Iigwana yaAfrika otayi ulike ya hala okukwatha Western Sahara

0
25
Sahrawi Arab Democratic Republic okwa kala nokulwila emanguluko uule woomvula omilongo.

Liesl Louw-Vaudran

Western Sahara ngoka ta kondjelwa kuMorrocco, okwa palathana oongamba naMauritania kuumbugantu.
Onkene osha wapala kutya osha li komutumba omu-3 gwOngongahangano yaAfrica moshilandopangelo shaMauritania, Nouakchott moka omunashipundi gwOngongahangano yaAfrica Moussa Faki Mahamat kwa li kwa tegelelwa a gandje olopota ndjoka ya li ya silwa enota koyendji kombinga yoshitopolwa shoka.

Saharawi Arab Democratic Republic (SADR) okwa kala molwugodhi lwokumona emanguluko uule woomvula omilongo, nolopota oyi li mondjila yimwe netokolo lya ningilwe muJuli 2017 komitse dhiilongo yOngongahano yaAfrica.

Ashike omolwashike olopota ndjika ya simana noonkondo? Oshoka Ongongahangano yAfrica oya kala nokutompathana moshinima shika uule woomvula , unene tuu pethimbo lyaMorocco sho a li a oshilyo muJanuali 2017.

Oonkundathana dholopota ndjika komitse dhiilongo osho sha li oshikando shotango moka Ongongahangano yaAfrica tayi idhopo mo moshikumungu shika mewukililo, oshoka nale oya kala ashike noku pa Morocco uusama mokukolonyeka oshitopolwa shika.
Epititho lyolopota ndjika moNouakchott oye ya wo pethimbo moka iilongo yilwe muuyuni, unene tuu United States, tu ulike ekenyanano lye mokukandula po omakuyungutu ngoka ga kala ethimbo nuule moAfrica.

Omwedhi gwa za ko, etokolo lyoshikondo shegameno shIigwanahangana ndjoka ya li ya kwashilipalekwa ku-US oya li ya gandja etokolo omalolelomagololo moWestern Sahara ga ningwe muule woomwedhi hamano ndele kashi shi omvula yimwe ngaashi osho omukalondjigilile.
MINURSO oya kala nokukaleka ombili pokati kaMorocco noPolisario Front, ewawa lyahomata lyoSADR, uule woomvula 27. Ashike kape na endhindhiliko ndika natango kutya omalolelohogololo ngaka otaga ka ningwa.

Nonando pe na ethindilomo kaadhaninkandangala osho wo omupotokononi gwo-UN Horst Kohler ku monike ekandulopo tali valwa koonkundathana, oombinga adhihe mbali otadhi koleke nokukalela po oombinga dhawo.

SADR okwa hala emanguluko manga Morocco a ndjika oonyala mevi okupa Saharawi a ipangele kashona kohi yepandela lyaMorocco.
Morocco okwa hala wo edhanonkandangala lyaAlgeria mokuyambidhidha SADR lyi talike mukehe oonkundathana dhi na sha naWestern Sahara.
Omwedhi gwa za ko, president gwaSADR Brahim Ghali okwa li a sindana iitsa yopapolitika muumbugantu wAfrica sho a talele po iilongo ya yooloka moshitopolwa shika shAfrica, mwa kwatelwa Botswana, Namibia, Lesotho naSouth Africa, olweendo lwe olutiyali koshitopolwa muule woomvula mbali.

Okwa li a taambwa ko nomaako agehe komupresidente gwaSouth Africa Cyril Ramaphosa, ngoka kwa li kwa tegelelwa a ka tule omahilathano ngaka sho ta kambadhala okutunga omakwatathano gopaliko menenevi.

Aayambidhidhi yaWestern Sahara mongundu tayi pangele yoAfrican National Congress (ANC) onkene taya tsikile nokuyambbidhidha emanguluko lyoshitopolwa shika.

Shimwe shomiizemo yeyambidhidho ndika osha li etokolo lyaSouth Africa kaa yambidhidhe Morocco monkambadhala ye yokuunganeka ekopi lyuuyuni lyokatanga kokoompadhi lyomumvo 2026.

Omwa kala wo omapopyo ge li ompinge naMorocco ga yaga kegonga ge li kosocial media kaaSouth Africa.
SADR okwa li wo a dhenge mo Morocco okupitila mekwateko lyopokathimbo lyombautu yi na uushosho woludhi lwophosphate moAlgoa Bay omvula ya zi ko.

Oompangulilo dhaSouth Africa odha li dha tambula kutya ootona 55 000 dhophosphate odha li dha fulwa shaa li paveta moWestern Sahara, shoka shi li sha talika ko onga oshitopolwa itaashi ilele shoshene kuuyuni. Oya li ya gandja elombwelo opo oondongelwa ndhika dhongushu yoobiliona odhindji yi ninge po yoPolisario Front ye yi longithe ngaashi ya hinda.

Ashike nonando pe na omayambidhidho taga zi muumbugantu ngawo ga-SADR ge li koontundulu, Morocco naye wo okwa hitilila okukonga eyambidhidho lyokuninga etokolo tali kundathanwa.

Okwa fa a hulitha po omukalo gwe gu kenyaneka gwokuthiga po nenge okulyalyakaneka kehe oshigongo shopaigwana moka mu na aakuthimbinga okuza ko-SADR.

Omalyalyakaneko ngaka kaga li haga taambwa ko nawa kiilyo yongongahangano yaAfrica, mboka ya li ya taamba ko Morocco onga oshilyo shongongahangano yaAfrica oshi-55 omvula ya za ko.

Oshilongo shika osha fa wo sha tula konima manga edhilaadhilo lyokutidhitha mo SADR mongongahangano yaAfrica.
Morocco ota kutha ethimbo wo noonkondo kiilonga yaAU. MuJanuali omvula ndjika oshilongo osha li sha hogololwa onga oshilyo shongundu yokukaleka po ombili negameno nokuza mpoka okwa kala nokulwa a tula ombunda moshihwa ngele tashi ya kukuninga oonkundathana niilyo iikwawo, osho wo aatseyinawa opo ku nkondopekwe okangundu hoka.

Onkambadhala yaMorocco okuninga omalunduluko mokangundu kegameno oga nkondopekwa molwa iilongo oyindji yomiilongo omu-15 mbyoka yi li iilyo yoPSC inayitaamba ko-SADR.

Olopota yaFaki okwa tegelelwa yi ka tale omalunduluko agehe ngaka moshitopolwa notayi ka kotokela oku tya Morocco oshidhukudhuku, oshinima shoka tashi vulu okukala shi na oshilanduli oshiwinayi.

Pandjokonona, Aamorocco oya kala ya hangana meitaalo lyawo kutya Sahara ogwawo, nuuna aanambelewa aanene ye shi tompo, osha li hashi landulwa komahololodhilaadhilo momapandaanda.

Faki ita hala natango a kale momambo omawinayi gaSouth Africa nogaAlgeria, mboka oyo ye li aayambidhidhi dhingi ya-SADR yo oyo ye li natango yamwe mboka haya gandja oshindji moshiketha shongongahangano yaAfrica.

Okwa tegelelwa wo eyambidhidho enene tali zi komukolonyeki omukulu gwaMorroco, France, ngoka ta ka yambidhidha Morroco. Ekalopo lyomupresidente gwaFrance Emmanuel Macron pomutumba, a ka popye kombinga yoG5 Sahel Force yi li ompinge nuukulo moshitopolwa, otashi kala oshinima oshiwanawa kuMorrocco.

Ekwatathano pokati ka Morocco naAlgeria, ngoka ta yambidhidha oPolisario Front, osho nakupwe ngele tashi ya kelongelokumwe lyoArab Maghreb Union.

LEAVE A REPLY

Please enter your comment!
Please enter your name here