Omuselekadhi a kwathelwa kompangu kaa thigwe pomutenya

0
219

Komutoolinkundana

WINDHOEK – Etokolo etalala mompangu yaShakati olya ulika nkene aaselekadhi noofamili dhawo taya monithwa iihuna moshigwana, unene tuu kaalumentu mboka ya pamba aasamane yawo mboka ya pita po. Opo ku gandwe omayihumbato ngaka, ompangu yopombanda yaShakati inayi ekalahi ashike oshipotha moka omulumentu gumwe a pamba nakusa a li a hala okukutha ko omaliko ngoka ga li gomuselekadhi ashike okwa pulwa wo a fute oonzo ndhoka dha longithwa komuselekadhi i igamene mompangu.

Moshipotha shika omuselekadhi Hilde Thomas okwi iyadha ta tidhwa megumbo osho wo ta kuthwa omaliko ngoka yo nomusamane gwe, Maati Thomas ya li ya longo nuudhigu, molwashoka mumwayina gwaThomas, Sackeus okwa li a hala oye a kale neliko. Shi ikolelela koondocumende dhomompangu, ndhoka tadhi ulike kutya Sackeus okwa kutha omukanda ngoka tagu ulike kutya oshitopolwa shimwe shevi lyokuupindi kasha li shaMaati ashike osha li she. Sackeus okwa li wo a pula a futwe komuselekadhi N$294 000 shoka a tile osha li oondjo dhiimaliwa mbyoka ya hupa ko. Hilde okwa li a tindi kutya oku na oondjo oshoka oondjo adhihe odha futwa ko.

Hilde nomusamane gwe oya li ya landa ehala ndyoka noya li ya tungu po ehala lyomanwino nokonima oya tungu po oofuleta ya longitha iimaliwa yawo mbyoka ya li ya pungula. Konima okwa ka landa po ishew ehala limwe natango a tunga po oofuleta. Omaliko ngaka ogo taga kondjelwa kofamili yomusamane.

Oshikumungu osha li she ya sho omusamane gwaHilde, Maati a li a hulitha mo2013, nokonima mpoka sha li sha tokolwa pomwaale kutya ongeshefa ndjoka Hilde ya tunga po nomusamane gwe otayi ningi po yomumwayina gwomusamane, Sackeus. Omukulukadhi okwa li nduno a yi kompangu nokupula yi tidhe Sackeus, ngoka ethimbo ndyoka a li ta ongeshefa onga oye mwene gwiinima.

Nonando a a kumagidhwa kElelo lyondoolopa yaShakati osho wo kompangu yopombanda yaShakati kutya ke na mo uuthemba mongeshefa, Sackeus okwa li naye a yi kompangu opo i ki ipopile nokutulila mo wo omuselekadhi oshipotha ngoka inaa enda po poongeshefa ndhoka okuza pomwaale. Okwa li ta ti kutya oye mwene gwehala ndyoka mpa pwa tungwa oongeshefa ndhoka nongeshefa nayi kale mpoka moluuwanawa wofamili.

Hilde okwa lombwele wo ompangu kutya pethimbo lyomwaale, ofamili oya li ya ningi ethaneko a kwathelwe kaantu yatatu okutonatela omatungo. Okwa li e shi tindi, okwa li wo kwa tiwa ngeno egumbo lyi gandjwe po kaanona, ashike naashika okwe shi tindi. Okuza mpoka, Sackeus okwa li a kutha ko omaliko nokwe mu patele pondje mokulonga nokungeshefa.

Hilde okwa li a zi mo megumbo na ina shuna mo we. Okwa li a kumwa sho a pewa ombaapila tayi mu pula a ze mo megumbo, nonando hamo a li ha zi. Sackeus okwa yi kompangu a ka shangithwe ongamwene gwehala ashike ompangu oya lin ye shi tindi, noye mu lombwele kutya haye mwene gwomaliko ngoka. Nelelo lyondoolopa lyaShakati olya lombwela Sackeus kutya omaliko ngoka oga li ganakusa Maati, nangashingeyi ogomukulukadhi gwe Hilde.Hemweno gwaHilde , Thomas Shoongo, okwa li naye wo a popi mompangu kutya oya li ya lombwela Hilde pomwaale kutya omaliko ngashingeyi ogaSackeus.

Nonando ongawo ompangu oya li ya ndjiki oonyala mevi kutya Hilde,. “onga omuselekadhi gwaMaati okwa li a pewa ombaapila ndjoka tayi mu pe oonkondo dhokutakamitha omatungo ngoka.”

Omupanguli mompangu yaShakati Maphios Cheda okwa li a tokola kutya Sackeus okwa longitha nayi ompangu sho a li a yi ko a ka pule yi tidhaatidhe Hilde. “Kungame shika oshipotha shu ukilila moka ompangu yin a oku ulike ekenyanano lyayo nokupa Sackeus egeelo opo ku gandwe nayakwawo ishewe mboka ye mu fa yaa tule we aantu mboka oyo ye na uuthemba wuuthiga muudhigu nokuthiga oondjato dhawo dha endama.” Osho omupanguli Cheda a li a tokola. Okwa li a gandja etokolo opo Sackeus a fute iifuta yaHilde ngashi shi li pokati komukalelipo gwe gwopaveta naye

Omupanguli Cheda okwa li a mono kutya Hilde okwa li a gandja uumbangi we nawa na kape na etompelo oku wu mona uusama oshoka osha taambwa ko onga uumbangi woshili. Omupanguli ta ti Sackeus okwa kala nokulyatakana momikalo odhindji nuumbangi we owu udha niinima itaayi vulu okukalelwa po. Okwa tindi thiluthilu uumbangi wa Sackeus. Okwa mono kutya Hilde oye mwene gwomaliko oshoka okwa tula mo ethimbo lye, iimaliwa osho wo oonkondo mokutunga po ongeshefa manga Sackeus a li a ndopa okuulika uumbangi kutya okwa longela ko shike kongeshefa ndjoka.

“Osha yela kutya Sackeus okwa hala okukala nomaliko e ga pewa kofamili ye ndjoka yi ikolelela momithigululwakalo, ndhoka nando hadhi vulu okukala oombwaanawa, odhi li tadhi mbotsathana meukililo nomilandu dhanakanena ngele otashi ya kevi,” omupanguli ta ti.

LEAVE A REPLY

Please enter your comment!
Please enter your name here