Dj Oros naBanger Drums taya mwenyeke onooli

0
17

Shipi Elago

ONGWEDIVA – Kundana ote ku etele ehuliloshiwike ndika Dj Oros opamwe noThe Banger Drums mboka haya nyanyudha aantu moku volonganitha iihikomwa ya yooloka nokulongitha oongoma oku eta po omukwelengendjo inagu monika nale.

Lucas Ashipala ngoka a tseyika nawa nedhina lye lyuu-DJ onge DJ Oros pawufupi okwa li a hololele Kundana kutya ye oku li ha lungu oongalo te dhi pe oshinge opo dhi kale tadhi nyuwitha omakutsi nokunana omayiyuvo gaamboka ya pulakena no ku eta ombepo yomatyapulo mokati kaantu.

Toivo Paulus ngoka e li omulongwa kosikola yuunkulungu oku li a kwatela komeho The Banger Drums, moka ha dhenge oongoma tadhi endele pamwe noongalo pethimbo limwe nokutowaleka iihikomawa nongoma ye.

“Onda tameka iilonga yokumwenyeka aantu noongalo mo2011 pOluzizi mOvenduka nda li nde shi ningi sha fa omashendjo ashike nani ya lyata mo ya nwamo , onda li nda hokwa iilonga yuu-DJ nando petameko kasha li oshipu , ota ndi dhimbulukwa esiku lyotango sho mwene gwehala a li a lombwele ndje kutya otandi mana po ethimbo lyandje oshoka kandi na oshitalenti shuu-DJ notandi tidha po ookastoma dhe nuusama wandje,” DJ Oros ta ti.

Oshitalenti shandje onda li nde shi dhimbulula sho nda tameke okuhika oongalo poJoe`s Car Wash mpoka nda li nda panga uukuume na DJ Alba, KFC DJ naDJ Stem The Legend, mbaka oya li ya kwathelendje okutungapo oshitalenti shandje shoongalo.

“Okuza mpoka onda li ne nda tsakaneke ongundu yo The Banger Drums notwa li twa tula uukuni kumwe opo tu tale nkene ta tu ya po nondunge dhiladhilo ompe yokunyanyudha aantu pamukalo gwa yooloka kwaangoka hagu longithwa koo DJ odhindji moshilongo.
DJ Oros ota ti aantu oyendji moshilongo shampa ashike e na okaleptop nena okwa ninga nale DJ onkene tse otwa li twe ya po nomukalo omupe gwokulongitha oongoma okumwenyeka aantu naashika osha yambula po edhina lyetu li ye pombanda mokati kaaholi yoongalo.
Uu-Dj kuye owu li eyithano oshoka omo hamu zi omboloto ye yesiku kehe nando petameko okwa li a mono omashongo ogendji gaantu ya li ye wete kutya oku-DJ oku li emanepo lyethimbo.

DJ Oros okwa ti okwa li a putuka megumbo mu na omuhikingalo a tseyika nawa Martha Namundjebo “Lady may” naoku wete kutya oye u upika eyithano lye lyokudhunga iihikomwa.

Oros okwa ti oku na okanona kamwe ye ina hokana , ashike oku uvite kutya okwa hala a humithe komeho oshilonga shuu DJ opo shi kale eyithano enene moNamibia .

Ngele nda koko onda hala ku muna uunona uushona mboka wu na iitalenti moku dhunga oongalo noku dhi volonganitha opo wu mone ondjila yu ukilila.

“Pethimbo lyongashiingeyi ohatu longele poFanky Lab mOngwediva mpoka opo hatu nyanyudha ookastoma dhoClub ndjika kehe esiku noha tu vulu wo oku ka nyanyudha piituthi yomanyanyu ngaashi oohango nosho tu,” Oros ta tsikile.
DJ Oros oku li omuteleki payithano (Chef) na oku na okasitola kiikulya ke li mOngwediva Medipark nangele ke li koongalo nena oha kala ta ningi omapekaapeko kombinga yokumbaka nawa iikulya, omanga ooyakwawo ye li ye na ashike iilonga yuu-Dj.

LEAVE A REPLY

Please enter your comment!
Please enter your name here