Epangelo lya thita po noonkondo ketokolo lyashoprite okufala aaniilonga kompangu

0
148

Komutoolinkundana

WINDHOEK – Omuhindo, enyonkelo osho wo etukano enene kaaNamibia sho ehangano lyoShoprite Checkers Group moNamibia lya tokola okufala aaniilonga yawo ye vule po90 kompangu konima sho ya li ya yi mekanka lyi na sha noondjambi dhawo mo2015, osho Amushangandjayi ta kalelele mUuministeli wAaniilonga Bro Mathew Shinguadja osho a ti.

Shinguadja ta gwedha po wo kutya ota yambidhidha edhilaadhilo lyoku tula mo ombiliki ngele otashi ya kokulanda moShoprite. Ta ti ombiliki ndjika okwa li yi na okukala ya ningwa kuyele nuumvo oshoka owala omukalo gwa li inaagu manithwa.
Shoprite Namibia ota fala aaniilonga ye vulithe po90 kompangu molwa ekanitho lyiiyemo yoomiliona N$4,5 omolwa ekanka lya li lya ningwa muJuli 2015 lyi na sha nonkalo ohwepo yokulonga noondjambi oohwepo.

“Omolwashike ehangano ndyoka lya kala nokuninga nayi aaniilonga uule woomvula odhindji…oomvula odhindji taya futwa oondjambi dhi li pevi, itaye ya pe nando uuwanawa washa ndele ohaluka ngashiingeyi olya hala okukutha iimaliwa oyindji kaaniilonga mbaka, mboka inaaya futwa nando onale nando opelesenda yimwe yomoshimaliwa shika ya hala oku ya futitha?” Shinguadja osho a ti.
Shinguadja ta ti: “Uuthemba wawo, ngaashi wa kehe gumwe e li moshilongo a vule okuya kompangu ashike ngele shoka osha puka nenge oshi li mondjila itatu ti ko sha, ashike otatu ti inashi uka okukambadhala okumona iiyemo mbyoka wa kanitha shoka wi iyetela ngoye mwene, ashike shoka otashi ka tokolwa kompangu.”

“Kombinga yetu shika oshinima sha puka, omuhindo, nokashi na omutse nandungu,” ta ti ye ta gwedha po kutya shika otashi hindi Aanamibia ayehe.

Ta ti Shoprite, uule woomvula odhindji, okwa kala nokutinda okutsakanena nuuministeli wu na sha naaniilonga, taya ti oyi ipyakidhila.

“Otu shi shoka tatu ka ninga, otatu ka kwatathanana nomahangano gaaniilonga, otu shi shoka tatu ka ninga,” Shinguadja ta ti.
Phillip Munenguni, ngoka oye omupevipresidente gwehangano lyaaniilonga lyoNUNW mOmaandaha okwa popi kutya inaya andudhwa kwaashoka sha ningwa kuShoprite, ta ti Shoprite okwa kala nokwaa iyutha koompango dhaNamibia uule woomvula odhindji. Ta ti ngele inapu ningwa sha oshikando shika, ehangano lyaaniilonga otali ka lwitha Shoprite.

Ta ti mOmaandaha okwa li a talele po oositola dhaShoprite dhontumba nokwa mono kutya oondjambi dhaaniilonga mboka haya longo pomashina odhi thike ashike poN$1200 komwedhi.

LEAVE A REPLY

Please enter your comment!
Please enter your name here