Omukulukadhi a dhipagwa komulumentu gwe omukulu

0
640

Nuusita Ashipala

ONGWEDIVA –Aakwanezimo yomukulukadhi ngoka a li a dhipagwa kohonda ye onkulu mehuliloshiwike lya zi ko kEtomba moshitopolwa shaHangwena okwa li a ti omufekelwa okwa li mondholongo nokwa zi mo konima sho a li a ningile nakudhipagwa omatilitho kutya ota tetagula okanona kawo komvula yimwe miintumbu.

Omupopiliko gwopolisi mOhangwena, Warrant Abner Kaume Itumba ka li ta vulu okukoleka kutya omufekelwa nguka okwa li a tulilwa mo oshipotha shashike, ashike okwa ti okwa li mondholongo shi na sha nomahepeko gomomagumbo.

Omunamimvo omi-38 Helvi Kanana okwa li anuwa a ponokelwa konima yoontamanana konima mbaka yaali sho ya li ya galuka kuundingosho wopopepi.

Oshiningwanima shika osha ningilwa anuwa megumbo lyomumwayina gwaKanana moka ha zi naanona yawo yaali, mboka oyo ya li ya lopotele aashiinda uusiku wEtitano.

Kanana oku na uunona une moka hoka kokankelo ka valwa komufekelwa. Itumba ta ti inashi yela natango kutya oshilwitho shini sha li sha longithwa oshoka natango omo shi li momutse moka, okapambu ashike okashona ke wetike.
Omulumentu nguka gwoomvula 35 okwa li a mangwa po ongula yOlyomakaya konima sho yina a li e mu patele mondunda sho a li e ya yi kegumbo ongula.

Otaku hokololwa omulumentu a li a yi ontuku konima sho a longo oshimbuluma shika. Omumwayinagona gwanakusa okwa ti manga omaponokelo ngaka inaaga ningwa , omutamanekwa okwa li a lamba okanona kanakusa nekatana megumbo.
Yinakulu yanakusa , omunamimvo 81 ngoka kee wete ko, Teopolina Shafuda okwa ti okatekulu ke oka ninga ethimbo taka mono iihuna momake gomufekelwa.

Kanda li ndi shi ngele otashi ka hulila meso. Otashi ehameke okukanitha omumoye momukalo gwa tya ngaaka unene tuu sho opo twa fumvike yina,” yinakulu ta ti ngaaka.

“Onda kanitha omukwathi gwandje, oshoka okwa kala aluhe a hala okukwathela. Okwa thigila ndje uunona une, otandi wu tekula ngiini monkalo yandje?” Omukulupe ta pula.

Okwa li a ti omutekulu gwe okwa li a mwena ye omunyanyukwi.
Kanana oye omukulukadhi omutiyali konima yomasiku omashona ta kanitha omwenyo gwe momake gwohonda ye, konima sho Alina Kahehongo a li a yahwa okusa piilonga ye moWindoek.

LEAVE A REPLY

Please enter your comment!
Please enter your name here