Epangelo tali tameke okutala Uuministeli Welongo nUuministelo wUundjolowele

0
88

Hofni Iipinge

Elongo olyo oshipatululo shehumokomeho, itatu vulu okutanga ehumokomeho ngele otatu pilamene oompito dhelongo kaagundjuka yetu okuza kelongo lyopevi sigo oondyoka lyopombandambanda. Elongo nali talike ko onga uuthemba wakehe gumwe ngaashi okatendo oka-20 koveta yelongo yoshilongo shaNamibia tayi ti. Namibia oku na oomvula 28 dhemanguluko ngashiingeyi ashike sigo oompaka otwa nyengwa okutula omulandu gwetu gwelongo kolutenda.

Otandi indile Uuministeli wElongo Lyopombanda, Omadheulo nUunyotodholi nUuministeli wEmona ya kwashilipaleke kutya aagundjuka yomoshilongo muka oye na uuthemba welongo, elongo lyoshali ngaashi omusindindalandu Elongo omweeti guuthikepamwe kamana, otali vulu okupatululila aagundjuka oompito dhokulonga moshilongo osho wo pondje yoshilongo, molwa iilonga mbyoka ta longo meyambulepo lyoshilongo, menenevi osho wo muuyuni. Opo Namibia a kale a tonata mokaalita omolwa aalongwantu mboka taya vulu okukundathana, okuthamuna, okusinanana,okunyotodhola osho wo okuninga elunduluko pamuthika guuyuni noompito odhindji dhi li mokati ketu. Itatu vulu okukala tatu kondjitha epangelo okupitila mooministeli opo iinima yi lunduluke, shika oshi na okukala omulandu gu li meukililo gwepangelo omolwa uuwanawa wAanamibia ayehe. Onga Amushanga gwoSwapo Party Youth League (SPYL) gwEongo, onda thikama nokuya mooministeli adhihe ndhoka dhi na mo sha moshinima muka opo tu inike komilungu nokugandja omakemo okuza kaanasikola yetu mboka ya gumwa kiinima ngaashi mboka itaaya vulu okuinyolitha kiiputudhilo, ngele otwe ya popileko ya inyolithe nena itaya shanga ekonaakono,nangele otwa tsikile uuna ya shanga ekonaakono ihaya mono iizemo yawo. Aalelii yetu yamwe ohaya kambadhala oku idhimbika onakuyiwa yaaleli yetu yokomongula, otwa hala aantu ya tholomekeka, ya longwa, noye na oonzapo onga aaleli yetu yokomongula. Otu na oonzo dhopaushitwe moshilongo muka tadhi vulu okutyapulwa kukehe gume, meukilolo nenge shaali meukililo, inatu kala epangelo li na owala iimaliwa yokuyakwa po koohandimwe ashike epangelo tali kandula po oompumbwe dhaanasikola yetu oshoka aakuluntu yawo itaya vulu okufuta oosikola ngele kape na omikuli.

Mboka ye na omikuli onkene natango pe na uunkundi womakwatathano mboka tawu imbi egandjo lyomayakulo lyi ende nawa.
Otu na aanasikola oyendji taya zi mosikola omolwa onkalo ndjoka ya ninga ondulu. Aanasikola yetu oya teka omukumo, aakuluntu yamwe oya umbila mo oshifanduke, ombili yokomwenyo oya kana, aanasikola yetu aakiintu oya ningi aalandithi yiihulo, aalumentu oya ningi ookalyamupombo, onkene kehulilo lyesiku oonkalamwenyo dhaanasikola yetu odhu uka komayendo omolwa onkalo moka taya iyadha, moka taya vulu okudhipagwa uuna taya adhika taya yaka iinima yaantu, okukwatwa kombuto yoHIV sho taya landitha iihulo, okutsuwa noombele momahala gomanwino taya kondjele iimaliwa ya za momashina, aanasikola yetu taya longitha nayi iikolitha, osho wo omapunda inaaga halika ngoka taga fala sigo otu kale tu na omaikutho gomapunda geli pombanda. Otu uka kuni Aanamibia? Omwaalu gwaagundjuka moNamibia ogwo gu li pombanda, oya ninga iihakanwa yiinima iiwinayi, onga amushanga gwelongo, otandi indile epangelo lyetu lyi ye mo olunyala moshinima shika neendelelo. Moshilongo muka omu na aantu aashona ashike oye li kohi yoluhepo pwaa na omatompelo gasha. Ngame omulongwantu nondi shi uuwehame wokukala omunasikola ashike ito pewa omakwatho gwopashimaliwa ngaashi wi ilongela. Epangelo, okupitila muuministeli mboka wu na okuungaunga noshinima shika nali simaneke aanasikola yetu nesimaneko Itandi ti epangelo lyetu otali ndopa okukwathela aanasikola yetu, ashike ope na mboka taya kambadhala noonkondo oku indika oonzo kaadhi thike kaanasikola.

Omathimbo gamwe iinima mbika otayi ningilwa owina opo aanasikola yetu ya tonde epangelo, yanasikola kotokeni.Kape na esiku tu tonde epangelo lyetu ashike otu na okukondja sigo tatu mono shoka twa hala kepangelo lyetu, mboka tamu kambadhala okukeelela oonzo dhaa thike kaanasikola yetu otu mu shi ashike masiku otatu ke mu kutha mepangelo oshoka omwe shi ulika kutya ne ooshimbungu ye li miipa yoonzi.
Aluta continua
Hofni Iipinge oye Amushanga gwElongo mOshilyo shaAnyasha yoSwapo (SPYL). hofniiipinge@gmail.com. Onomola yongodhi: 264 81 75 192 43

LEAVE A REPLY

Please enter your comment!
Please enter your name here