Young T a popi kombinga yongalo ye ompe

0
162
Young T ngoka a pititha okangalo ke okape kedhina Itandiinomo.

Pinehas Nakaziko

Windhoek – Konima ashike sho Tulina Ndafyaalako a tseyika nawa moongalo onga Young T, nenge Young T wokOngha a li a pititha okavidio ke kongalo ye Andiende okuza moalbuma ye ya piti hugunina omvula ya za ko, oshiwike sha zi ko omwiimbi nguka okwa li ishewe a nyuwitha omakutsi gaapulakeni oyendji sho a li a pititha ongalo ye ompeempeka yedhina Itandiinomo.
Onkundana ombwaanawa oondjika kutya Young T oku li nale ta thanekitha okavidio kongalo ndjika, hoka natango ka tengenekwa ka kale ka pita omwedhi twa taalela.

Ongalo ndjika okwa li ya pitithwa komapandja gwoIntaneta, hoka ya li ya taandelithwa nawa noya pulakenwa  koyendji.
Young T okwa ti ongalo ndjika oyo ehwahwameko lyoongalo ndhoka tadhi ka kala moalbum ye ndjoka ya tengenekwa yi ka pite muAguste omvula ndjika yedhina Eternal Government.

Ongalo oyi li ya ningwa omikwelengendjo, nokukwatithwa kostudio yaYoung T yedhina UGU Audio Studio. “Okangalo ha mwa kala nokutegelela ethimbo oko haka, ka pulakeneni nenyanyu, nondi wete kutya otatu ka pititha oalbuma kuyele nokuli omwedhi twa taalela,” Young T osho a popi ngaaka komalungula.

Nonando Young T ina popya lela kombinga yoalbuma ye ndjoka tayi ka pita, okwa notheleko oshigwana kutya nashi kale sha tegelela oongalo ndhoka oombwaanawa, naayambidhidhi ye naya tsikile okuya sapota ngaashi sha kala nale.

Oalbuma otayi ka pitithwa kehangano lyo UGU Audio Studio, pamwe NoMshasho Records, ehangano ndyoka ya li yatsu uukuni kumwe nalyo, noya li ya shaina etso kumwe lyawo lyo50/50. Young T naye okwa li ishewe a popi ta ti etsokumwe lyawo noMshahso Records onkatu yotango onene a kutha nelalakano okuhumitha oongalo dhe pamuthika gwopombanda.

Young T oye gumwe gwomaahikingalo mboka taya humitha oongalo dhoshiNamibia komeho, omolwuunongo wawo wa dhenga mbanda.
Oshilongo okwe shi yambukile kOngha mUukwanyama moka a kala ta ningi oongalo dhe nokuningila aahikingalo oyendji aashona omikwelengendjo dhoongalo dhawo ethimbo ele.

Young T moshilando shaVenduka okwa holokelemo mo2009, moka a tameke nokuli okuninga oongalo dhe pamwe naahikingalo ooyakwawo aashona. Oalubuma ya Young T ndjoka yi na ehwata lyoongalo 18, yedhina Philosophical Pages oyo ya li ye mu tula pamuthika gwopombanda, noongashingeyi oku na ooalbuma dhi vule pundatu.

LEAVE A REPLY

Please enter your comment!
Please enter your name here