Omukwaniilwa Elifas ope na ompito a ka gandje ehokololo lye mompangu

0
266
Omalenga ngoka ga kuthwa miilonga pamwe naayambidhidhi yawo ye li naakalelipo yawo yopaveta konima yompangu sho ya piti mo. Efano: Victoria Kaapanda.

Nuusita Ashipala

ONGWEDIVA – Omupanguli mompangu yopombanda yaShakati, Maphios Cheda okwa li u undulile komeho oshipotha shomalenga ngoka ga kuthwa miilonga kelelo lyoshilongo shaNdonga opo a wape a kuthe etokolo ngele ota ka tula Omukwaniilwa mokakololo kiihokolola.Omalenga ngaka ga kuthwa miilonga, okupitila momukalelipo gwawo gwopaveta George Coleman okuza koAngula Coleman and Co otaya ti ekutho miilonga lyawo olya li lya ningwa shaa na eyambeko lyomukwaniilwa.

Coleman ta ti kutya oshipotha otashi vulu okuhula nuupu ngele omukwaniilwa okwi itaala mompangu kutya oye shili a shanga omukanda ngoka gwe ya tseyithile ekutho lyawo miilonga.

Ashike omukalelipo gwopaveta gwomukwaniilwa, Elia Shikongo gwokehangano lyoohande lyoShikongo Law Chambers okwa li a ti okutula omukwaniilwa mokakololo kiihokolola kashi shi oshinima oshiwanawa oshoka oku wete kutya omukwaniilwa ke li monkalo ombwaanawa okuninga omatokolo ge li mondjila. Shikongo ta ti mbaka ya fala oshipotha kompangu oyi ikolelela momapopyo kutya omukwaniilwa ita vulu okuninga omatokolo gu uka onkene shoka inashi kala oko yi ikolela opo a ka hokole mompangu.
Ta ti okutula omukwaniilwa mompangu opo ku talike shili ngele oye tuu a shanga oombapila kashi shi uumbangi wa gwana po oku ulika kutya ita vulu okuninga omatokolo gu gu uka.

Shikongo ka li a panda sho oonakufala omukwaniilwa kompangu ya li ye na oku mu pa ethimbo lya gwana oku mu lombwela kutya uumbangi we owa pumbiwa opo a wape a gandje eyamukulo lye.

Shikongo ta kwashilipeleke ompangu kutya omukwaniilwa oku shi shi nota vulu okudhimbulula oshikahashaino shoka shi li pombaapila, nokukoleka shoka shi li mo, shikam okwe shi popi konima sho omupanguli naye a li a pula wo kutya ompangu otayi ka mona uukwashili ngiini.

Coleman ti ipatana omapopyo kutya okwa hala okutala uukolele wuuluyi womukwaniilwa ashike okwa hala ashike okukwashilipaleka ngele oye tuu a ninga omatokolo ngoka, oshoka oku wete a fa haye e ga ninga.
Ta ti wo ompanga omalenga ngaka ga kuthwa miilonga, oya indikwa wo okuninga ekwatathano nomukwaniilwa, shoka inashi kala omukalondjigilile. Omalenga ngoka ga kuthwa miilonga ogo Josef Simaneka, John Walenga, Vilho Kamanya, Kashona Malulu, Tonata Ngulu naFillemon Nambili.

LEAVE A REPLY

Please enter your comment!
Please enter your name here