Jamaica ta ka kwathela Namibia a humithe komeho uudhano wokutondoka

0
13
Ominista yaJamaica yOmuthigululwakalo, Uukashikekookantu, Omainyanyudho Nomaudhano Olivia Grange nominista yaNamibia Yomaudhano, Aagundjuka nEyakulu lyoshigwana Erastus Uutoni oya Shaina euvathanotsokumwe kombinga yeyambulepo lyomaudhano. Ya thikama Omuprima gwaJamaica Andrew Holnes naPresident Hage Geingob

Komutoolinkundana

WINDHOEK – Namibia naJamaica oya shaina euvathanotsokumwe opo Jamaica a yambidhidhe Namibia a koke moshimpungu shuudhano woateletika. Euvathanotsokumwe olya li lya shainwa mOmaandaha goshiwike shika, lya shainwa koMinista yaJamaica yOmuthigululwakalo, Uukashikekookantu, Omainyanyudhu nOmaudhano, Olivia Grange oshowo ominista yaNAmibia yOmaudhano, Aagundjuka nomayakulo goshigwana Erastus Uutoni. Uutoni ta ti euvathano otali ka pitika Namibia a likole mo oshindji muunongo nontseyo yaJamaica moshimpungu shuudhano woateletika.

“Evathanotsokumwe ndika otali kwandjangele kiinima ya yooloka, moka mwa kwatelwa ehumithokomeho lyuunongo waatondoki yetu aashona osho wo mboka aakuluntu.Iilongo mbika iyali otayi ka paathana wo uunongo mokudhewula aatondoki naadhewuli poonkatu dha yooloka.Sha simana mpaka ngaashi osho sha shainwa okutumbula wo kutya iilongo iyali mbika otayi ka dhenga omuthindo ketonatelo ewananwa lyomawudhano, shoka shi li oshitopolwa shoka Namibia a pumbwa okuhula ko oongaku, onkene elongelokumwe ndika olya simana,” Uutoni ta fatulula.Euvathanotsokumwe ndika olya li lya shainwa montaneho yomuprima gwaJamaica, Andrew Holnes, naPresidente Hage Geingob. Holnes okwa li e li metalelopo lyopapangelo moNamibia lyuule womasiku ge li gatatu.Jamaica, oshilongo shoka shi na ashike aantu oomiliona 2,85 ashike osha simana noshi shiwike nokokadhila ngele tashi ya kokuzula aatondoki kamana muuyuni. Sigo oompaka, ngele tashi ya muudhano wokutondoka, Jamaica okwa sindana oomendalia dhoshingoli 42 muudhano woCommonwealth, 14 muudhano woWorld Championship osho wo oomendalia dhoshingoli 17 muudhano woOlympic. Uuyuni owu shi Usain Bolt ashike Jamaica oku na aatondoki oyendji, unene tuu aatondoki aakiintu mboka ye na oorecord dhuuyuni dha thikama konima sho ya tsilike oongaku, naamboka wo taya tsikile nokuteya po world records.

Natu kuthe nando oshiholelwa, nena oku na Shelly-Ann Frase-Pryce ngoka okuza momasiku 21 Juli oshiwike shika a kala nokuteya oorecord moEurope. Momasiku 21 gaJuli okwa li a sindana oLondon Diamond League. Fraser Pryce okwa omusindani gwoshingoli muudhano woOlympic moshinano shoometa 100 iikando iyali, nokwa li a palutha uudhano mbuka mo2017 oshoka okwa li e i ihumbata. Okwa li a sindana oLondon Diamond League muule woosekonde 10.98. Fraser-Pryce okwa li a a tseyika nokusimanekwa muudhano wOlympic Games sho a li e na oomvula 21, oye a ningi omukiintu gwotango okuza koCaribbean ta sindana oshingoli methigathano lyoometa 100 kuudhano woOlympic.

Mo2012, okwa li e shi pondola okugamena oshishani she shoometa 100, moka a li a ningi omukiintu omutitatu ta sindana ombandi yoshingoli moshinano shoometa 100 iikando iyali yi ilandula kuudhano woOlympic. Konima sho a sindana po oshikushu kuudhano woSummer Olympics mo2016, okwa ningi omukiintu gwotango mondjokonona okusindana ombandi moshinano shoometa ethele iikando itatu ya landulathana muudhano woOlympics. Fraser-Pryce okwa sindana oshingoli mo2009 IAAF World Championships, nokwa ningi omutondoki omukiintu omutiyali a kale e na oshisani shoOlympic noWorld Championship poshikando, konima sho sha li sha ningwa kuGail Devers gwaAmerica.Konima sho a li a sindana oshishani shoometa 100 muuyuni, Fraser-Pryce okwa ningi oye awike omukiintu muuyuni e na oshishani shoometa 100 iikando itatu, mo2009, 2013 no2015. Oye natango e li awike omukiintu a kala enyakwa muuyuni nomOlympic iikando ya yoolokathana. Shika osha li sha holoka sho a sindana oshingoli mo2008 koOlympic osho wo oshishani shuuyuni mo2009, osho wo natango 2012 Olympic no2009 World Championship, osho wo 2012 Olympic no2013 World Championship.

Mo2013 okwa ningi omukiintu gwotango omutondoki okusindana oombandi dhoshingoli moometa 100, oometa 200 nomoometa 4 × 100 methigathano limwe lyuuyuni. Fraser-Pryc okwa li natango omukiintu gwotango muuyuni okukala noshishani muuyuni shoIAAF moometata 60, 100, 200 nomo4 × 100 poshikando.

Merlene Joyce Ottey, ngoka e li omutine momusholondondo gwomanyakwa kaaku na we muudhano wokumatuna oometa dhi vule 60 hadhi matukilwa momuzile oku li omutiheyali mumusholondondo gwamatuki dhingi moometa dhi vule 100 nomutine moometa dhi vule omathele gaali. Oye dhingi muuyuni ngashingeyi muudhano gwokumatuka momuzile moometa 200, moka a tondoka oosekonde 21.87, ndjoka a li a tula po mo1993, manga a li inaa ka kalela po Slovenia okuza mo2002 sigo omo2012.

Ottey okwa sindana iishani yuuyuni iikando 14 noku na natango oombadhi oshindji kaaku na we muudhano hawu dhanwa koohandimwe, dhi li 10.

LEAVE A REPLY

Please enter your comment!
Please enter your name here