Omayinyengo gokatanga kokoompadhi monooli ga guma oshilongo ashihe

0
24

Shipi Elago

ONGWEDIVA – Aaholi yokatanga kokoompadhi otashi vulika ya ka tegelele ethimbo nuule opo ooliha dhokatanga kokoompadhi moshilongo dhi ka tameke.

Etameko lyoshikako shooliha lyomumvo gwokatanga 2018/19 otali yiwa moshipala unene tu kooliha dhimwe ndhoka inadhi potokonona natango olweendo lwomumvo gwokatanga 2017/2018, onkene ooliha dhimwe itadhi wapa okuya komeho omanga ooliha dhopevi inadhi opaleka omagumbo gadho.

Molwonkalo ndjika NPL oku li a tumina oosipana ontumwafo tayi ulike kutya ooliha itadhi ka tameke we petameko lyaSepetemba ihe otadhi ka tameka okuya pehulilo lyaSepetemba opo ya pe oosipana ndhoka dhi li mooliha dhopevi olweedhe ya manithe ooliha dhawo.
Uuyelele wontumwafo ndjika owa li we tu ziilile kosipana yoKK Palace ndjoka yi li yimwe yoomosipana natango ta dhi kikimba noliha yo North West First Division.

Oliha yoNorth West First Division oyi li yimwe yomooliha ndhoka inadhi pwa natango noyi na oosipana tadhi lu dha tula ombunda moshihwa naotadhi ningi shanamutango oku ya kesindano.

Moshilongo omu na iitayi itatu yoFirst Division nakehe oshitayi osha tegelelwa opo shi ka tume omusindani gwoliha yasho koliha onene moshilongo NPL, ndjoka ngashingeyi yi li yina omahala gatatu gaandjuka konima shoYoung Chiefs,Rundu Chiefs naChief Santos ya li ya pewa mo olukaku moliha ndjika okuya pehulilo lyoshikako shomawudhano sho2017/18.

Kakele koFirst Division, ndjoka inayi potokonoka natango moshilongo , oosipana wo ndhoka dha sindana ooliha miitopolwa ayihe moshilongo sigo onena inadhi dhana omawudhano gwomalolelo ngoka tage ya pe epitikilo lyokudhana moliha yoFirst Division.
Oliha yoNorth West First Division ohayi pewa oosipana koosipana dha za moSecond Division yaShana,Omusati,Kunene nOtjozondjupa, oliha yaShana oya sindanwa po kuGolden Bigs,Omusati Fresh United oye enyakwa, Kunene Outjo football Academy, omanga Otjozondjupa oya sindanwa po kOkakarara Football Club.

Oosipana ndhika ne otadhi ka ya muudhano womalolelo moka oosipana mbali tadhi ka wayuka mo niitsa yi li pombanda ota dhi kapewa okatekete kokuwayimina oliha yoFirst Division, omanga mbali tadhi ka manga iimbale nokushuna kooliha hoka dha yambukile.

LEAVE A REPLY

Please enter your comment!
Please enter your name here