Outjo Football Academy ya sindana po oliha moKunene

0
19
Outjo Football Academy ndjoka yi li enyakwa lyaKunene moliha yoSecond Division.

Shipi Elago

ONGWDIVA – Nando oliha yoSecond Division yaKunene yi na omawudhano gaali opo yi thike pehulilo, Outjo Football Academy oyi li nale ya yakula po oliha ndjika na kapu na ngoka ta vulu oku adha mo shila otashi ka pula iinyengandunge.
Outjo Football Academy oya li ya likola iitsa ine ehuliloshiwike lya za ko, konima sho ya li ya dhana shi thike pamwe mOlyomakaya noPubs FC 1-1 mOutjo nomOsoondaha oya li ya hanagula po osipana yaBetlehem Boys FC 4-1 nesindano ndika olya li lye ya tula pombanda yoshitaafula niitsa otutututu na kapu na ngoka ta vulu okutidha mo.

Ehuliloshiwike lya za ko ontsi oya li ya tsima mOutjo naKaukuejo moka oosipana dholiha ndijika dha li tadhi nukathana omanga oliha inayi fumbika onkolo ehuliloshiwike ndika sho osipana kehe yi li ashike ya thiga ko uudhano uyali kehe yimwe.
Betlehem Boys okwa li a dhenge Greend Danger 4-1 mOlyomakaya ga z ako omanga Sixty Eleven a li i ithigi othika 1-1 naKunene Nampol, Pubs FC okwa li i ithigi othika 1-1 nOutjo Football Academy.

MOlyomakaya kOkaukuejo Young Eagles okwa li a hanagula po Robber Chanties 6-1, omanga Etosha United lya li lya dhenge mo Gariseb Orlando Pirates 1-0.

MOsoondaha mOutjo Black Africa Warriors ndjoka ya li ya gu moliha yoFirst Division oya li ya dhana shi thike pamwe naKunene Nampol omanga Pubs FC okwa li a hanagula po Green Danger 4-1.
Betlehem Boys okwa li a dhengwa kOutjo Football Academy 4-1.

kOkaukuejo mOsoondaha Young Eagles okwa li a dhenge Gariseb Oraldo Pirates 5-2, omanga Etosha United olya li lya sitha Robber Chanties ohoni nookoola 10-0.

Oliha yaKunene otayi ka fumbika onkolo ehuliloshiwike moka oosipana dhoka dhi li pombanda tadhi ka dhana ashike opo ya gwanithe po oompango, ashike ndhoka dhi li pevi otadhi ka kala tadhi matuka dha fa dhi na oonkwengu opo dhi kaleke po omahala gadho moliha oshoka ndhoka tadhi ka iyadha dha kuutumba pomahala gatatu gahugunina pevi lyoshitaafula sholiha otadhi ka pewa okangola.

Oshitopolwa shaKunene ohashi tumu oosipana dhawo ndhoka tadhi sindana oliha yoSecond Division koliha yoNorth West First Division ndjoka hayi dhanwa koosipana dha za mOshana, Omusati nOtjozondjupa, onkene Outjo Football Academy oyi na ompito okudhana moliha ndjika omvula tu uka yokatanga kokoompadhi nonando oyi na oku ya komalolelo opo hoka tayi ka tsakanena noosipana ndhoka dha sindana ooliha miitopolwa ya zi nokutumbulwa metetekelo.

LEAVE A REPLY

Please enter your comment!
Please enter your name here