Egandjo lyompito yoku ifutila mondholongo – Oveta yiimbuluma

0
50

Audi Audem Partem

Ope na onkalo yaantu mboka ye wete egandjo lyokwiifutila mo mondholongo nomwaalu gwoshimaliwa omushona gu vulike kungoka ya li ya tegelela moshipotha shontumba ya kale ya thita po, molwaashoka oyendji ohaya kwatakanitha eyifutilemo nomikalo dhimwe dhokugandja egeelo.

Okutindila eyifutilemo – okutula omuntu mondholongo manga inaa pangulwa osha ningi omukalo gwoku ulika okwaatsa kumwe nomutamanekwa. Eyifutilemo kali na sha nangele omuntu oku na ondjo nenge ke na ondjo, naampoka opo pe na uupyakadhi.
Osha indjipala ngashingeyi kumboka ye li komapandja gokomalungula yi imone onga aapanguli mokutokola kutya aanambelewa yuuyuukil (aapanguli), osho wo omathimbo gamwe aanambelewa yopolisi, oya ninga epuko mokugandja ompito yeifutilemo osho wo omwaalu ngoka ya gandja.

Otashi uvitha nayi uuna aantu taya gandja omayiuvo gawo oshoka oye wete ya fa yu uvite ko ngele napu gandjwe ompito yokwiifutila mo osho wo omwaalu gwoshimaliwa shoka shi na okugandjwa kaakayulinyanga, ashike otaya ndopa oku uva ko nawa kutya eyifutilemo oshike nomolwashike lyi lile po.

Uuna omutamanekwa a tulwa miipandeko, oku na uuthemba wokuninga eyindilo lyokwiifutila mo.
Miinima yin a sha niimbuluma, osha simana oku uva ko kutya ope na eyitaalo lyeifutilemo, kokutya, momeho goveta, aafekelwa ayehe naya pewe ompito yi ifutile mo (molwaashoka okuniwe eyitaalo kutya kaye na ondjo manga inaashi tokolwa kompangu), okuninga shila pe na omatompelo ga kola opo ku indikwe eyifutilemo.

Oshinima sha simana momukalo gwetu gwokulonga niimbuluma osho shika kutya omuntu okwi itaalwa kutya ke na ondjo sigo oompoka ta pangulwa nokumonika ondjo shi ikwatelela kooveta ndhoka dhi li po.
Osha simana kutya omuntu ina tindilwa uuthemba we wemanguluko. Kokutya egeelo ohali tameke konima sho omuntu a monika ondjo moshipotha.

Etamaneko lyoshipotha ohali ende moonkatu, hashi tameke nokutula omuntu miipandeko noku hulila pompito manga epangulo inaali ningwa, ethimbo lyepangulo osho wo konima yepangulo. Konima yekwatopo, opolisi ohayi shangelemo oshipotha momambo gawo shomufekelwa, nokonima yaashika, ohaya tula omufekelwa mondholongo.
Ngele omufekelwa okwa kayula onyanga moshinima sha nathangwa, opolisi otayi vulu oku mu pa elombwelo opo a ka holoke mompangu mesiku lya gandjwa kopolisi momulombo ngoka.

Ngele nakufekelwa oku li mokalimosho molwoshimbuluma shaa shi shoka ya tumbulwa miitopolwa mbika:
Oshitopolwa II, Oshitopolwa III shoshitopolwa IV shoshimpungu oshi-2 shOveta onti-51 yomumvo 1997 yOmulandu gwIimbuluma, omupolisi ngoka e na onkatu yaSergeant nenge e li pombanda oku na uuthemba wokugandjaompito yeifutilemo komufekelwa manga inaa holoka lwotango mompangu.

Elalakano lyeifutilemo okukwashilipaleka kutya omuntu ngoka ta fekelwa ota ka holoka kiihokolola kompangu konima sho ya mangululwa okukala mondholongo nenge okuza moshitaasi shopolisi. Niitya yimwe, eyifutilemo omukalo gwokukwathela ku kwashilipalekwe kutya omufekelwa ota ka holoka mompangu kesiku lyokomeho.

Eyifutilemo kali shi omukalo gwokugandja egeelo. Osha simana okudhimbulula kutya omwaalu gwoshimaliwa shoka sha tulilwa po omuntu i ifutile mo itagu ulike ondjo nenge okwaa na ondjo yanakufekelwa.
Ashike, uuwinayi woshimbuluma otawu vulu okudhana onkandangala moku tokola ngele omufekelwa ota ka holoka mompangu.
Omupanguli gwoshipotha shoka konima sho a konaakona emangopo ota tokola ngele omufekelwa oku na ompito onene yokuholoka mompangu nenge ke na mesiku ndyoka.

Olundji, omupanguli iha tindi ompito yegandjo lyeyifutilemo noha lombwele ompangu manga ompangu inaayi lombwela omufekelwa kutya oku na uuthemba wokuninga eyindilo i ifutile mo manga taku konaakonwa oshipotha.
Omupanguli ngoka ta pangula meyindilo lyokugandja eyifutilemo oha tokola ngele omufekelwa na pewe ompito yoku ifitila mo nenge ina pewa, etokolo ndyoka hali ikolelele kiinima oyindji.

Oshiholelwa, ngele omufekelwa oku na ompito onene yokutuka nondhila nenge yokufawula, e na ondjokonona yokulonga iimbuluma, e na ondjokonona yokwaaholoka mompangu uuna a li a tegelelwa a holoke, ota vulu okuya iilonga nomakonaakono gaanambelewa yoveta moshipala nenge ta vulu okupiyaganeka aagandji yuumbangi moshipotha.

Otashi kala tuu shi li muuwanawa womufekelwa kombinga yegameno lye notashi kala tuu shi li muuwanawa woshigwana? Kehe ompangu oyi na uukwatya wayo wi ili. Omupanguli, pethimbo lyepangulo lyomufekelwa, ota tokola ngele omufekelwa oku na nenge ke na ondjo.

Omushangi gwoshinyolwa shika omunambelewa guuyuuki ngoka a kala moshimpungu shika uule woomvula dhi vulithe omi-30. Omushangwa nguka ogu na uuyelele wa mbwalangandja na inagu longithwa mokugandja omakumagidho gopaveta.

LEAVE A REPLY

Please enter your comment!
Please enter your name here