Opolitika oyo ayike itayi eta ehumokomeho

0
24

Ethimbo nolya thikana kutse onga oshilongo tu koke notu uve ko opolitika, noku yi uva ko kutya opolitika oyo ayike itayi eta ehumokomeho. Ehumokomeho lyoshili ohali holoka mpoka aantu yi imanga kumwe, mboka ye na oku uva ko tango kutya oya palamenwa kuupyakadhi washike, taya tsu kumwe komikalo ndhoka oombwanawa kutya otaya ka kandula po uupyakadhi mbono ngiini, osho wo okuninga omatokolo pamwe okulongela kumwe opo ku kandulwe po omawupayakadhi.

Poompito mpoka kape na ompito yokutya ngame ogwongundu ndjika nenge ndjiyaka nonkene itandi vulu okukutha ombinga mokukandula po uudhigu. Eeno, oshili kutya oongundu dhopapolitika ohadhi sindana omawi okupitila momisindalandu dhomathaneko gadho, ashike omahogololo oga pwa, niilonga oku eta ehumokomeho oya pumbwa kehe gumwe a kuthe ombinga nokukwathelathana.
Otashi kala sha puka okutya itandi tambula ekwatho lyoye okutunga oshipangelo molwaashoka omuntu ngoka a hala okutunga oshipangelo nenge osikola okwa za kongundu yopapolitika ya puka.

Onga oohandimwe ohatu kala aluhe tu na omadhilaadhilo ga yooloka nkene tu na okukandulapo omawupyakadhi, shoka kashi na epuko.
Ashike ongaantu otwa pumbwa okupwiikininathana, oku uva ko omathaneko taga gandjwa, e tatu tsu kumwe kwaandyoka dhingi, itaaku talika kutya ngoka e ya po nedhiladhilo olye.

Otu na wo oku uva ko kutya otashi pula aakwashigwana ayehe ku tungwe egumbo. Uuna egumbo lyamushiinda lya yaka omundilo, ku na okwiipula tango ngele owu na tuu okukwathela, ashike kwathela ashike mokudhima omundilo.
Omukalo ngoka nagu kale gwa faathana moshigwana uuna pe na omikundu, kashi na nee mbudhi kutya endopo lyaanasikola, okwaaihumbata nawa kaanasikola nenge kehe tuu shoka.

Oshigwana nashi hilile kombinga yimwe shi kandule po uudhigu mboka meendelelo.

LEAVE A REPLY

Please enter your comment!
Please enter your name here