Ya dheulilwa okulonga oondjema niilikolomwa yomomapya

0
80
Yamwe mboka ya li ya kutha ombinga momadheulo mOnayena oshiwike sha zi ko.

Maria Namupala

ONDANGWA – Konyala aanaafaalama taya ihilile po60 ya za momikunda dha yooloka moshikandjohogololo Onayena oya pewa omadheulo ga nkene ye na okulonga oondjema ndhoka hadhi gwayekwa ngaashi koomboloto oshowo kiikwiila, tashi pitile miilikolmwa yomomapya.
Omadheulo ngoka oga li ga ningwa mekwatelokomeho lyombelewa yUuministeli wUunamapya, Omeya nOmithitu,naadheuli yamwe oya za mOnayena nayamwe ya zi kOkashana.

Omunambelewa muuministeli mboka Esther Namushinga okwa yelitha kutya shika osho oshikando shotango taya unganeke omadheulo ngoka “Oshilalakanenwa shetu otwa hala opo tu hepululepo iilikolomwa yetu yomomapya, oshowo oku yi tula ongushu yi vule okulongithwa woo iinima yilwe,” Namushinga ta popi ndhoka.

Yimwe yomiilikolomwa mbyoka ya longitha ongaashi omanuwa,,omatama, iihenda, omanyangwa, oombe, oonkwiyu, naayihe mbyoka hayi kunwa momapya, omikunda dha kutha ombinga odho Elombe, Enkolo, Oniimwandi, Ompugulu, Ethindi, Onakandi, Iihongo nOnanyege.
“Molwaashoka shika osho oshikando shetu shotango tatu unganeke omadheulo ngaka otwa li twa tala owala ombinga nkene ondjema hayi longwa okuza miilikolomwa mbyoka, otandi pandula ooyene yomikunda mboka ya kutha ombinga noya thindikile aakalelipo yawo,” Namushinga ta ti.

Ta tsikile ko ta ti iikulya yopamuthigululwakalo oya dhinika, nonande yi na ongushu oyindji, ta ti otayi vulu okuhempululwa po, yo tayi longithwa iikulya yilwe. Okwa gwedha po kutya inamu pumbwa iilongitho oyindji , omwa pumbwa owala omulyo gokamongwa omushona oshowo osuuka moondjema adhihe tadhi longwa okuza miilikolomwa mbyoka.

Mboka ya kutha ombinga oya li ya yi momadheulo, noya li ya ningi omalolelo ya tale ngele shoka ya longwa osha kwata ngaa momitse dhawo, oya li ya teleke oondjema dhomaludhi, noya li yi itulamo momadheulo gawo.

Mwene gomukunda Enkolo tatekulu Pinihas Ashimbuli okwa holola enyanyu lye ta ti nani iikulya yomithigululwakalo oya pumbwa okuhempululwa po, yo yi longithwa mu ya zile uuwanawa wulwe owundji, mboka ta ti otawu ya kwathele pamwe naanegumbo lyawo.
“Otwa pandula unene uuministeli mbuka wa mono sho opala, opo ya unganeke omadheulo ngaka, otwa li twa longwa manga kutya ondjema oshike, ohayi longithwa shike, nomolwashike ya pumbiwa, naashoka sha pumbiwa oku yi eta po, nokonima otwa li twa pewa ompito tu teleke tse yene, notwi ilonga mo oshindji noonkondo,” Ashimbuli ta popi nenyanyu.

Omukalelipo gwa mwene gomukunda Elombe Samuel Amunyela naye okwa pupula kombunda uuministeli ta ti owa longa oshilonga sha simana, okwa ti olundji ohaya etha owala iilikolomwa yawo yomomapya tayi yonuka ashike ngashingeyi okwa mona kutya oyi na oshilonga sha simana.

“Uunongo mbuka twa mono otatu ke wu topolela aantu yokomikunda dhetu tse tu ya longe ya vule okwiilongela kuyo yene, ngaashi pethimbo ndika otandi vulu okuninga oondjema odhindji, dhimwe tandi landitha opo ndi imonene okashona kandje pamwe naanegumbo lyandje,” Amunyela ta gwedha po.

Ta ti iilikolomwa yomomapya oyi na ongushu noshilonga oshinene moshigwana, ta popi kutya oku na edhiladhilo opo a tote po opoloyeka yokulonga oondjema momudhingoloko gwawo, ye ta toto po oompito dhiilonga kaanamukunda ye.

Aakuthimbinga taya indile omikunda ndhoka inaadhi kutha ombinga dhi shi ninge olweetho lwa landulako, taya ti otaya kala unene konima komauwanawa ogendji. Aawunganeki oyu uvaneke taya kala taya ningi omadheulo ngaka, yo ya patulule omeho gaakwashigwana ya mone kutya nani oshindji tashi vulu okulongwa okuza miilikolomwa
yomomapya.

LEAVE A REPLY

Please enter your comment!
Please enter your name here