Ovanyasha modoolopa yaLüderitz va yandja omaano keehepele

0
34

Tuulikki Abraham

Lüderitz – Ovaleli ovanyasha melelo lodoolopa yaLüderitz ova yandja omaano kovanhu ovo ve li momhumbwe modoolopa yaLüderitz.
Ovaleli ovanyasha ova hovelele noshikonga shokuninga omaehelo, moshiwana, okuhovela muJuni 2018, nelalakano osho tava mono mo va dule oku shi topolela ovanhu ovo ve li momhumbwe modoolopa yaLüderitz.

Ondjodi yovaleli ava, osho ya ningi yoshili. Oshivike sha ya, ove shi pondola okutopolela omakumbafa noikulya kovanamaumbo ve dulife pomilongo nhano.

Omaumbo oo kwa havalekwa omakumbafa, noplastika i na oikulya ngaashi oufila wepungu, oufila wokuteleka eemboloto 2kg, omakende omaadi nosho tuu.

Kakele kokutopola omakumbafa noikulya oyo ya ongelwa kovawiliki ovanyasha, osheendo osha li yoo sha waiminwa kumayola wodoolopa yaLüderitz Hilaria Mukapuli opo va topole pamwe omaano oo a ongelwa kovanyasha ovaleli, nokutopola yoo pamwe eeshi odo da yandjwa kombelewa yamayola hadi yandjwa odula keshe nelalakano di topolelwe ovanhu ovo ve li momhumbwe modoolopa.
Ovanhu ovo ve li momhumbwe yeendja ova havalekwa nee omakumbafa, eeplastika doikulya, noipakete yeeshi.

Omupedumayola omunyasha modoolopa yaLüderitz Paulina Ndafonghoshi, okwa tumbula kutya voo onga ovaleli ovanyasha modoolopa, ova faneka opo va ongelesha, unene tuu omakumbafa va dule okuyandja omaano kovanhu ovo ve li momhumbwe ve li amene koutalala unene tuu pefimbo eli.

Ta ti ova ninga eingido modoolopa konima yeemwedi mbali da pita, nokwa tumbula kutya ova pandula neenghono eshi oshiwana sha nyamukula mokuyandja omakumbafa noikulya I dule okupewa ovo ve li momhumbwe.

LEAVE A REPLY

Please enter your comment!
Please enter your name here