Aalandithi, ookalyamupombo naapolisi ya ningi za po ndi ye po mOkuryangava

0
1186
Gumwe gwomwaamboka ya li taya yaka sho aantu taya mbulukutithwa kopolisi.

Loide Jason

WINDHOEK – Iipenu okwa li tayi penuka sho aalandithi yomomapandaanda mboka haya landithile pehala lyedhina Stop n Shop mOkuryangava ya yandululwa kOpolisi yaMuni opo yaa landithile we mepandaandaa ndyoka.

Omanga mbaka taya mbolokota sho ya tila iinima yawo yi yiwe nawo kopolisi yo ookalyamupombo otaya ningi zapo ndi ye po moku ikuthila iinima yaamboka taya tilehi iitetene.

Manga inaali konda omuthitu pakuhokololela Kundana nkene oombudhi dha li dhe shi iningile yo aapolisi yomonanguwi mboka ya li ya thigala po sho mboka ya zala omuzalo ya yi, oya kwata po ombudhi yimwe ndjoka ya li ya adhika tayi yaka iinima yaamboka ye li mevundakano sho ya li mokumatuka.

Nguka okwa li a kwatwa nomilambo ndhoka woo dha li tadhi landithwa kwaamboka ya mbulukutithwa kopolisi pepandaandanda ndyoka. Okwa li a yi kodholongo koWanaheda.

Sho Kundana a ningi omapulaapulo komupopiliko gwopolisi ndjoka Superintendent Hilma Mpuka okwa li a pula a tuminwe omapulo opo a wape okuyamukuka shoka tashi pulwa shi na sha naashika.

Aakulupe naanyanyamagulu mboka ya tokola opo ya inyangele yoyene oya li ye li mondapo sho taya kambadhala okugamena omaliko gawo noshowo iilandithomwa yawo opo yaa hanagulwe po kopolisi ndjoka.

Shika osha ningwa mEtiyali lyoshiwike shika ongula pehala ndyoka lya tseyika nawa nedhina Stop n Shop mOkuryangava moKatutura mOvenduka.

Sho Kundana a thiki po pehala mpoka okwa adha nduno mboka woo ishewe taya kambadhala okushunitha po iinima yawo mbyoka ya li taya matuka nayo sho opolisi ya pilamene ko taya hokolola kutya ngele oya yi komagumbo nena oye na oku kalala taya dhengwa kuNakalwiidhi kaAlwenya.

Kundanda okwa mono aakulukadhi taya ihata po niilandithomwa yawo ya uka momatala ngoka ge li popepi nayo opo ya ka holeke iilandithomwa mbyoka ya pondola okuhumbata.

“Kemanya ku za woo oonsti ! Tse itatu vulu okukala ashike ngele twa kuthwa iinima yetu nenge twa pewa egeelo lyuutekete tse otatu ka lala! Otatu ka lya peni?” Ndika olya li lya zi mokana kagumwe gwomaalandithi ngoka a ihata po sho a punduka niinima ye ta popi ye ta hili omunwe gwe gwashingumbule ngoka ta ti ogwa ehama.

Mutima wu yole mwenyo ototi oto tula eyeme kwaamboka inaya hala ya ka yake oshoka oya hala oku ka inyangela.
Aalandithi mbaka oya lundile nduno opolisi yamuni kutya ohayi ya ashike tayi kutha po iinima yawo sho taya ke yi tala ko yo otaya futithwa.

Ashike ngashingeyi shika oya ti kutya kasha li mondjila oshoka otashi shunitha okwiinyangela kwawo pevi .
“ Tse sho taye ya mpaka otaya ti kutya natu ye momatala gaKuryangava moka mwa udha na itatu gwana mo ngashingeyi tse otatu ka landithila peni?” Gumwe osho a pula omanga a ngozimana ta pakele iinima ye mbyoka a tumbile opo a fadhuke po nayo kaayi yiwe nayo kaapolisi mboka.

Oya hokolola woo kutya ngashingeyi muni okwe ya lombwela ya ka landithile pokaClinic kaKuryangava ihe yo sho ya ningi onkambadhala okuya ko hoka iinima yawo okwa li ya yonukile ko oshoka kaku na lela omayendelo gaakwashigwana oyendji ngaashi pehala mpoka ye li taya landithile ngashingeyi.

“Ngame onda ninga onkambadhala okuya ko hoka uule womasiku ihe onda ninga omasiku tandi kanitha sho hasho elalakano. Onkene ngashingeyi out na okugalukila mpaka opo tu vule okumona po sha oshoka ope na oositola nomaendelo gaantu oyendji shi vulithe koshipangelo,” osho omulandithi gumwe woo a hokolola ye ta lengaalenga ta tala ngele aapolisi otaya galuka omanga ina pakulula iinima ye mepakete a wape oku landitha.

Ashike aashingithi mbaka oya li woo ya hokolola kutya shika ngashingeyi otashi pe ookalyamupombo ompito ya andjuka opo ya yake po iinima yawo omanga ye li mondapo.

“Ethimbo limwe sho ngaa tatu tameke okutondauka yo iimbudhi nayo otayi matuka niinima yetu, onkene nduno oshinima osha ninga ngaa nee ashike oshimbwilikita ,” osho ya hokolola ngaaka.

LEAVE A REPLY

Please enter your comment!
Please enter your name here