Omulumentu omulimbiliki a hala President Geingob a fute oshikolo shi thike pootriliona N$38 pootriliona N$38

0
1206

Komutoolinkundana

WINDHOEK – Moshipotha tashi limbilike, omulumentu omunamimvo 43 ota pula ompangu opo yi mu popile opo President Hage Geingob, Omuprimaminista Saara Kuugongelwa-Amadhila, Epangelo lyaNamibia netonatelo lyompangulilo yopombanda anuwa ya fute oshikolo shoshimaliwa shootriliona N$38.

Omulumentu nguka ta pula opo oshimaliwa shi kale sha futwa molupe lwoodola dhaAmerica (USD) oye David Uuyuni Kaulinawa Kamati, a zile komukunda Oluteyi mOngandjera. Kamati ota ti oshikolo shika shootriliona ndhika N$38,3, oshi li oshipambu shethigululo lye ndyoka lya kana konima sho he, ngoka oye anuwa Leopold Kamati a si lwopehulilo lyomumvo 1977 nenge petameko lyo1978.

Geingob, noshowo omupilima oya yamukula nale komapulapulo gompangu taya yamukula komapopyo gaKamati. Mbaka oya ti omapyopyo ngoka kage na omungo na itaga ulike uushili. Aaleli mbaka oya pula opo ompangu yi ekelehi oshipotha shaKamati, taya ti otashi mana po ethimbo notashi ya piyaganeke opo ya longe iilonga yawo yopapangelo. “Eindilo lyoshipotha shika olyo iipwalaga yowala nanakuninga eindilo ke na omakankameno ye ishewe ita ulike e na onakuyiwa,” Kuugongelwa-Amadhila, osho a yamukula a pitila momuhahende-ndjayi gwepangelo.

Inashi yele ngele Kamati okwa hala owala okuninga oshiyolithi nenge pamwe ota ningile ompangu yopombanda omalolelo ashike oombapila dhe dhokupula iikolo ndhoka a gandja kompangulilo yopombanda mOshakati oonkumwithi. Moombapila moka okwa gandja Okalongo Lodge Bar mOngwediva onga ondjukithi ye mpoka ha kala.

Kamati ota ti okwa li owala e na oomvula ndatu sho he Leopold Kamati a hulitha kehulilo lyomumvo 1977 nenge petameko lyo1978. Pethimbo ndyoka, he ka li owala Omunamibia gwoshipuna ngoka a li e na ongushu yi li poobiliona USD$3,5 (oobiliona N$51), ihe okwa li wo e na iipambuliko mukehe ongeshefa onene ndjoka ya li po manga oshilongo inaashi manguluka. Shi ikololela kuuyelele mboka a gandja kompangulilo yopombanda, Kamati (gwomushona) ota ti he Kamati gwomukuluntu okwa li e na iipambuliko moomina, momatungo, moositola, moofaalama, miikwahi, momalutenda, ye ishewe okwa li mwene gwehangano lyedhina Tsumeb Limited Corporation (TLC).

Kamati gwomukuluntu okwa li e na iipambuliko yoopelesenda 50 momahangano konyala agehe goomina mwa kwatelwa lyaCDM (ndyoka ngashiingeyi lya lukululwa lya ninga Namdeb), Rosh Pinah Zinc Mine, Rossing Uranium Mine, Karibib Gold Mine, Otjihase Mine, nomakwao ogendji. Ta ti he okwa li e na osikepa, oondhila, omagumbo ga thika lwopo 200, ye ishewe ookwa li e na oongeshefa piishiindalongo.

Dhimwe domoohapu dhaKamati kadhi na omulyo. Okwa hokolola ta ti he okwa li omunangeshefa, omunapolitika, omunongononi, omushangi gwoondjokonona, ye oshiwe okwali wo omupilima gwaSouth West Africa (SWA)/Namibia okuza mo1961 sigo omo1964,” ye ishewe okwa li a kwatele komeho ekondjelomanguluko onga omukwaSWAPO.

Ta ti omakakunya oga kala noku kwatela Kamati, David Kamati ali owala e na omimvo ndatu. Kamati ta ti okwa kutha ethimbo ele okupula ko ethigululo lye oshoka sho he a si okwa ka tekulwa kuhegona Severus Kamati kOluteyi hoka nonatango oko e li. Okwa popi wo omapungulo ngoka gali ge na okukala medhina lye, nonande ina gandja nande ondokumende yasha okuyambidhidha omapopyo ge.
Ta ti iinima ayihe mbyoka okwe yi lombwelwa kuhegona Severus Kamati ngoka a si ko mo1988.

Ashike Geingob naKuugongelwa-Amadhila oya ti Kamati ngoka inaa kalelwa po kumutseyiveta ina gandja nande omukanda gwasha kombinga yomahangano ga he.

Ke na woo tuu nande onzapo yeso opo a ulike ngaa nande kutya omulumentu ngoka ta popi a si ogwoshili ye ishewe oye he.

LEAVE A REPLY

Please enter your comment!
Please enter your name here