Oteya naLioness ya imbi pamwe

0
29

Pinehas Nakaziko

WINDHOEK-Uukadhona mboka wu li hawu imbi oongalo dhawo kamana kandongo moshilongo, Oteya naLioness osho ya uvathana ya imbe pamwe, mongalo yawo ndjoka opo ya piti oshiwike sha zi ko, yedhina DiMatta.

DiMatta ongalo ndjoka ya li ya piti pamwe nokavidio kawo koYou Tube, hoka nale yi li ya talwa nokuli kaantu ye vule omayovi gatano. Ongalo ndjika oya li ishewe ya piti kooradio dhomoshilongo ngaashi Kati FM, Omulunga, Fresh FM osho wooEnergy 100FM.
DiMatta ongalo ndjoka yi li moalbuma yaOteya ontitatu, ya tengenekwa yi ka pite kuyele nuumvo. “Oteya okwa li a kwatitha ongalo ndjika tango, nokwa li e wete ya pumbwa omwiimbi omukiintu ngoka ta tula mo ongowela yoHip hop. Konima sho Lioness a li e yi uvu, okwa li a gwile mohole nayo, nokwa tulamo ewi lye mosheendelela,” Thomas Iitula, ngoka e li omutaandelithi gwoongalo dhaOteya okuziilila kOgopa Butterfly ta ti ngaaka.

Iitula okwagwedha po tati, Oteya naLioness oku imba kwayo pamwe otashi ulike ehumo komeho moongalo dhomoshilongo, naashika oshili ishewe tashi ulike elongelo pamwe, osho woo iipindi pokati kaa imbi mbaka yaali. 
Iitula okwati aaholi yoongalo dhomoshilongo naya kale ya tegelela oshindji, noopoloyeka dhokulongela pamwe dhayoolokathana kaahikingalo mbaka yaali.

Ongalo ndjika oyi li ya etwa po kehangano lyOgopa Butterfly, hoka Oteya e li a shainwa. Ongalo otayi popi kombinga yoku uva nawa, osho woo okulya oshimwenyo pamwe nokunyanyukwa pamwe.

Lioness, nedhina pakuudha La-Toya Mwoombola oye omuhikingalo omukiintu ngoka e li ha imbi oongalo dhoHip hop, RnB, nokuli ashike e na oomvula 25. Ohokwe yoongalo oya li ye mu adha manga a li omushona lela.

Uungalo we oomboka mwa kwatelwa Back to basics, Dreams naBad mboka w akala nokwiinyenga nawa mpaka naampeyaka, nowa kala nokuya momathigathano ogendji gwoongalo moshilongo.  

Ngaashi ngeyi Lioness oku li e na uuvidio woongalo ngaashi Dreams, Bad, Location naSauce. Lioness okuli ishewe ta ilongekidha oku imba pamwe naahikingalo ooyakwawo mboka yeli dhingi moshilongo, noalbuma ye okwatengenekwa yika pite nuumvo.
Omanaga Oteya omuhikingalo ngoka a tseyika nale uule woomvula dhi vule pomulongo mehangano lyoongalo, pethimbo a li ha imbi pamwe naFrieda Haindaka, nedhina pamwe Gal Level.

Oteya okwa li a topoka nongundu ndjika mo2015, moka a li atameke oku imba oongalo dhe oye wike.
Oalbuma ye Ethimbo, oyo ya li ye mu tula pomuthika gwopombanda, nokwa li a sindana omakopi ogendji, moshiindingili shoku gandja omakopi kaahikingalo dhingi Aanamibia.

LEAVE A REPLY

Please enter your comment!
Please enter your name here