Ondjokonona yokutuma omawi mombepo moNamibia

0
32
Mvula ya Nangolo

Mvula ya Nangolo

Ondjokonona yokutuma omawi mombepo mushoka tashi ithanwa ngashingeyi Namibia oyi na omidhi dhawo dha kwatathana nekondjelomanguluko lyopolitika naandyokayopaukwiita, ndhoka dha li dha kwatelwa komeho kekondjelomanguluko mewiliko lyoSWAPO. Tanganyika, shoka tashi ithanwa ngashingeyi Tanzania omolwa etulokumwe lyaZanzibar naTanzani, moka efupupiko lyaTan naZan lya tholoma po Tanzania, osha nkondopeka edhanonkandangala lyaJulius Nyerere okunwetha mo iilyo yongundu ye yi yambidhidhe omakondjelomanguluko giilongo yopuushiinda mbyoka ya li inaayi manguluka natango.

Okwa dhana lela onkandangala metotepo lyongongahangano yiigwana yAfrica moAddis Ababa shaEthiopia, moka aaleli yoongundu dha li tadhi kondjele omamanguluko ngaashi Sam Nujoma ya li ya kala momutumba ngoka. Pethimbo ndyoka naKenya ka li a manguluka mo1963, ashike okwa li a taalela emanguluko mo12 Desemba 1963. Ongundu onkondjelimanguluko yo-KANU oya li ya tumu Odinga, ngoka a li omupevipresidente gwo-KANU, opo e ya kalele po moAddis Ababa. Nujoma naakondjelimanguluko ooyakwawo oya li ye wete shi li nawa kuOdinga ngoka ongundu ye yekondjelomanguluko ya li yi li pokumangulula Kenya pambelewa momasiku 12 Desemba.

Onkene okwa li a popi pehala lyiilongo mbyoka ya kolonyekwa muAfrica, mwa kwatelwa Namibia. Nujoma okwa li a kalela po ongundu ndjoka konima, omumvo ogwo tuu ngoka ya yelwayelwa papolotika osho wo okupewa omayambidhidho gwopaukwaita okuza kokakomitiye kowina hoka ka li ka totwa po noka li ta ka longele okuza moDar es Salaam shaTanzania, noka pewa omayambeko komupresidente gwaTanzania gwotango Julius Kambarake Nyerere. Eyelaayelo lyoSWAPO ko-AOU, konima yoomvula, inayi yambidhidha ashike paukwiita nenge papolitika, ashike oya yambidhidha momikalo odhindji ndhoka konima dha fala etotepo lyopolohalama yopapolitika koTanzania Broadcasting Corporation koDar Es Salaam.

Oongundu dhekondjelomanguluko odha li tadhi vulu okutuma omawi mombepo okuya kiilongo yawo okuza hoka. Swapo oya li ya mono ompito yokutuma omawi mombepo kombinga yoonkundana kuumbugantu waAfrica. Manga eyambidhidho lyopapolotika okupitila moradio olya li wo lya pewa oSWANU unene tuu okupitika oonkundana dhi tumwe kuumbugantu wenenevi.

Claudius Kandjou okwa li ha kwathele oshilyo shimwe shoSwapo okuninga omalufo mokutoloka oonkundana mOtjiherero nangele ka li po Swapo okwa li ha pula omukondjelimanguluko Alphons Ngeama opo a toloke oonkundana mOtjiherero, omanga Mvula yaNangolo, ngoka a li omupe mokutuma omawi mombepo, okwa li ha toloka mOshiwambo, oshoka okwa li a longwa koGerman nokwa li ha popi omalaka ge li gahamano.

Oonkundana tadhi tumwa kuumbugantu waAfrica, unene tuu koNamibia odha li hadhi tolokwa nontseyo ethimbo ndyoka. Okwa li hatu popi kombinga yoonkundana paufupi momalaka getu nga twa yama ashike ngashingeyi moNamibia, moka itaamu talwa ondjokonona yetumomawi mombepo mOshiwambo nOtjiherero, otamu popiwa ngashingeyi omutse gwoonkundana. Ngele ope na omutse gwoonkundana omushila ogu li peni? Omukalo gwotango nogwopetameko ogwa li oonkundana paufupi, mOtjiherero nomOshiwambo ndele kasha shi omutse gwoonkundana shoka sha puka palaka.

Omahangano gwokutuma omawi mombepo itaga gandja ondjokonona yetumomawi mombepo moshilongo pawuyuuki. Kamwa li mu na etumomawi hali ningwa momalaka omavalelwa mo, moka oshitolpolwa shaCaprivi osho ashike sha kala noku shi ninga okuza koSouth Africa. Oonkundana odha li hadhi ningwa koSwapo. Aanamibia oye li momilema ngele otashi ya kungoka ha dhana koshitopolwa shomuthigululwakalo gwelaka.
Onkene pehala lyokulonga Aanamibia aagundjuka kombinga yondjokonona yetumomawi mombepo moshilongo, aawiliki nenge kehe tuu ngoka e li omukuthimbinga moshinima shika otaya undulile omiyelo dhuuyelele kokule.

Onda li ndi uvite uuntsa sho nda li nda pewa ombandi yuupendafule, onga gumwe gwomomapendafule gekondjelomanguluko, shoka sha li sha ningwa momasiku 26 Aguste 2010 moLuderitz.

LEAVE A REPLY

Please enter your comment!
Please enter your name here