Aayilongi itaya ka pewa we iihupe kuNSFAF, Kandjii ta ti

0
94

Loide Jason

WINDHOEK – Ominista yElongo Lyopombanda, Omadhewulo nOkunyotodhola Omundohotola Itah Kandji-Murangi okwa lombwele aayilongi yokiiputudhilo yopombanda mboka haya mono omayambidhidho gwopashimaliwa okuzilila koshiputudhilo shedhina Namibia Students Financial Assistance Fund (NSFAF) kutya itaya ka mona we iihupe yiimaliwa yawo mbyoka ya hupa sho kwa futwa iifuta yosikola.

Okwa ti kutya ngashingeyi NSFAF itaka gandja we nando iihupe mbyoka hayi hupu koshimaliwa shoka sha nuninwa aayilongi mbaka monakuyiwa oshoka oya hala wo aanasikola mboka ya tameka nuumvo ya kale woo nayo ya futilwa ihe kashi shi ashike mboka taya tsikile omayilongo gawo.

Ndhika Kandji-Murangi okwe dhi popi sho a li a pulwa kaanasikola mboka ya kutha ombinga momunyanyo gwopambili a yamukule komatsokumwethaneko ngoka ga li ge na okutulwa miilonga omanga omasiku ge li 31 Juli inaga thika.
Aanasikola otaya pula kutya oosikola dhawo nadhi futwe sha gwana po thiluthilu, omanga omambo, omuhandjo noshowo okuninga ookopi tayi futwa oopelesenda 80%.

Oya ti kutya shika osha li sha ziminwa koshiputudhilo shoka shi lile po aanasikola noshowo NSFAF naetsokumweuvathano olya li lya adhika pambili.

“Ngashingeyi otatu pula ashike oshizemo shoonkundathana dhetu dhi tulwe miilonga ngaashi tashi vulika oshoka ngele hasho itatu zi po inatu mona shoka sha popiwa kuminista pombapila,” osho omupopiliko gwaayilongo mboka ngoka woo e li omupresidente omutiyali gwoNANSO Brnard Kavau a ti momushangwa gwawo ngoka woo ya gandja kuminista.

Nando mboka oya dhenge omuthindo kutya aanasikola oyendji oye li moondjo molwaNSFAF iha gandja iimaliwa ya gwana , minista okwa ti kutya aanasikola mbaka naya kundathane naaputudhi yawo oshowo aavali yawo opo ya fute mbyoka ya hupa ko.

“Ongaashi naanaa tu shisheni kutya oshilongo shika oshi li mompumbwe yoshimaliwa ngashingeyi , onkene oshidhigu okugwanitha po omanyenyeto geni unene ngele tashi ya pashimaliwa,” osho minista a hokola ngaaka , nonando aanasikola oya li taya zizima omanga ina hulitha etumbulo ndyoka.

Minista ngoka a li ta monika e li meendelelo sho e ya paanasikola okwa hokolola kutya aanasikola mboka taya mono ekwatho lyoshimaliwa otaya ka mona ashike oshimaliwa shi li pomwaalu gwooN$17000 nonando omihandjo dhimwe ohadhi futwa oshimaliwa shi vulithe po mpoka.

Okwa li a fatulula kutya oshiputudhilo kehe oshi na iinyanyangidho yawo nimisindalandu dha yooloka onkene omwaalu gwiifuta mbyoka ya pumbwa okufutwa oyo tayi etitha NSFAF a kale a gandja oshimaliwa inashi gwana.

Shoka aanasikola woo natango ya li taya kuwilile sho ta popi mokutya kamu na uushili mwaashoka.
Ashike mbaka oya dhika oonyala mohi kutya ngele oya zi po mpoka uuna ashike shoka ya pula sha ningwa noya pewa lela ekwashilipaleko lyili nawa nolyi li pamushangwa kutya otashi yi miilonga ngaashi sha pumbiwa.

Shoka tashi nyuwitha omakutsi ooshoka kutya minista ka li a hala eye a taambe omukandanyenyeto ngoka nokwa li a tumu ko Amushanga ta kalele muuministeli moka ngoka a li a tidhwa po kaanasikola mboka mbala nokwa shuna.

Osha kwata nduno oowili ngiika dha thika puntano opo minista nguka eye a pulakene kaanasikola nokwa li a shuna meendelelo.
Omanga ina shuna okwali wo a lombwelwa kutya nathigepo iilonga mbyoka meendelelo oshoka okwa fa keshi shoka ta ningi na kena ohokwe yokukwathela aanasikola ngaashi sha li sha tegelelwa kayiilongi.

LEAVE A REPLY

Please enter your comment!
Please enter your name here