Shipuata a kalela po Namibia koCotonou

0
149

Maria Namupala

ONDANGWA – Saara Shipuata, oye a tothwa mo a kalelepo oshilongo kethigathano lyomathamba dhingi tali ithanwa African Miss University tali ningilwa koCotonou shaBenini momasiku 24 August nuumvo.

Shipuata ontana yomimvo 22 noku li omwiilongi momvula yahugunina koshiputudhilo shopombanda shaHifikepunye Pohamba mOngwediva ti ilongele onkatu yoHonours Degree momalaka, okwa yambukile komukunda Olupumbu, nokwa hita oondondo dhopevi moshilandopangelo.
Moonkundathana naye Shipuata okwa yelitha kutya pethimbo ndika oku li nale koshilongo hoka taku ningilwa ethigathano ndyoka, nokwa wayimina omathamba omakwawo ge li 14 ga za muuyuni awuhe, ta ti shika oshikando oshitiyali taku longekidhwa ethigathano ndyoka lyeegulukila aalongwa kiiputudhilo yopombanda moAfrica nomuuyuni awuhe koonono.

Ethigathano lyotango olyali lya ningilwa koTunisia “onduuvite etumba okukalelapo oshilongo nokuyelutha epandela lyetu lyi monike kuuyuni awuhe, oshi li ondjodhi yandje okukutha ombinga momathigathano ngangaka, molwaashoka osho nda kala tandi lalakanene monkalamwenyo yandje ayihe,” Shipuata ta ti.

Ta ti shika oshe mu pe ompito ombwaanawa okweenda nokutalelapo iilongo oyindji mbyoka a kala a hala okutalelapo, ta ti okukala gumwe gwomaakuthimbinga oshe mu tsu omukumo noshe mu nkondopeke a kale e na eitaalo neinekelo muye mwene, noku na omukumo kutya ayihe oyi na okweenda nawa.

Shipuata omukadhona gwomeho omatokele ga fa oondago, nolundji oha ulikwa omukadhona dhingi momathigathano guunangula dhingi, okwa holola nenyanyu kutya oku na omapapa ogendji okuza owala sho a tameke okuulika oshipewa she mo2015, okwa totha mo gamwe ngaashi ethambadhingi moMiss Okahandja Youth Expo 2018, Miss Ondangwa Trade fair 2018, Miss Oshana 2018 oshowo Miss Oshakati Totem Expo 2018. Ta ti okwa sindana omapapa 14 lwaampoka moshilongo.

“Ngame mwene onda kala nehalo nohokwe yokukutha ombinga momathigathano ngangoka manga nda li mepipi lyomimvo omishona lela, onda kala nomathaneko gokukutha ombinga momathigathano pauyuni naashino ondi wete kutya ondjodhi yandje oya tsu, sho nda tegelela okuyelutha epandela lyaNamibia mokati kiigwana yuuyuni”. Shipuata ta tsikileko.

Okwa totha mo gamwe gomomashongo ngoka ya taalela onga aakuthimbinga momathigathano ngoka, ta ti olundji aantu moshigwana oye ya talako yafa ya dhina omithigululwakalo, molwaashoka poompito odhindji pethimbo lyiiyindingili ohaya kala ya zala iikutu tayi ulike omalutu gawo, ashike okwa ti shoka hasho elalakano okuulika iitalenti yawo ngaashi shi li elalakano lyethigathano kehe.
Okwa pandula ayehe mboka ya kala noku mu tsa omukumo ethimbo alihe, a kwatela mo aakuluntu ye oshowo yinakulu Leonard Akathingo ngoka a ti okwa kala nokuninga omaunganeko nomalongekidho golweendo lwe aluhe.

Ethigathano ndika otali ningwa kohi yoshipalanyolo “ekuthombinga lyaalongwa mokutunga iiholelwa iiwanawa menenevi Africa.”
Shipuata okwa pula Aanamibia ayehe ya ye kepandja lyomalungula lyedhina African Miss University nokukala ye li hole, opo uuna a mona omawi ogendji ote ku ulikwa oye ethamba dhingi, ta ti ota monika ponomola onti-15. Ta pandula ayehe.

LEAVE A REPLY

Please enter your comment!
Please enter your name here