Onambula United yi li pokupewa mo omuthi moliha yoFirst Division

0
39

Shipi Elago

ONGWEDIVA – Osipana ndjoka ya dhana nuule moliha yoFirst Division Onambula United oyi li pokati koshilaleko nomukonda konima sho yi li tayi iyadha pevi lyoshitaafula sholiha ndjika.

Onambula United oya li ya longo nuunkundi molweetho lwotango lwoliha ndjika nangele otayi dhana okalimba komakutsi nena otayi ki iyadha tayi yalula oonyothi ya uka koSecond Division ndjoka ye etha okudhana muuyuni wonale.
Onambula United hayo awike yi li muudhigu oshoka Ongwediva City nayo oyi li mokawato kamwe noNambula United oshoka Oyi li owala komeho noshitsa shimwe naashika oshe ya tula monkalo ya nika oshiponga oshoka nayo ngele oya dhana uulangedhi nena nayo otaya ki iyadha ye li muudhigu wu vule oonkondo dhawo.

Olweetho olutiyali lwoliha ndjika otalu tameke ehuliloshiwike ndika konima sho lwa li lwa tula mo ombiliki konyala uule womwedhi molwa uupyakadhi woshimaliwa mboka wu li wa kundukidha okatanga kokoompadhi moshilongo.

Oliha ndjika oya topolwa moongundu mbali moka ongundu ya-A yi li tayi pangelwa kOkahandja Military School ndjoka yi li pombanda niitsa 13 omanga ongundu ya-B yi li tayi pangelwa kuAfrica Motto yaShakati ndjoka yi na iitsa yi li omugoyi.

Oosipana mbali ndhoka tadhi ka sindana po oongundu ndhika pehulilo lyolweetho lwahugunina otadhi ka taalelathana muudhano wopaali meni nopondje yegumbo naangoka ta ka za mo a dhenga mukwawo ota ka mona ompito yokuya koPremier League omumvo gwokatanga twa thinda.
Ehuliloshiwike ndika Okahandja Military School otaka kaya molugwodhi nOnambula United moka shiti ta ka tekela mbundje oshoka Onambula oya hala okwiitumba po pevi lyoshitaafula yo yi ihupithe kokakuya koliha omanga Military School okwa hala okunkondopaleka okukala kwe pombanda yoshitaafula sholiha nuudhano mbuka oto vulu oku wu tala pokapale ko Nai-Aib Stadium mOkahandja.
Kombinga onkwawo Ongundu ya-B otayi ka mona Africa Motto ta ka tsikila omufolomo gwomawudhano ngoka ya li ya mana nagwo edhingoloko lyotango okunkondopaleka ehala lyawo pombanda yoshitaafula sho taya ka ya muudhano naTouch & Go ngoka naye e li ta kondjo nomwenyo pevi lyoshitaafula nokwa hala wo okuya pombanda onkene uudhano mbuka otawu ka thiga omuntu a lala nota wu dhanenwa pokapale kOtavi Sport Stadium.

MOlyomakaya Golden Bees ota ki ikwata naYoung Stars, omanga Ongwediva City tayi ki ikwata noEleven Warriors pUukwangula Stadium Oshakati.

MOlyomakaya mongundu ya-B African Lions ota ka tya pwaka naUNAM Ogongo poMokati Stadium.
Mosoondaha mongundu ya-A, Military School ota ka dhana naYoung Stars poNai-Aib Stadium, omanga Golden Bees ota ka ya mondambo nanakulwa mukulu mukwawo Onambula United pEtoshapoort Stadium.

Touch & Go ota ka ya mondambo naUNAM Ogongo,omanga African Lions ta ka ya mondambo nAfrica Motto.
Oyendji monooli oye li ya tala kuAfrica Motto, KK Palace nosho wo UNAM Ogongo mboka ye na iitsa yi li pombanda ngele otaya tsikile nomasindano yo ya yelule po etimwuambile lyoku tala ngele iitopolwa y konooli otayi ka tala tuu okatanga koPremier league momumvo tu uka.

LEAVE A REPLY

Please enter your comment!
Please enter your name here