Onankali nOmusati oyo omanyakwa muudhano waNANTU

0
47
Onankali Circuit pethimbo ya li ya mbendekwa ekopi noombandi dhoshingoli muudhano waalongisikola Osoondaha ya za ko mOshakati.

Shipi Elago

OSHAKATI – Osipana yokatanga kokoompadhi yoshikandjolongo Onankali oyo enyakwa epe muudhano waalongisikola monooli mboka hawu unganekwa aluhe kehangano lyoNANTU.

Onankali ndjoka ya li ye ya muudhano mbuka kayi na edhina oya li ya dhenge mo oshikandjolongo shaElim muudhano wahugunina mboka wa li wa dhanwa ongulohi yOsoondaha ya za ko mOshakati.

Oosipana ndhika odha li dha ulike oshiviha shi thike pamwe unene tuu medhingoloko lyotango moka kehe osipana ya li tayi dhana nuukeka naka pwa li ngoka a li a hala okutulwa okoola tango.

Elim okwa li a tameke ta ponoka kominute dhahugunina dhedhingoloko lyotango ashike omukwati gwOnankali mokoola okwa li mo a lungundja shokambishi nokwa li a kwata mo kehe etanga a li a thangelwa, naashika osha li sha eta eyalulo lyi kale 0-0 okuya pokafudhepo.Edhingoloko etiyali Shipanga okwa li ta nyenge Nangolo oshoka natango olya li lya lemba nondjendi, ashike oonkambadhala adhihe dha li dha ningwa kiikondo mbika iyali yelongo odha li dha huulile muunyengwi neyalulo lyahugunina olya li 0-0 nuutoto owo ashike wa li wu na okukutha omasipa pokati koombwa.

Onankali oya li ya pondola okudhenga Elim noopelenti 4-2, nokuyakula po ekopi lyaNANTU , okapandi ko N$5000, nosho wo oombandi dhoshingoli.

Elim okwa li a hakele pehala etiyali moka a li a pandulwa nokapandi ko N$3000, nosho wo oombandi dhoshisiliveli.
Muudhano wokatanga komokambamba Omusati Educational Directorate ogwo gwa li gwa yawuka mo niitsa oyindji yi vule oosipana dhilwe niikandjolongo onkene ogwo gwa li gwa sindana po ekopi ndika nando ogwa li gwa pitile meyulu lyonane oshoka Oshakti Circuit oya li ye yendjamo ya fa epeya.

Osipana yOmusati oya li ya toola po okapandi N$3000, ekopi osho wo oombandi dhoshingoli, Oshakati Circuit osha li sha toola po ehala etiyali ndyoka lya li lya tentekwa N$2000, noombandi dhoshisiliveli.

Uudhano mbuka owu li uutimugoyi ngashingeyi tawu unganekwa kuNANTU nowa li wa nana iikandjolongo 34 ya za mOshana, Oshikoto ,Ohangwena, Omusati noKavango West.

Ogongo Circuit oyo ya li ya sindana po uudhano wokatanga kokoompadhi omvula ya za ko omanga Etayi Circuit oye a li a sindana po uudhano woNetball.

LEAVE A REPLY

Please enter your comment!
Please enter your name here