Uupyakadhi mboka wa palamena oonakulwa aakulu yetu yekondjelomanguluko

0
71
WINDHOEK, 14 November 2015 - The President of the Namibian Exile Kids Association (Neka) Benitha Nakaambo addressing 'children of the liberation struggle' in the capital. (Photo by: Esme Konstantinus) NAMPA

Benitha Nakaambo

Ekondjitho lyuukoloni waSouth Africa olya li lya kwatelwa komeho koSWAPO, ndjoka ya li ya tameke nokukondjitha epangelo lyokatongotongo moomvula dhomilongo 1960. Oya li ye ya po noshitayi sha homata shoSouth West African Liberation Army, ndjoka ya li ya lukululwa ya ningi People’s Liberation Army of Namibia (PLAN) mo1973.Namibia okwa li a sindana emanguluko lye okuza kuSouth Africa mo1990, shoka sha li she eta aaniilonga yopakwiita osho woo aanambelewa yalwe Aasouth Africa ya kuthwe mo moshilongo.
Sha landula okuza penyanyangidho lyekotampango, omahogololo gopaudemokoli oga li ga ningwa noSWAPO oya li oyo ya mono omawi ogendji. Etanga lyegameno olya li lya totwa pethimbo lyetaambathano lyoonkondo dhopapolitika nokwa li kwa tokolwa ku tulwe mumwe Oplan noSWATF . Shika osha li sha ningwa nopamuthika gwopombanda gwetanga lyegameno , moka aawiliki yiikondo, yaali ya li ya za koPLAN nayaali ya li ya za koSWATF

Komanda gwo1st Infantry Battalion okwa li omukwiita gwoPLAN, manga omutiyali ngoka a li e mu landula okwa li Captain gwoSWATF Omupolofesa gwaNamibia Andre du Pisani ota ngongo esimano lyomukalo ngoka oNDF Ya li ya totwa po nago. “Endhindhiliko kutya etotepo lyoNDF olya olya gandja shili nombepo yedhiminathanapo lyoshigwana netungepo lyasho”. Osha li moNDF moka aakondjithathani mbaka ya li taya vulu okukala omutumba nombili onga Aanamibia, aakwashigwana yoshilongo oshipe.Ta ti wo NDF pa pa epangelo oonkondo, ndjoka ya li ya pe epangelo ndyoka lya li opo lya hogololwa li ninge ethindilomo lyoonkondo dhalyo.

Ehogololo lyaaniilonga yomoNDF olya li lyi ikwatelela komikalo dhomakonaakono. Omukalo nguka ogwa li gwa ningi eyinda enene okuya mo kumboka ya li aakwiita yoPLAN yaa shi okulesha. Osha li sha fa tashi monika konima yoomvula omi-20 oomboka ashike ya li ya mono oompito dhokukesha nokwiilonga kondje ya li taya mono oopoosa oombwanawa moNDF nenge pomahala galwe mepangelo shoka sha li sha eta uutondwe mokati kaakondjelimanguluko oyendji.

Mo1995, enkondopeko pamukalo gwoshimaliwa gwoonakulwa aakulu netulululo lyawo olya ningi oshinakugwanithwa shokakomisi kokuninga omathaneko moshilongo, ndjoka ya li ya toto po Socioeconomic Intergration Programme for Ex-Combatants (SIPE).Oonkambadhala dhetulululo ndika hadho naanaa lela nodha ndopa okukandula po omakemo, nopehulilo lyoomvula dho1990, oonakulwa oyendji mboka ya li inaaya kwatelwa mo oya kala nokwaa na iilonga. Pokati ko1997 no1998 okwa kala omakemo ogendji goonakulwa aakulu, oonakulwa ya li yoPLAN oya li ya kuutumba pehala li li popepi negumbo lyomutumba gwopashigwana, omanga mboka ya li yoKoevoet ya li ya ningi omatilitho gokuteya po engungumano moshilongo ngele inaya ningilwa shoka taya pula.

Konima yoomvula, okabinete kaNamibia oka li ka toto po okakomitiye opo ku talike oshinima shoonakulwa aakulu, noka li ka gandja omathaneko epangelo opo li kute oonakulwa aakulu ayehe. Oshikonga shika osha li tashi ithanwa kutya oprojeka yombili ndjoka ya li ya mono aantu ye li 9 188 ya pewa iilonga metanga lyegameno, yamwe oya li ya pewa iilonga koHome Affairs, unene tuu moSpecial Field Force. Uuministeli woondholongo owa li wa kutu aantu 2058. Ooministeli dhilwe dhi li ntano odha li dha kutha po aantu 3 446.
Mo2006 uuministeli woonakulwa aakulu owa li wa totwa wu hwahwameke nokutula miilonga ooprojeka noopolohalama ndhoka tadhi kandula po omawupyakadhi goonakulwa aakulu, mwa kwatelwa nokukaleka epungulo nekalekepo lyondjokonona yemanguluko lyaNamibia.Konima sho oonakulwa aakulu ya li ningi keme komeho yombelewa dhuuministeli ya hala okupewa ooN$500 000 onga ofuto nondjambi yawo sho ya li ya kutha ombinga mekondjelomanguluko (SAPA, 2007).

Oveta yoonakulwa aakulu oya li ya lundululwa mo2008. MuFebuluali 2013, uuministeli woonakulwa aakulu owa mono shu uka kutya aantu ye li 24 457 mboka yi ishangitha nuuministeli noya li ye na okumona omawananwa kepangelo, mwa kwatelwa okupewa eyambidhidho moopoloyeka dhawo.

Uupyakadhi wuuministeli woonakulwa aakulu owo mbuka kutya owa li wa tungwa po koohandimwe mboka ye na omalalakano gawo omawinayi.
Shika otu shi wete molwa oomvula ndhoka dha tulwa po okutala kutya olye nakulwa omukulu na olye ke shi nakulwa omukulu, etulo muungundu osho wo efatululo lyawo lyaa li mondjila kutya olye ha yambidhidhwa kunakulwa omukulu.

Oshinima oshiwinayi ooshoka oonakulwa oyendji taya hepekwa omolwa oomvula odhindji ndhoka ya mona iita. Oonakulwa aakulu oyendji yoPlan oya oku nyengwa konkalamwenyo pethimbo ndika lyombili. Oyendji oya pikwa komalovu nomakaya ongomukalo gwokukandula po omaudhigu gawo, omanga yamwe ya pikwa kokudhana omashina.

Oyendji otaya dhengwa kokadhigilili komomitse shoka sha dhigupaleka oonkalamwenyo dhawo, mwa kwatelwa okuninga omahalu nokulala oondjodhi.

Opwa fa pe na ompumbwe ku talike yilwe yaa shi ashike okugandja omayambidhidho gopashimaliwa noopoloyeka koonakulwa aakulu.
Onda kala nokukonga omayamukulo opo ndi uve ko kutya omolwashike epangelo konima yemanguluko inaali ya po noopolohalama dhokukwathela oonakulwa aakulu naamboka ye li popepi nayo. Omwaka ngoka ogwa thiga po iikumungu oyindji kaavali naanona.
Ombelewa yomupevipresidente, , kohi yoshikondo shooonakulwa aakulu kayi uvite ko esimano lyokukutha oopolohalama dhi thike mpaka.
Etulululo lyopankalathano, (moka ya li taya vulu okutulwa momidhingoloko dhawo dhawo)
Etulululo lyopapolitika (moka ya li taya vulu okukala iitopolwa yokuninga omatokolo)
Etulululo lyopamahupilo ( shin a sha nokukutha ombinga moompito dhiilonga)
Oku aluka kopamadhilaadhilo ( Oya lundulula tuu omikalo dhawo noonkalamwenyo dhawo nokutaamba ko ononkalamwenyo oompe?)
Otu li ngiini onga aakalimo yoshilongo shika tatu longo naantu mboka ya ya ekelahi oomvula dhawo dhuunyasha ya kondjele emanguluko lyetu? Oshike ishewe twa pumbwa okuuva ko kutya iita ohayi vulu okuninga ngiini omuntu.
Benitha Nakaambo omukwashigwana gwevi ndika noku li okanona kekondjelomanguluko.

LEAVE A REPLY

Please enter your comment!
Please enter your name here