Venaani a gandja N$10 000 opo aalongwa pEmanya ya pite nuumvo

0
410
Omuleli gwongundu yompilameno yopambelewa mOmutumba Gwopashigwana, yoPopular Democratic Movement McHenry Venaani (kolulyo), e li nomukuluntusikola gwEmanya Senior Secondary School Malakia Iileka taya talaatala momuhandjo gwaamati pamwe nomukuluntu gwelongo moshitopolwa shaShikoto Lamek Kafidi e li konima.

Obrien Simasiku naMaria Namupala

ONYAANYA – Omuleli gwongundu yompilameno yopambelewa mOmutumba Gwopashigwana, yoPopular Democratic Movement (PDM), McHenry Venaani okwa gandja oshimaliwa shooN$10 000 kosikola yEmanya konima sho a li e yi talele po mEtiyali lyoshiwike shika. Venaani okwa ti oshimaliwa oshaanasikola, shi vule okuyambdidhidha osikola yi longe uunona wupite nawa nuumvo. Emanya osikola yimwe ndjoka ya li inaayi shi enditha nawa momakonaakono gondondo onti-12 omumvo gwa yi. Aanona ayehe mboka ya li mondondo onti-12 posikola mpoka oya li ya dopa omvula ya ziko.

“Otandi kala nda ligamena ko omeho sigo onkalo tayi lunduluka. Omvula kehe natu totheni mo oosikola ndhoka inaadhi longa nawa opo dhi vulwe okuyambidhidhwa, onkene otandi indile aanangeshefa yetu ye ye mondambo noku kwathela nokashona hoka ye nap o,” Venaani ta ti konima sho a gandja oshimaliwa.

Osho sha li oshikando shotango osikola ndjika ya shangitha ekonaakono lyondondo 12, konima sho ya li ya tsikwa onkatu yosekundosikola yopombanda. Venaani okwa li a hala okuuva kutya oshike she etitha uunkundi wiizemo, osho wo okuuva nkene omathaneko ge li okulundulula onkalo ndjoka.

Omukuluntusikola posikola mpaka Malakia Iileka okwa ti oshinima shoka unene sha ndopitha aanona olangu ngeyi okwaahe na omikalo mokati kwaanona kwa vuka, osho wo uunkundi welaka lyOshiingilsa. Ta gwedha ko wo kutya aanona oyendji oyo mboka ya li inaaya halika koosikola oonkwawo.

“Mbaka aalongwa aankundi nonando twa kambadhala oku ya kwathela, noshinima shimwe twa dhimbulula sha puka osho shika kutya oya shangela oshiingilisa konkatu yoExtended, ndjoka twa dhimbulula kutya oyi ya li pombanda. Osha li ashike mOshiingilisa moka ya li ya longo iilonga ya nkundipala, ashike oya pita iilongwa yilwe, aalongi yandje ohaya longo neitulemo nondi na eyinekelo muyo. Omvula ndjika open a okuholoka elunduluko enene,” iileka ta kwashilipaleke.

Yamwe yomaavali yaanona mboka haya hiti osikola pEmanya ka ya li ya hala Venaani atalelepo osikola. Venaani okwa ali apewa epitikilo opo a talelepo osikola ndjoka pamukanda gwa shangwa kuKatrina Hanse-Himarwa, o Minista yElongo, Uunkulungu nOohedhi opamwe nombelewa yomukuluntu gwelongo moshitopolwa sha Oshikoto.

Ashike aavali oyali ya gongala oontundumene dhomaandaha, oshiike shika, taya pula opo etalelepo ndyoka li kalekwe, moshipopiwa shoka sha leshwa peha lyaavali komunashipundi gwelelonongelo Elias Ambambi, ogwa thamuna kutya ndika halyo ethimbo ewanawa lyokutalelapo molwaashoka aanona oyiitsakidhila nomakonakono gawo.

“Tse otwa tseyithilwa oshinima shika muule womasiku omafupi elela, otatu shi yeleke mpaka kutya katuli ompinge na kehe omuntu teya a popithe aanona yetu kakele nashi ningwe pamukalo omwaanawa, dho omilandu ndhoka dhina okulandulwa nadhi kale dha landulwa,” osho ya popile ngaaka Omaandaha.

Oyali woo ye wete kutya oshali sha simana opo aavali ya pulwe yo ya gandje esiku ndyoka lyoopala okupopitha aanona, noye wete kutya naya itsakidhile manga nomakonakono, yo taya popithwa nale.

Nonande aavali yali ya ndjike oonyala mevi omuleli gongundu ndjoka okwali a thingi ongula yetiyali lyoshiwike shika posikola mpoka, nokwali a tsakanene nomukuluntuskola, iilyo yetonatelo nongelo, omukuluntu gwelongo moshikoto na yamwe yomaalongi.
“Ngame mwene etalelepo lyandje olyopambili, nokali nasha nopolitika, ondahala opo aanona yetu ya kondekwe kiikondo ya yooloka, opo woo iizemo mbyoka ya konekwa ya nkundipala, yi hwepopekwe,” Venaani tati ngaaka.

Okwali a pula aalongi omukalo ngoka haya longitha nkuuvaneke taka longa ngaashi tashi vulika opo aanona ya kale yeshi shoka taya lalakanene, tati okwali a thaneke a ka popithe osikola ndjoka dhingi moshilongo ashihe yo ST Bonface, oshowo ndjoka yEmanya sho inaayi pititha nande okanona kamwe omumvo gwaziko mekonakono lyondondo onti12.

Venaani ta ti oku na uupyakadhi nuuministeli mboka tawu longitha iimaliwa pambambo, ano peha lyokutala nkene tawu vulu okutunga po oongulu dhopakathimbo, ohawu ka tunga ashike oongulu koosikola dhimwe, omanga oonkwawo dha palamena uudhigu woongulu dhokulongelwa.
“Otatu nana nondatu ngele tashi ya keliko lyoshilongo, ashike natango oto adha uuministeli welongo tawu longitha oshimaliwa sha adha poomiliona N$25 omanga pen a iinima yilwe moshikondo shika mbyoka ya yaga kegonga.

Otaya vulu okulongitha iitungithi yilwe mbyoka yin a ombiliha okutungitha ashike ohayi kala ethimbo eleka, tse natango out na oosikola ndhoka dhaa na iikwa niipangitho.” Venaani ta ti nomuthindo.

“Itatu vulu okukala tatu longitha oshindji manga tu na okashona, ethimbo olya thikana muuministeli wu tule miilonga elongitho lyoshimaliwa lyopaendunge,” Osho a tsikile ko.

LEAVE A REPLY

Please enter your comment!
Please enter your name here