Oombasikela dha hingwa moondundu dhaKahandja

0
24

Komutoolinkundana

OKAHANDJA – Omvula ontiyali yuudhano woMTB Dirt Attack Ride/Run owa li wa kwata miiti sho aakayili ye li 170 ya li ya yi momukweyo okuya mela lyayimwe yomoondjila ndhoka ombwaanawa dho oondhigu. Ondjila ndjika ombwaanawa yoGravel & Dirt MTB Marathon Series ya li ya kwashilipalekwa kehangano lyoHollard, oyi li konyala ookilometa 10 okuza mondjila yokoGross Barmen kondje yondoolopa ya ziza nawa yaKahandja, ndjoka yi na ondjila yevundwa ya yelekathana, omanga oshitopolwa shimwe shi na okulonda iikulundundu.

Ondjila oya li yi ili kwaandjoka yomvula ya hugunina, Tony Bassingthwaighte okwa li a thaneke ondjila ndjika noku yi tula pombapila, noyendji mboka ya li ya kutha ombinga, ye wete lela tashi kala shimwe shomiisimaninima muuliindeli wawo wokomumvo, unene tuu sho tashi eta iitopolwa ayihe mbyoka ya tegelelwa kaakuthimbinga moNamibia MTB. Osha li nokuli shi vulithe mbyoka ya zi ko, oshoka uudhano wonuumvo owa li wa gandja ompito kaakuthimbinga aatondoki yiinano iyali yookilometa 10 nomi-21.

Newangandjo lya li lya yela nawa, aakuthimbinga oya li ya gongala pehala mpoka hapu kalwa taya kuthilwa ko nkene uudhano tawu ka enda, naashika sho sha pu, eyalulo olya li lya tameke. Gwotango okuya okwa li Drikus Coetzee, ngoka a kala noku shi ulika ngashingeyi ethimbo nuule kutya ye ke shi okatana muudhano woHollard Gravel & Dirt Series, ashike konima ye okwa kala mboka ye mu li mokashoko, ngaashi Xavier Papo naDenzel de Koes.

Elondo lyiikulundundu osho woo uundjila uushonashona kayo ashike ya li omayimbo kaakayili mbaka, ondjila oya li wo ya kwatela mo okupitila momilonga ndhoka dha pwina osho wo mefululu, shoka kasha li ashike oshidhigu, ashike osha li wo tashi lolodha aakayili mbaka konima yethimbo.

Ingrum Cuff okwa li a sindana po oshinano shookilometa 70 moshimpungu shaakokele, nokwa li e shi ningi methimbo efupi mondjokonona lyo 2:55:13, okwa li a landulwa kuDrikus Coetzee (2:55:14) ngoka a li oye a sindana po oshimpungu shoElite. Danzel De Koe (2:56:43) okwa li a yakula po ehala etiyali, komeho gaXavier Papo (3:01:03) ngoka e ya puutitatu.

Omwa li ashike omukayili omukiintu gumwe, Michelle Doman, ngoka a li a mana muule wethimbo 3:35:56. Mboka ya li popepi nayo oomboka ya li moshimpungu shoSub Veteran Women, mboka nayo woo ya li ya mana taya hingilile, moka Courtney Liebenberg (3:36:28) a li a kutha po ehala lyotango, komeho gaMarion Schonecke (3:46:28) ngoka e ya puutiyali, naRosi Hennes (3:47:48) e ya puutitatu.
Uudhano mbuka ohawu yambidhidhwa komahangano ngaashi Hollard, Food Lovers Market, E-Med Rescue 24, Crank’d, NBL, Cymot naErnst Lerch& Co.

LEAVE A REPLY

Please enter your comment!
Please enter your name here