Eopala lyomukiintu aluhe ohali monika koshipala

0
119

Maria Namupala

ONDANGWA – Oshi li ondjodhi yomukiintu kehe a kale ti imonikila, moontana dhaNelende lyUugwana adhihe, nakehe gumwe ota lalakanene okukala ta monika a fa omuyengeli uuna a holoka pehala lyontumba.

Omwoopaleki gwoomeme kamana monooli yoshilongo a tseyika nawa nedhina Martha Pandu Iitula, ota kwashilipaleke kutya oomeme oya tsokoka mokwiiyopaleka ongele okomitse, miipala oshowo komapanyala gawo.

Oku li omutotipo gwoPandu Makeup Artistry, moka ha gandja omalongo koomeme ga nkene ye na okwiimumamuma yo ya kale tayi imonikila. Pandu oku na omimvo 28, nokwa yambukile momukunda Etunda momudhingoloko gwaKahao.
Moonkundathana ndhoka twa ningi naye kuyele oshiwike shika okwa ti osikola ye yopetameko okwe yi hita poNetumbo, nokwa mana eilongo lye kosekundesikola yEtosha, oku li omuthaneki gwevi melelo lyondoolopa yaNiipa.

Pandu te tu kuthileko kashona nkene a toto po ongeshefa ye ndjoka. “Osha li mo2012 sho nda tembukile konooli yoshilongo, onda li nda mono shoopala molwaashoka omwa li mu na ompumbwe yoositola dhiikutu, naashoka osha thiminike ndje ndi egulule okastola kandje kopetameko moka nda kala he landitha iikutu, omafufu, oongaku nayilwe mbyoka nda kala he landa okuza kondje yoshilongo,” ta popi ngaaka.

Ta ti molwaashoka pethimbo ndyoka okwa li ta dhengwa koshimaliwa ongeshefa ye oya ka pata omolwonkalo yoshimaliwa ndjoka ya kala tayi nyengana. Molwaashoka omukulu gwonale okwa tile waa kambadhala ku sindi ngoye waa umbaumba ku yaha, okwa li a tokola opo natango a tote po osikola moka, ta longo oomeme nkene ye na okwiiyopaleka yoyene.

Okwa li a tameke omumvo gwa zi ko muJuli nonuumvo okwa gwanitha omvula ta gandja omalongo ngoka, nokwa ti otashi mu endele nawa, no ke na edhiladhilo a shune monima, omanga e na aantu taye mu tsu omukumo a pule komeho.

“Nangame petameko onda longo nuudhiginini, onda li ndi ishangitha komoopaleki dhingi moshilongo Hanna Nangula, ngoka oye a pendje uunongo nontseyo, opo ndi tote po ootundi dhandje, ondi na omuniilonga gumwe ngoka hatu longo pamwe nohatu feweke nokowoopaleka aafuko, oomeme piituthi ya yooloka, nohatu gandja woo omalongo kwaamboka ya hala okwiigwedhela ko,” ta popi ngaaka nomuthindo.
Okwa tsu omukumo mboka ye na ehalo lyokwiilonga nkene ye na okwiimumamuma, ye shi ninge manga pepi yo ya kale yi itaala muyo yene, ta ti kehe shimwe otashi vulu okuningwa uuna wu na omukumo,ngoye ino kala ho pulakene kaantu sho taya popi.

Pandu ta tsikile ko kutya nonando haya kala ya taalelwa komashongo ogendji, muye kamu na okushuna monima ota pula owala komeho sigo a adha esindano ndyoka ta lalakanene monkalamwenyo ye, ta ti aluhe uuwanawa okomeho.

LEAVE A REPLY

Please enter your comment!
Please enter your name here