Antonio ta ka pititha oongalo dhaJomolizo

0
214

Pinehas Nakaziko

WINDHOEK- Mwene gwehangano lyoongalo lyoDeal Done Records (DDR), Antonio Djodick oshiwike shika okwa tseyitha  kutya ye ota ka pititha oongalo dhomwiimbi ngoka a li a hulitha pehulilo lyomwedhi gwa zi ko, nakusa Halweendo Moses ngoka a li a tseyika nedhina lye moongalo Jomolizo.

Jomolizo ngoka a li a langekwa momukunda Onekwaya moshitopolwa shaHangwena sho a li a hulitha ombaadhilila moshipangelo mEngela, okwa adhika e li a shainwa kehangano lyoDDR, hoka oko a adhika ta kwatitha omaimbilo ge.

Antonio okwa popi ta ti oongalo dhaJomolizo itadhi hulile ashike meso lye, ashike ota ka tsikila oku dhi dhanitha, noku dhi kwatela komeho noku dhi taandelitha ngaashi sha kala nale, shika okukaleka po oongalo dhomwiimbi nguka, oshoka anuwa otaku hokololwa a kala ha imbi omaimbilo ngoka ge holike koyendji.

Jomolizo okwa tseyika nawa nokaholikengalo kakehe Kaandjetu, hoka ka kala taka dhana onkandangala nokunyuwitha omakutsi goyendji. Pethimbo ndika nakusa Jomolizo okwa pititha ooalbuma mbali, yotango Kaandjetu, ontiyali Epata Lange.
Omvula ya za ko sho Jomolizo a li a shainwa kehangano lyoDDR, oya li ya uvathana opo ya imbe pamwe naShitana, kohi yehangano olyo tuu ndika, nokwa li ye li metifa lyokupititha oalbuma yawo yedhina Ondakula.

Oalbuma ndjika oya li ya tengenekwa yi ka pite pehulilo lyomwedhi nguka, Antonio okwa ti oya adhika ya pwa nale, nokwa li ashike ye li poku yi pititha, manga Jomolizo inaa hulitha.
Antonio okwa gwedha po ishewe ta ti Jomolizo okwa adhika ta kwatitha natango oongalo dhe ye mwene, mostudio ye ndjoka ye shi gamena monooli.

 “Ngashingeyi ondi li te kambadhala opo ndi ka kale nda gongela oongalo ndhoka Jomolizo a adhika a kwatitha, ngame ndi ke dhi pitithe kuyele omvula twa taalela, pamwe nuuthemba okuza koNASCAM,” Antonio ta ti ngaaka.
Nakusa Jomolizo omwiimbi ngoka a li a tameke okwiimba mo2009, nokwa li a imbi nuudhiginini okuza mo2015, moka a li a mono ekwatho lyopashimaliwa.

LEAVE A REPLY

Please enter your comment!
Please enter your name here