Etalelopo lyaMcHenry Venaani kEmanya: Oshihwahwameki shekanka she ya puuyelele

0
433

Dr Elock Shikalepo

Etalelopo lyaMcHenry Venaani kosikola Emanya momudhingoloko gwaNyaanya moshitopolwa shaShikoto olyo lya eta opo oshinyolwa shika shi shangwe. Onda hala okupandula ewiliko lyUuministeli wElongo, Uunkulungu nOmithigululwakalo, osho wo Oshikondo shElongo moshitopolwa shaShikoto sho inaaya longitha olwaamambinga, elongitho lyeuveko lyawo osho wo okupa Venaani ompito opo a kundathane nosikola ndjika ya ndopa shi kenyaneka.

Ngame omulongi omukulu gwopEmanya okuza mo2006 sigo 2012, moka nda li wo ndi na oshinakugwanithwa onga amushanga gwelelo lyosikola osho wo oshilyo shokomitiye yelelo lyosikola.

Ngame kandi na nando okakalata, nenge omuyambidhidhi gwongundu yopapolitika moNamibia.
Ngame otandi kala omukwashigwana gwevi lyetu ndaa na olwaamambinga nondi na oshili ngoka ta kaleke po uuwananwa nuuyuuki.
Emanya olya kala tali tyakaleke oonkundana omasiku ngaka, ashike itaadhi fuula. Yimwe yomoonkundana oyo ndjoka ya li inaaya pititha nando okanona kamwe mondondo onti-12 mo2017. Otashi wapa okutumbulwa kutya osho oshikando shotango osikola ndjika ya li ya shangitha ekonaakono lyondondo onti-12, ashike okuya mondambo noopelesenda 0 kasha li omashendjo.

Nonando ya ndopa ngaaka tashi sitha ohoni shoka inaandi shi mona nale monkalamwenyo, kapwa li nando omuleli gumwe moshigwana a ya moonkundathana shi na sha noshinima shika.

Omathimbo ga piti, osikola oya li tayi tindi etalelopo lyaMcHenry Venaani ongomulelei gwoshigawna, ngoka a li a hala okupekaapeka nokusinda omashongo ngoka ga taalela osikola ndjika, ngoka tashi vulika ogo ga etitha endopo ndyoka lyi sitha ohoni.

Onda hala okufatulula etindi yloshinima shetindo koshikumungu shokEmanya SS osho wo Onyaanya oku shi talela mo montalelo yomadhilaadhilo gaantu. Venaani omuleli gwopashigwana nonge oshinakugwanithwa she, oku na oshinakugwanitha okuninga ekwatathano noshiputudhilo kehe moNamibia, uuna pwa landulwa omilandu.

Oshikando shika, omilandu odha li dha landulwa nokwa li a pewa epitikilo manga inaa talela po.
Aanyaanya yoyene oye li kaaya ndonyoka. Omupya omunene yamwe ya ningi nduno aalongi yopEmanya, nonkene ohaya vulu okukwatakanitha onkundana kehe posikola nomudhingoloko aguhe gwaNyaanya, mboka oyo nduno haya pititha omakuthiikuthi gomuthigululwakalo omwiinayi, ekwatathano lye lelepala osho wo omayitaalo gopapolitika, mbika ayihe oya kala notayi tsikile nokuya ehumokomeho lyosikola noshigwana moshipala.

Eyambulepo lyosikola osho wo ehumokomeho lyoshigwana kalya li nando oshitopolwa shiigongi yawo, ashike ohaya sinaasina kutya ow agama kombinga yini yopolitika, ndjoka omupya omunene ya kaleka oshigwana shawo komunkulo gwehumokomeho, nonando ya tsika oku shi mona.

Iilyo yoshigwana nayakwawo mboka ye na omadhiladhilo ga fa gawo ye li mosikola oyi iwunganeke opo ya keelele etalelopo ndika, niinima oyindji oya holoka. Etompelo lyawo enene kali shi omilandu ndhoka taya ti inadhi landulwa, ashike okokutya omuleli ngoka okwa za kongundu yi ili yopolitika. Ndhindhilika nduno kutya etalelopo ndika kalya li lyopapolitika, ashike olyo ku mona eyamukulo kepulo lya simana; otatu kandulapo ngiini omashongo ngoka ga palamena osikola opo ku monike iizemo iihwepo yi vulithe poopelesenda 0?

Nonando ya li ya tseyithilwa kombinga yepulo ndika, aakwashigwana onkene natango ya li ye na oonkondo dhokuza mondjila yawo yi ulikile uuyuni kutya omadhiladhilo gawo oge li konima sho ya li taya ningi ehololomadhilaadhilo ye li ompinge noonkambadhala dhokweeta iizemo iihwepo. Etindo lyawo olya zo kaakwashigwana mboka ye uvite kutya yo oye na omidhi moSWAPO nonkene kape na ngoka e na okulyata mo ompadhi momudhingoloko gwawo kee na oshihako shoSWAPO, sho osho ya li ye shi ninga oshinima shopapolitika nokuholola omadhilaadhilo ya zala iikutu yomalwaala gwoSWAPO.

Venaani ka li te ya koombelewa dhawo dhoSWAPO ashike okwa li te ya moshigwana.
Oshigwana otashi ti ‘sha kehe gumwe’ ngele kaye shi shi.

Osikola ndjoka oya mona oopelesenda 0, ndele kape na nando omuleli gwawo gwoSWAPO gumwe, nando okansela nenge ngoloneya a kwathela osikola mokukambadhala okukandula po omashongo opo kaashi endululwe we sho tatu ke ya muDesemba 2018.
Sho nda li omulongisikola pEmanya, onda mona po ashike kansela oshikando shimwe posikola mpoka.
Momumvo 2010, osikola kaya li ya mona oopelesenda 100 mondondo onti-10 naanasikola oya li ya hala oku endulula.
Ashike osikola oya li tango ya tala kaalongwa mboka ya zi kondondo 9.

Aakwashigwana yomomudhingoloko nguka oya li ya yi kukansela gwawo a thiminike osikola yi taambululule uunona mbuka wo wu endulule.
Ngoka a li kansela ethimbo ndyoka okwe ya kosikola nonde mu lombwele kutya ope na ongulu yimwe yaa na iipundi niitaafula yo oya valelwa komalimalima, noya ninga oomvula inaayi longithwa, ngele oto tu kwathele moku opaleka ongulu , oku tu monena oonzo dhopantu osho woo iipundi, uunona otatu wu taambululula pwaa na omalimbililo. Ina itaala, nonando nda li nda ningi eindilo lyandje ewanawa ku yambulwe po ongulu yi vule okukala aantu.

Mokwaashisha kwandje, nani kansela okwa li ashike ta kwatitha ewi lyandje nongodhi ye, sho nda ke shi lombwelwa ashike kugumwe gwomookuume ke mboka haya ithigile mo naye ongula ya landula ko kutya kansela ota lombwele aantu puundingosho waNyaanya kutya Shikalepo oye ta tindile uunona wu endulule, ta lombwele aantu ya pulakene kewi lyandje ndyoka a kwatitha. Shika oshinima shi li sh puka, shakansela ta kwatitha ewi lyandje ye ta siikile oshili? Ina pa ndje ombili sigo okeluwa ndika sho a kwatitha ewi lyandje.

Ohatu vulu oku ithana oshigongi shelelo lyosikola tu kundathane ehumokomeho lyosikola. Ashike omunashipundi gwelelo lyosikola ethimbo ndyoka, tango ota dhini elandulathano lyiikundathanwa yoshigongi ye ta pula ta ti: “olye e na oonkondo okuhiya Elelo Lyosikola koshigongi…tetii, amushanga nenge omukuluntusikola oku na ngaa oonkondo oku tu hiya koshigongi?”

Nonando pe na elandulathano lyiikundathanwa, amushanga nomukuluntusikola ohaya kala manga taya kondjitha omapulo ngaka gaafele nokumana po ethimbo, sho taya kambadhala okugandja omatompelo gehiyo yiilyo mbika ye wete kutya oye na uuthemba wa gwedhwa po wu vule wetu, noku ya ithana koshigongi oye wete sha fa etukano.

Omunashipundi okwa li u uvite kutya ye naakuluntu oyo taya ti pii, noyo aaleli yosikola, onkene kaye wete omukuluntusikola nenge amushanga e na uuthemba woku ya hiya koshigongi, oshoka oye wete kutya mbaka yaali oye li pevi. Kandi shi nduno kutya oya li haya kala ya hala okuhiywa kulye opo ye ye kosikola. Pethimbo lyeiniko komulungu, olundji ohaya yi omathaneko gandje moshipala uuna nda hala ehumithokomeho lyosikola, te tu dhimbulutha noohapu ndhika kutya: “… inamu endela okushendja iinima, omwa endela ike elongo, longeni ike”.

Sigo opethimbo ndyoka aakwashigwana yomOnyaanya taya talulula omikalo dhawo dhokuninga iinima, nokulamba epola lyokulundulula oku ikutha muukoloni, yo ya dhimbululele pokati kaashoka shi li mondjila naashoka sha puka, aakwashigwana yomomudhingoloko nguka, mupya munene, otayi kala kohi yoluhepo lwomadhilaadhilo.

Nonando ongawo, onga omunongeki e na ohokwe yelongo, ondi na eikwatopomutima shi na sha nonakuyiwa yaalongwa yomomudhingoloko nguka tagu lyalyakanekwa kaakuluntu yawo, oshoka aalongwa mbaka inaya koka natango, yo aakuluntu yawo oya kala ko nale notaya monika yaa na ko nasha naanona mboka ya vala.

Onda tala konakuyiwa yi na uuyuuki moka aantu taya kala nekwatathano ewanana nokulongela kumwe opo ku kwashilipalekwe kutya aalongwa otaya kwathelwa monkalamwenyo, yo ya ninge iiholelwa yawo yene.
Dr. Elock Shikalepo omunongeki Omunamiba nomulongi omukulu pEmanya SS

LEAVE A REPLY

Please enter your comment!
Please enter your name here