo okushunitha pevi eetaandelo lyombuto yoHIV maakadhona yepipi lyopokati opo ya kale kaye na ombuto nando.
Omukalelipo gwaAmerica moshilongo Lisa Johnson okwa hokolola kutya omapekaapeko otaga ulike kutya ongonga yetaandelitho lyombuto ndjoka oyi li pokati kaakadhona aashona naalumentu aanene.

Ano sho omulumentu omukuluntu e na ombuto ta yi miihole nomukadhona omushona ote mu thigile nduno ombuto ndjoka. Nena omugundjuka ngoka sho ta hulitha po ohole ndjoka onkene ngaa ta shuna okuya miihole naamboka yepipi lye e ta thigi po woo ombuto. Naanguka ngele inaya koshipangelo ee ta konaakonwa onkene ngaa ta tsikile nokutaandelitha ombuto ndjika maagundjuka ooyakwawo.
Johnson okwa ti kutya onkene nduno ongonga ndjika tayi nayipaleke onkalo yaagundjuka moshilongo noya pumbwa okuhulithwa po meendelelo ngaashi tashi vulika.

“Okuhulitha po shika aagundjuka aakiintu oya pumbwa eyambidhidho nomakumagidho ngoka taga kwathele mokushunitha pevi mboka taya vulu okukala ya kwatwa kombuto ndjoka lwotango,”osho omukalelipo gwAmerica a hokolola ngaaka moshinyolwapopiwa she shoka a li a tumine koshikundaneki shika oshiwike sha zi ko.

Onkene okwa ti sho osho nduno ngashingeyi ehangano ndika DREAM tali ya mo oshoka ohali gandja omakumagidho goonkondo sha pitila muundjolowele.

Okwa ti oshinima shika osha longa nuudhiginini oshoka oshindji ooshoka tashi longo mokukalamwenyo komuntu naashoka tashi holoka pomudhingoloko gwomuntu.

Johnson okw ati kutya ehuku lyoprograma ndjika okukala wa itayela mungoye mwene , mwaashoka wa hala okulalakanena, ta ti oku kala wu na eyinekelomwene kasha shi oshinima oshipu nando.

Nguka okwa faafanitha kutya miilongo ya adha pomulongo yi li menenevi lyaAfrica moka oprogramaa ndjika ya totwa noya tulwa miilonga ngashingeyi omu na egwo pevi lyomwaalu gwaagundjuka mboka taya kwatwa kombuto noopelesenda dhi li pokati ko 25-40.
“ Nena ndjika otatu tyapuleni aanona yaakadhona ye vulithe 1400 mboka ye li mendiki ndika moNamibia, notwa tegelela etamunuko mendiki ndika sigo okiitopolwa yi li itano,” osho a ngongo ko a ti ngaaka.

LEAVE A REPLY

Please enter your comment!
Please enter your name here