Omukulupe a matuka ookilometa 10 muudhano waOld Mutual

0
328

Shipi Elago

OSHAKATI – Kuku Nelago Amwaama okwa li a ningi omukiintu gwotango ta matuka oshinano shookilometa omulongo mondjokonona yuudhano waOld Mutual wiinano iile.

Omunamimvo 57 okwa li gumwe gwomongundu onene ndjoka ya li ya kwata ondjuhwa komulungu okuthika pokapale koIndependence Stadium mpoka opo pwa li pwa tameke uudhano mbuka nokutanga uukwanambwiyu we moshinano shookilometa 10.

Oyendji mboka ye na omimvo dhi thike pudhe oye li nale taya ende nootondje mbali ashike kuku Nelago oshinano shika kuye osha li okambi mehuli.

“Onda li handi kutha ombinga momawudhano pethimbo lyonale sho nda li omugundjuka, nonda kala ndi hole uudhano mbuka wiinano iile, nuumvo sho ndu uvu uudhano mbuka onda li nda yi momadhewo ga kwata miiti nokwiilongekidha nawa opo ndi kaleke olutu lwandje lwa ndjanga opo kandi ka mone uupyakadhi pethimbo lyethigathano” Nelago ta ti.

Okwa ti olundji okwa kala nokukutha ombinga muudhano mbuka ashike okwa li ha matuka ashike moshinano shokilometa ntano.
“Omvula ndjika onda li nda kutha etokolo opo ndi ye moshinano shoukilometa 10 naosha li ashike okambi mehuli, nando aanyasha oya li ye ende po pungame ya fa omapeya onda li nda ningi nandjenda kadhuuluma nando muthiga po oteya sigo nda mana oshinano shika,” Nelago ta ti ye ti imemeha.

Okwa ti ye miikolitha iha tokwa mo onkene osho ngiika she mu kwathela okukaleka olutu lwe lwa ndjanga , nolu na uukolele kaku na we oshoka oyendji yomaantu mboka ye li pepipi lye itaya vulu noku matuka oometa ethele.
Ota indile aakokele yakwawo opo kaaya kale owala ya gondja ashike ya kale ngaa haya iyutha momagulu opo ga ze oontopa naashika otashi kaleke kokule uupyakadhi owundji hawu adha omalutu gaakokele.

Ota kunkilile aanyasha opo ya tameke okukutha ndimba moombwa manga kuyele nokuninga omadhewo manga kuyele opo sho taya ka thika pomimvo dhuukokele omalutu otaga adhika ga ndjangumuka na itashi ka kala we oshidhigu okutsikila omadhewo.
Nelago Amwama okwa yambukile komukunda Eengwena kOkalongo kaHaundano.

Kakele ka Nelago oshinano shika osha li wo sha matukwa kugumwe gwomaamatuki aakulu nokwa kala a tseyika nawa muudhano weeMarathon , omunamimvo 57 Simon Totwe ngoka naye a li a matuka oshinano shika lwotango konima sho a li a egeke oongaku dhokumatuka.
“Konima sho nda li nda thigi po uudhano onda kala owala he matuka moshinano shookilometa 5 ashike nuumvo onda li nda tokola opo ndi kuthe ombinga moshinano shookilometa omulongo nando kasha li oshipu okuninga sha namutango kehulilo naanyasha onda li nda mana oshinano shika nethimbo ewanawa,” Totwe ta ti.

Okwa ti okwa a kalele po Namibia muudhano owundji unene tu koSouth Africa hoka a li a matuka muudhano ngaashi Two Ocean Marathon, The Comrades Marathons no sho tu.

Okwa ti nando omimvo otadhi pula komeho itadhi mu kutha uupenda nuulaadhi oku kutha ombinga momawudhano.
Okwa li wo a popi uuwanawa mboka ha mono momawudhano ta ti iha kala a loloka ngele oku li miilonga , ke na uudhigu wokupenduka.
Onkene ota indile aanyasha opo ya kuthe ombinga momawudhano kehe taya vulu oku dhana , ta ti momawudhano omu na uuwanawa owundji mboka tawu vulu okunawapeka oonkalamwenyo dhaantu.

Totwe okwa li a tsilike oongaku dhokumatuka mo1996, moka a li a matuka oshinano shokilometa 65, noku li omvalele yaGobabis moka wo e li a tota mo Okalaba yoAteletika ndjoka ya tseyika nawa Gobabis Front Runners.
Mbaka yaali oya li ya pewa omapapa kuOld Mutual onge oyo aakuthimbinga ye na omimvo dhi li pombanda.

LEAVE A REPLY

Please enter your comment!
Please enter your name here