Ohango dhingi muAfrica yokomumvo

0
224

Komutoolinkundana

WINDHOEK – Oshiwike sha zi ko mOlyomakaya uuyuni owa li wa tala osheeli shaPresidente gwaSouth Africa, Andile Ramaphosa sho a li a hombola omuyalekwa gwe Bridget Birungi Rwaikaku ngoka a kala omuyalekwa gwe ethimbo nuule, sha li sha ningilwa poKololo moUganda. Birungi omonakadhona gwOmuprima gwaUganda Amama Mbabazi ngoka a li e mu tekula nomukulukadhi gwe Jaqueline. He ya Birungi, Rwaikaku okwa li a dhipagwa pethimbo lyiita yekondjelomanguluko yaUganda.

Oshituthi shika sha li sha dhenga mbanda osha li sha kankameke oyendji moUganda sho osheendo shaRamaphosa osho wo omutaambiko gwawo, President Yoweri Museveni, ngoka a li wo e li nanekulu lye Janet ya li ya kala poshituthi shopamuthigululwakalo sha tseyika nawa nedhina ‘Kuhingira’, oshituthi shopamuthigululwakalo shokugandja omukiintu moUganda.

“Nandi pandule unene Amama Mbabazi nomukulukadhi gwe Jacqueline sho ya tekula Bridget sho he (Rwaikauru) a li a dhipagwa sho a li ta yambidhidha ekondjelomanguluko lyetu. Tandi pendula yina yaBridget, Peace, sho a kala omukulukadhi omunankondo,” osho President Yoweri Museveni a li a shanga koTwitter konima yohango.

Andile okwa gondo noongombe ntano niikombo itano muMai. Okwa li wo a pulwa a fute ondando yoshikombo shimwe sho a li mono okanona kondje yondjokana. Andile, 37, naBridget, 36, oya kala pamwe oomvula dhi li konyala omulongo noye na okanona koomwedhi mbali. Oshi li oshidhila momithigululwakalo odhindji moUganda omukiintu a mone okanona manga inaa hokanwa.
Museveni okwa gunu aahokanathani mbaka yaa mone uunona owundji ngaashi ya li ya tulilwa mo kugumwe gwomooyina yomufuko ngoka a ti naya mone uunona wu li 22.

“Kotokeleni omakumagidho ga zi kumeme ngu ta ti kaleni nuunona omi-22, omi-22 uuhasha. Taleni komwaalu ngoka tagu vulu okutonatelwa.” Museveni, ngoka a pe aafuko oongombe inaadhi tseyika momwaalu osho a ti ngaaka. “Otatu ku pendula sho wa kala omwiinekelwa, oshoka owa gwanitha po iinima ayihe. Onkene natse otwa pandula okugwanitha po ombinga yetu oku ku pa omwanakadhona gwetu Bridget Birungi.” Mbambazi osho a li a ti poshituthihango.

“Momuthigululwakalo gwetu, ohatu gandja okanona kuhe nonda nyakukwa mokushininga. Otwe mu taamba ko onga omwanakadhona gwetu tango, notwe mu taamba ko wo onga omuholikekadhona gwomumati gwetu notandi kwashilipaleke kutya mbaka yaali oye li mohole,” President Ramaphosa osho a li a ti ngaaka.

E li nomunyekadhi omundohotola Tshepo Ramaphosa, omukulukadhi gwe gwonale Hope Ramaphosa osho wo osheendo shaantu ye lwopo150, Bridget okwa li a taambwa ko kofamili yotango yaSouth Africa.
Onga ongundu yaantu otundji twa za kegumbo, otwa nyakukwa kutya sho tatu ka shuna itatu shuna oonyala dhowala,” President gwaSouth Africa ta ti.

Ta indile opo oshitenya she shi kwatekeke omusamane gwasho nonando pe na omapopyo okuzilila kaakulukadhi yokoSouth Africa kombinga yehogololo lye lyomukulukadhi.

“Owa tsilwa ondumbo kaakiintu oyendji moSouth Africa, nokomapandja gomakwatathano gokomalungula otaya ti kutya omolwashike a ya komakulekule tse omo tu li muka. Kaye shi kutya ne ohole yeni oya menene omidhi koKiina,” ta ti ngaaka.

Ta koleke omapopyo gahe, Andile okwa koleke kutya yo oyi imonena koKiina, hoka a li ha longo, naBridget okwa li ti ilongo.
“Otwi imono pwa pita konyala oomvula omulongo paife. Onda li koBeijing nda li tandi longo onga omunawino omanga ye a li ta mana eyilongo lye lyuuindjiniya. Nokwa tsikile nonkatu ya landula ko. Otwa ka kala koSouth Africa. Oye kuume kandje kopothingo. Oku shi iiholekwa yandje ayihe, nankeen oompadhi dhandje dhi li,” Andile osho a ti.

Andile oye omukuluntuwiliki gwoBlue Crane Capital Limited moSouth Africa okuza mo2014. Andile okwi ilongela onzapo ye yopevi koUnivesiti yaCape Town moSouth Africa, moka a li a mono onzapo yodegree mepungulo lyiiniwe nokuyalula
Okwa yi nduno oku ka longa mehangano lyokutonatela omaliko lyoCoronation uule woomvula mbali onga omuyalulitengeneki, okwa ka tsikila ishewe neilongo lyekoKiina koFudan Univesiti.

Mo2011 okwa li a wayimine ehangano lyoStandard Bank (Stanbic) moKiina onga gumwe gwomaaniilonga yoICBC. – Lya kuthwa monzo dha yooloka.

LEAVE A REPLY

Please enter your comment!
Please enter your name here