Oshikukuta shoka konyala shi tu fale konakupila

0
217
Oshikukuta shomimvo 2015-2017 osha li sha yaga kegonga noonkondo naanamapya oya li ya longwa omikalo dhokulonga omapya gawo moshikukuta.

Komutoolinkundana

WINDHOEK – Oshikukuta shomumvo 2015 sigo 2017 osha li sha yaga kegonga, nonando sha dhimbiwa kuyamwe, osha thiga aantu ye li 370 316 yaa na iikulya, omeya nenge monkalo moka ya li itaaya vulu oku ihupitha ethimbo ele sigo omuSepetemba 2017. Shika osha li sha thiminike ehangano lyoRed Cross Namibia lyi idhope mo, ashike nalyo kalya li lyi na iimaliwa mbyoka lya li lya pumbwa opo li kwathele mompumbwe yiikulya. Pehulilo, Red Cross okwa mono ashike moshimaliwa shoobiliona N$13, shoka ya li ashike ya pumbwa okukwathela omagumbo 3 500, nenge tu tye aantu ye li 11 500. Petameko Red Cross okwa ti okwa li e shi oshikukuta oshopakathimbo ashike niinima otayi ka hwepopala mo2016.

Onkalo inayi hwepopala, noshikukuta osha li sha talwa ko onga onkalo yi nyanyaleka kepangelo lyaNamibia muJuni 2016,” osho oRed Cross ya shanga ngaaka molopota yawo ndjoka opo ya piti yi li kombinga nkene oshikukuta sha guma oonkalamwenyo pokati ko2015 no2017 moNamibia. Onga oshizemo shoshikukuta shika tashi pula komeho, oRed Cross oya talulula omakwatho gawo ngoka haya gandja, kakele kokugandja ashike iikulya oya tameke okugandja iimaliwa komagumbo moshipolwa shaKunene, shoka osho sha li sha gumwa unene koshinima shika. Onkene pehulilo osha ka mona omagumbo ge li 1 100 taga pewa oshimaliwa shooN$700 omwedhi kehe okuza muNovember 2016 sigo Mai 2017. Ayihe kumwe, oRed Cross Nambina oya li tayi gandja ekwatho komagumbo ngoka ge li moluhepo moKavango, Kunene, Oshikoto, Ohangwena noZambezi. Ehangano tali ti kutya olya li lyi tali telekele omagumbo 720 nenge aantu 3 600, ndjoka ya li tayi gandja oshikwiila shimwe mesiku uule womasiku gahamano moshiwike.

Opo ku gongelwe oshimaliwa, oRed Cross oya yi koraadio tayi pula ekwatho kumboka ye na iimaliwa niikulya ya. Nonando opwa li omayamukulo gontumba, omahangano ogendji inaga yamukula. Namwater okwa li a gandja N$10 000, Namsov Trust okwa gandja uundooha woohi 12 000 wu na ongushu yooN$140 000, FNB Foundation okwa gandja N$100 000, Pupkewitz Foundation okwa omakende gomagadhi ge li 3 264 ge na ongushu yooN$130 000, DBN okwa gandja N$20 000, Oshana Build It okwa gandja N$50 000, Aaniilonga yoDebmarine noNDTC oya gandja iikulya yi na ongushu yooN$421 692, Future Energy okwa gandja iikulya yongushu yooN$10 000.Epangelo lyaNamibia nalyo olya li wo tali ningi oonkambadhala okukwathela okukandula po oshikukuta. Mo2015 epangelo olya li lye ya po nopolohalama yokuyamukula oshikukuta ndjoka ya tulwa po okukwathela aakalimo mboka ya gumwa koshinima shika niikulya osho wo omeya sigo opehulilo lyaMaalitsa 2016.
Pethimbo ndika lyeyamukulo, epangelo olya gandja iikulya yoshikukuta kaantu taya tengenekwa ye li 370 316 moshilongo ashihe.

Epangelo lyaSouth Africa olya gandja wo eyambidhidho lyongushu yoomiliona N$100 pamukalo gwiikulya, ano uusila wepungu. Oshitopolwa shimwe shomiimaliwa mbika osha li sha longithwa okuhupa oombola dhi li 104. Epangelo olya li wo lya pewa ootona 700 dhepungu, ootona 30 dholushi nootona 3 dhoohi nuusila woohi okuza kepangelolyaNigeria. Epangelo lyaIndia olya li lya gandja ootona 1000 dholwishi, osho woo oomuma dhilwe dhiikulya oshow wo eyambidhidho lyopaunamiti mwa kwatelwa omiti dhokulelepeka onkalamwenyo yomuntu e na omukithi gwoHIV.

Ashike oshitopolwa shaKunene osho sha li sha dhengwa unene koshikukuta. Oshitopolwa shika kasha li shi na omeya ga yela niikulya oya li ya pumba noonkondo. Onkene oomboola dha li dha hupwa moKunene opo ku kwathelwe ku thikithwe omeya kaantu ye li 6400 mboka ya li yaa na omeya moshitopolwa.Okwa li wo kwa dhiladhilwa kutya aanamapya moKavango, Oshikoto, Ohangwena noZambezi oya li taya pumbwa okulongwa omikalo omipe dhokulonga omapya opo ya vule okusinda nokutompa oshikukuta moomvula tadhi ke ya. ORed Cross pamwe nuuministeli wuunamapya oya longela kumwe, taya pula omalelo gopaitopolwa ga tothe mo aanamapya mboka taya vulu okudhewulwa nota ya vulu wo oku ka dheula yakwawo komikunda dhawo.

Okwa li kwa tokolwa kutya aanamapya ye li 100 otaya dheulwa nakehe omunamapya ota ka shuna komukunda gwawo hoka ta ka dheula yakwawo ye li 10 nkene ye na okuyungula omahangu nepungu pethimbo lyoshikukuta.

LEAVE A REPLY

Please enter your comment!
Please enter your name here